Revolución Asturiana

La Revolución Asturiana (o Revolución d'Ochobre) foi una insurrección obrera armada qu'aconteció n'ochobre de 1934. La convocatoria estatal yera de fuelga, pero n'Asturies conviértese en Revolución.

Les fuercies obreres tomaron el control políticu y la "Comuña Asturiana", como se la nomó, resistió de la mañana del día 5 d'ochobre qu'entamó la revolución hasta'l 18 d'ochobre cuando Belarmino Tomás presidente del Tercer Comité Revolucionariu negocia col xeneral del exércitu de la República López Ochoa como xeneral del Exércitu Revolucionariu.

Esti llevantamientu obreru ye l'últimu que se da n'Europa hasta anguaño.

L'Alianza Obrera Asturiana

Los primeros pasos pa la formación de l'Alianza Obrera foi por parte de los dirixentes de la CNT presos na cárcel d'El Coto en Xixón tres el movimientu revolucionariu que la CNT trató de impulsar en tol Estáu nel mes d'avientu de 1933. Segundo Blanco, José María Martínez, Avelino González Mallada, Acracio Bartolomé, Horacio Argüelles, José Dorado, Pelayo Cifuentes y Avelino Martínez mandaron un escritu al Plenu Rexonal de la CNT proponiendo la formación d'una alianza cola UXT.

N'Asturies la CNT caltenía una postura más proclive a la formación d'aliances obreres que n'otres zones del Estáu. Aprobada la propuesta d'Alianza pol Plenu cenetista, el Comité Rexonal encargó'l 9 de marzu de 1934 contautar cola UGT para propone-yos la formación de l'Alianza Obrera n'Asturies. Esta comisión de contautu tuvo formada por José María Martínez, Avelino González Entrialgo y Segundo Blanco.

El día 31, sábadu, a les siete de la tarde aconceyaron nun cuartu de "Casa Manfredo", Bonifacio Martín, Graciano Antuña]], José Mª Martínez, Horacio Argüelles y Avelino G. Entrialgo. Cada representación estampó'l so respeutivu sellu al pie de la firma quedando llegalizáu'l pactu d'Alianza Obrera "col esclusivu oxetu de promover y llevar a efeutu la revolución social". Firmó pola U.G.T. Bonifacio Martín, pola C.N.T José Mª Martínez, Horacio Argüelles y Avelino González Entrialgo y pola FSA Graciano Antuña.

Tres el pactu d'alianza otres organizaciones obreres solicitaron incorporase, como'l BOC, la Izquierda Comunista. Yá n'ochobre entrará en l'Alianza'l PCE.

Desendolcu de la revolución

Na nueche del 4 d'ochobre la conseña del llevantamientu yá taba dada y na mañana del día 5 españaba'l movimientu armáu de grandes proporciones col ataque a los cuarteles de la Guardia Civil. La revolución estendióse aína pela Cuenca del Nalón y la Cuenca del Caudal y la zona centro-oriental dende Siero hasta Nava no que sería l'epicentru de la Revolución.

Tres el control de les cuenques los revolucionarios organizaron delles columnes pa tomar Uviéu que ficieron na so mayoría lo mesmo que Xixón.

Había armes y dinamita , y la revolución taba mui bien organizada. Proclámase n'Uviéu la República Socialista Asturiana y atáquense los cuarteles de la Guardia Civil.

A los tres díes casi la totalidá d'Asturies taba en manes de les fuercies revolucionarios, incluyíes les fábriques d'armes de Trubia y La Vega. A los diez díes, unos 30.000 trabayadores formen l' Exércitu Roxu.

El gobiernu de la Segunda República española adopta una serie de medies enérxiques. Ente'l pidimientu de Gil-Robles comunicando a Lerroux que nun se fia del xefe d'Estáu Mayor, xeneral Masquelet, los xenerales Goded y Franco (que tenía esperiencia na represión de la folga revolucionaria de 1917 n'Asturies) son los encargaos de dirixir la represión de la revolución desde l'Estáu Mayor en Madrid. Estos recomienden que se traigan tropes de la Lexón y de Regulares dende Marruecos. El gobiernu acepta la so propuesta y el radical Diego Hidalgo, ministru de la Guerra, xustifica formalmente l'emplegu d'estes fuerzas mercenaries, nel fechu de que-y preocupaba l'alternativa de que reclutes mozos peninsulares morrieren nel enfrentamiento, polo que la solución adoptada parex-y aceptable.

