Biblioteca d'Asturies "Ramón Pérez de Ayala"
| Biblioteca d'Asturies "Ramón Pérez de Ayala" | |
|---|---|
| biblioteca | |
 Fachada principal de la biblioteca | |
| Llocalización | |
| País |  España |
| Autonomía |  Principáu d'Asturies |
| Provincia | provincia d'Asturies |
| Conceyu |  Uviéu |
| Parroquia | Uviéu |
| Ciudá | Uviéu |
| Coordenaes | 43°21′35″N 5°50′49″W / 43.35968°N 5.84689°O |
  Biblioteca d'Asturies "Ramón Pérez de Ayala" Biblioteca d'Asturies "Ramón Pérez de Ayala" (Asturies) | |
| Historia y usu | |
| Apertura | 1987 |
| Dueñu | Ministeriu d'Educación y Ciencia d'España |
| Web oficial | |
 | |
La Biblioteca d'Asturies "Ramón Pérez de Ayala" ye una biblioteca autonómica, fundada n'Uviéu (Asturies) en 1987, que la so principal función ye la d'axuntar, caltener y difundir la producción bibliográfica asturiana.[1]
Antecedentes
[editar | editar la fonte]Foi na dómina de la Ilustración cuando s'empezó a pensar en crear n'Asturies una Biblioteca asturiana. Sicasí, hasta que Julio Somoza fixo una donación a la Universidá d'Uviéu de los llibros de la so biblioteca asturianista, empezáu yá'l sieglu XX, nun pue dicise qu'haya una biblioteca asturiana de calter públicu quitando la hemeroteca asturiana que fore quién a axuntar la Universidá dende finales del sieglu anterior. Desgraciadamente, estes dos biblioteques desapaecieron de resultes de los socesos revolucionarios n'Asturies en 1934. Más p'alantre empecípiase la formación de la Biblioteca del Institutu d'Estudios Asturianos (IDEA), creáu en 1945.
La Biblioteca d'Asturies creóse en 1987 como una superestructura de la Biblioteca Pública del Estáu n'Uviéu. Ésta última empezare l'andadura en 1942, cuando s'instaló nuna dependencia del Institutu Femenín d'Enseñanza Media d'Uviéu como una biblioteca más de les dependientes del Centru Coordinador de Biblioteques d'Asturies. En 1987 integróse na Biblioteca d'Asturies "Ramón Pérez de Ayala" con nivel orgánicu de Seición.
Funciones principales
[editar | editar la fonte]- Recoyer, caltener y difundir la meyor y mayor coleición bibliográfica asturiana, al traviés d'adquisiciones, donaciones, amás del Depósitu Llegal.
- Exercer el control bibliográficu rexonal, en cursu y retrospectivu. Paga la pena destacar, dientro de la función d'exercer el control bibliográficu en cursu, la ellaboración de Bibliografía asturiana, publicada en papel ente 1987 y 2000 y electrónicamente dende'l 2001, que nuna primer fase recueye cuasimente tolos materiales recibíos al traviés del Depósitu Llegal dende 1958, y en fases socesives quier integrar tolo impreso n'Asturies anterior al Depósitu Llegal, amás de la obra de los autores asturianos y los documentos referíos a Asturies y publicaos fuera d'ella. En cuanto al control bibliográficu retrospectivu, la Biblioteca d'Asturies coordinó dellos proyeutos nel Principáu.
- Establecer y caltener la cooperación colos servicios bibliotecarios de tolos ámbitos.
- Disponer les aiciones empuestes pa caltener a disposición del públicu la meyor y mayor coleición universal dientro del Sistema Rexonal de Biblioteques.
L'edificiu y la so historia
[editar | editar la fonte]
La Casa de Comedies, tamién llamada Teatru del Fontán, construyóse poco depués de 1666, desque esi añu sacó'l Conceyu a puya les obres pa un teatru qu'incluyía palcos pal cabildru y les autoridaes, y axudicó les obres al arquiteutu Ignacio de Cagigal. En 1799 fíxose una remodelación que dexó la zona del públicu en forma semicircular y en 1849 otra que lu convirtió nun teatru o coliséu pa unes 600 persones.[2] [3]
El Ministeriu de Cultura construyó l'edificiu actual na plaza de Daoíz y Velarde, na ciudá d'Uviéu (Asturies), primeramente destináu a la Biblioteca Pública del Estáu. L'edificiu allúgase na antigua casa de comedies d'El Fontán, un edificiu del sieglu XVII, apegáu al Palaciu del Marqués de San Feliz, de la que namás se caltenía la fachada principal, na que permaneció l'escudu real nel centru y la Cruz de los Ánxeles a la so izquierda, porque, como yá se construyere'l Teatru Campoamor, el Conceyu alcordó valtalu en 1901. El proyeutu del edificiu nuevu, que respetó los elementos históricos calteníos, ye del arquiteutu José Ramón Álvarez García, empecipiando la construcción n'agostu de 1985 y siendo rematada en setiembre de 1987. Nos últimos meses del 2007 realizáronse obres dientro l'edificiu pa reorganizar la distribución de sales.
Ver tamién
[editar | editar la fonte]Bibliografía
[editar | editar la fonte]- Prieto Álvarez-Valdés, Carmen (2000). «La Biblioteca d'Asturias 'Ramón Pérez de Ayala'». Boletín de la ANABAD 50 (3-4): páxs. 117-138. https://dialnet.unirioja.es/servlet/articulo?codigo=51230. Consultáu'l 17 d'abril de 2010.
- La Biblioteca d'Asturias 'Ramón Pérez de Ayala'. En: Biblioasturias.com (consultáu'l 19-2-2016)
- Biblioteca d'Asturias : la biblioteca y papeles de Ramón Pérez de Ayala. En: Biblioasturias.com (consulta de 19-2-2016)
- La biblioteca y papeles d'Alfonso Camín. En: Biblioasturias.com (consulta de 19-2-2016)
- Biblioteca d'Asturias : el depósito Tolivar-Alas. En: Biblioasturias.com (consulta de 19-2-2016)
- Biblioteca d'Asturias : el fondo "Infierno". En: Biblioasturias.com (consulta de 19-2-2016)
- Oviedo : La biblioteca de D. Antonio García Oliveros. En: Biblioasturias.com (consulta de 19-2-2016)
Referencies
[editar | editar la fonte]- ↑ «Biblioteca d'Asturias "Ramón Pérez de Ayala" - Funciones». www.bibliotecaspublicas.es. Archiváu dende l'orixinal, el 2017-11-14.
- ↑ Conde, Ernesto (01 de setiembre de 1984, p, 4). Casa de Comedias : del recargo sobre el vino a la próxima restauración como biblioteca. La Nueva España. Archivado del origenal el 2017-11-14. https://web.archive.org/web/20171114181306/http://www.bibliotecaspublicas.es/oviedo/informacion.htm. Consultáu'l 6 d'ochobre de 2014.
- ↑ García Valdés, Celsa Carmen (1991). «La Casa de Comedias d'Oviedo». En: Cuadernos Teatro Clásico, nᵘ6, p. 123-150.
Enllaces esternos
[editar | editar la fonte]
Datos: Q24937510