Mientres la revolución de 1934 la ciudá d'Uviéu quedó asolada en bona parte, resulten incendiaos, entre otros edificios, el de la Universidá, biblioteca que guardaba fondos bibliográficos d' extraordinariu valor que nun se pudieron recuperar, o el Teatru Campoamor. También foi dinamitada La Cámara Santa en la Catedral.

El xeneral Eduardo López Ochoa, comandando las fuerzas militares gubernamentales, foi sofitar les tropas sitiaes n'Uviéu, y el coronel Juan Yagüe colos sos llexionarios y con sfitu de l' aviación.

En La Felguera, Llangréu y nel barriu d'El Llano de Xixón llegaron a dase breves experiencies de comunismu llibertariu:

En la barriada de El Llano se procedió a regularizar la vida de acuerdo con los postulados de la CNT: socialización de la riqueza, abolición de la autoridad y el capitalismu. Fue una breve experiencia llena de interés, ya que los revolucionarios no dominaron la ciudad. [...] Se siguió un procedimiento parecido al de La Felguera. Para la organización del consumo se creó un Comité de Abastos, con delegados por calles, establecidos en las tiendas de comestibles, que controlaban el número de vecinos de cada calle y procedían a la distribución de los alimentos. Este control por calle permitía establecer con facilidad la cantidá de pan y de otros productos que se necesitaban. El Comité de Abastos llevaba el control general de las existencias disponibles, particularmente de la harina.

Manuel Villar. El anarquismu en la insurrección de Asturias: la CNT y la FAI en octubre de 1934

Los exércitos

Exércitu republicanu

El gobiernu movilizó fuercies pa sofocar la Revolución Asturiana:

• 27 batallones d'infantería nes que s'alcontraben 3 banderes de la Lexón.
• 5 Escuadrones de caballería provistes d'ametralladores.
• 9 Bateríes d'artillería, con 36 pieces.
• 1 Batallón d'inxenieros.
• Delles compañíes de zapadores y pontoneros.
• 2 grupos d'intendencia.
• 2 grupos de sanidá.

Unos 17.000 militares amás de la fuercia pública que l'estáu caltenía n'Asturies que va ente los 2.645 reconocíos oficialmente a los 3322 defendida por dalgún autor como Paco Ignacio Taibu II (1664 soldaos, 798 miembros de la Guardia Civil, 560 de la la Guardia d'Asaltu, 100 carabineros, 200 guardes municipales, axentes de policía y guardies xurao d'empreses mineres). Según datos de Taibu II, les fuercies de la Guardia Civil desplegada n'Asturies yeren mayores que les qu'había en Madrid o Barcelona.

Exércitu roxu

Les fuercies revolucionaries tuvieron formaes por unos 30.000 combatientes, cifra reconocida pol Ministeriu de Guerra español (Barco Teruel:1984), otros como David Ruíz en "Rebelión en Asturias" o Manuel Vazquez Enciso y Germán Baschwitz falen d'unos 50.000 revolucionarios.

El meyor arma de los revolucionarios foi la dinamita. Los trabayadores del metal ficieron carros blindaos y dende l'entamu l'exércitu revolucionariu tuvo nel so poder la Fabrica d'Armes de Trubia. Tres l'Alianza Obrera entamaren a guardase armes con vistes a un posible movimientu revolucionariu, bien por robu bien por contrabandu, destacando el desembarcu d'El Turquesa nes costes de Pravia.

La rendición

Belarmino Tomás como presidente del Tercer Comité Revolucionariu foi l'encargáu de negociar col xeneral del exércitu republicanu Eduardo López Ochoa les condiciones de la rendición, nestes negociaciones actuó como xeneral del Exércitu Roxu. Ignacio Lavilla en "Los hombres de Octubre" reproduz el rellatu que'l mesmu Tomás ficiere de lo que-y dixera a Ochoa:

"Enantes qu'escomencipiemos tratar de lo que me trae equí, quiero que nun pierda usté de vista que los que tamos frente a frente somos dos xenerales, el de les fuercies gobernamentales, que ye usté, y el de les revolucionaries, que soi yo"

En "1934. La guerra civil empezó en Asturias" d'Ángel Palomino Belarmino apaez reflexáu como "xeneral en xefe del Exércitu Roxu d'Asturies".

Na negociación Belarmino Tomás punxo como condiciones, siguiendo les sos pallabres recoyíes por Lavilla:

"que nun hebia represalies, a nun ser les que remanen de l'acción de los Tribunales de Xusticia; qu'en saliendo les fuercies d'Uviéu pa entrar na Cuenca nun vaiga nin el Terciu nin los Regulares, depués de lo que vimos si la xente los viere nun saldríen les coses tan bien"

Tres negociar una rendición honrosa, que depués nun será cumplida, foi despedíu pol xeneral Lopez Ochoa con saludu militar nel patiu del edificiu pa plasmu de la prensa ellí aconceyao.

En llegando a Sama y depués d'aconceyase'l Comité Revolucionariu, dende'l balcón de la Casa Conceyu de Sama (Llangréu) empobinó l'últimu discursu a los revolucionarios ellí aconceyaos informando de les condiciones alcordaes. Depués de momentos de discusión por parte de los revolucionarios partidarios de caltener la llucha y de los de la rendición, decidióse aceptar. Les últimes pallabres de Belarmino Tomás foron, como recueye Juan José Menéndez García:

"Namás vos dicimos, camarades, sobre esta cuestión, la nuestra última pallabra ye un puxa a los valientes trabayadores d'Asturies y a la revolución social"

Revolucionarios/es

Socialistes

• Belarmino Tomás -Presidente del Tercer Comité Revolucionariu.
• Graciano Antuña - Miembru destacáu del Comite Revolucionariu.
• Ramón González Peña - Presidente del Primer Comité Revolucionariu.
• Teodomiro Menéndez - Presidente del Segundu Comité Revolucionariu.

Anarcosindicalistes

• Segundo Blanco
• José María Martínez
• Avelino González Mallada
• Aida Lafuente

Bibliografía

• Juan A. Sánchez García-Saúco. La revolución de 1934 en Asturias. Editora Nacional. Madrid (1974). ISBN 84-276-1217-6.
• Manuel Villar. anarquismu en la insurrección de Asturias: La C.N.T. y la F.A.I. en octubre de 1934 Fundación Anselmo Lorenzo (Madrid) 1994 ISBN 8486864151
• Adrian Shubert "Hacia la Revolución. Orígenes sociales del movimiento obrero en Asturias, 1860-1934". Editorial Grijalbo. Barcelona (1984). ISBN 84-7423-239-2.
• Gabriel Jackson, P. Broué, B. Bayerlein, F. Claudín, J.L. García Delgado, G. Ojeda, J.A. Vázquez García, M. Cabrera, S. Juliá, Paul Preston, A.M. Calero, , J.P. Fusi Aizpurúa, J. Girón, M. Pérez Ledesma, P.I. Taibu II, A. Shubert, D. Benavides, J.M. Macarro, J. Alvarez Junco, L. Paramio. "Octubre 1934". Editorial Siglo ventiún d' España Editores.
• Ignacio Lavilla, "Los hombres de Octubre" . Semana Negra de Xixón, Xixón, 2004.
• Juan José Menéndez García, "Belarmino Tomás, Soberano de Asturias" , Biblioteca Julio Somoza, Temas de Investigación Asturiana nᵘ24. Silverio Cañada editor, Xixón, 2000.
• Ángel Palomino. "1934. La guerra Civil empezó en Asturias". Coleición Documento. Editorial Planeta, Barcelona , 1998.
• Ángel Palomino. "1934. La guerra Civil empezó en Asturias". Coleición Documento. Editorial Planeta, Barcelona , 1998.
• Enrique Barco Teruel "El "golpe" socialista del 6 d'ochobre de 1934". Coleición Ensayo, nᵘ7. Ediciones Dyrsa. Madrid, 1984.
• Mariano Suarez. "¿quien escaeció a Belarmino Tomas. Soberania y socialismu n'Asturies" Andecha Fundación, Uviéu, 2004. ISBN 84-930985-3-1
• Pío Moa. "1934: Comienza la Guerra Civil. El PSOE y la Esquerra emprenden la contienda". Ediciones Áltera, S.L. (Barcelona, 2004). ISBN 84-89779-59-7

Enllaces esternos

Alianza Obrera:

• El procesu de formación de l'Alianza obrera asturiana, documentu, probablemente, d'Avelino Gonzalez Entrialgo Archiváu 2009-02-26 en Wayback Machine (castellán)

Fechos

• "Octubre de 1934: Recuerdos de un insurrecto" de Alberto Fernández Archiváu 2006-12-29 en Wayback Machine.(castellán)

Enllaces esternos

• Wikimedia Commons tien conteníu multimedia tocante a Revolución Asturiana.

• Datos: Q1587277