蔣中正

1943年蒋中正就任国民政府主席辰光个肖像

蒋中正（1887年10月31号—1975年4月5号），字介石，浙江奉化人（属吴越人），中华民国政治人物、军事人物，从1927年开始间断性成为国民党党魁、国民政府领导人将近半个世纪。

生平

早年

伊勒奉化一个商人屋里出生，爸爸老早就死脱，从小养成坚韧但欢喜搞事体个性格。

留学日本

年轻辰光留学日本，日文弗曾学到多少，军事知识也只学到初级军官个级别，但勒迭个阶段结交张群，并勒浙江老乡会当中接受反清个兴中会革命思想，拜陈英士做自家大哥。

参与辛亥革命

之后跟牢孙中山参加反对清帝国个活动，1911年，勒陈其美安排下，

上海生活

中华民国建立之后，伊经常蹲勒上海，同杜月笙、黄金荣之类个黑社会人物关系密切，并参加证券投机活动。偶尔跑到广东去，帮助孙中山搞搞革命。

成为校长

1920年代初，孙中山决定同苏联进行合作，交关国民党内部个派系反对，但蒋中正表现个邪气积极，得到孙中山信任，之后个中山舰事体之后，更成为孙中山勒军事上依赖个人物，成为黄埔军校个校长。1925年孙中山死脱，蒋中正通过权变，控制广东个国民党集团军事权力，成为同廖仲恺、汪精卫、胡汉民差弗多登基个人物（后三个侪是孙中山欢喜个广东人，孙中山从来弗曾明确讲让蒋中正继承伊个地位）。

北伐搭下野

1926年7月，蒋中正就任国民革命军总司令，开始北伐。因为个辰光北洋军阀混战结棍，加上伊个部队有苏联人帮忙个政治教育，所以战斗力蛮强，无几个月头就推进到长江流域，迭个阶段，蒋中正开始搭江浙地区个名流接触，让自家勒南京另外成立一个中央。1927年4月，蒋中正勒上海清党，搭中国共产党决裂。之后宁汉合流，但蒋中正下野。

重新出山搭新军阀混战

1928年，蒋中正重新出山，成为南京国民政府个军事委员会主席（也是伊“委座”称呼个由来），先后同广西个桂系（李宗仁、白崇禧），以及北方个晋系（阎锡山）搭西北军（冯玉祥）爆发冲突，发生蒋桂战争、中原大战。因为拉拢东北个张学良，蒋中正勒此类混战当中侪取得胜利。此外，伊搭广东系个实力也关系搭僵，先后发生软禁胡汉民、逼迫汪精卫下台，以及两广事变。同一阶段，伊也积极进行剿共，但失败过好几趟，到1934年第五趟个辰光，才勒德国专家个帮助之下成功。

西安事变搭对日战争

1936年西安事变之后，蒋停止剿共，同意抵抗日本侵略。1937年卢沟桥事变之后，蒋中正勒江西庐山发表讲话，号召对日本全面战争。之后，蒋中正拿精锐部队侪派到上海周边，对日本进行淞沪战争，但最终失败，只好撤退到武汉，后首来又撤退到重庆。迭个阶段，国民革命军个部队勒各个战场侪总体失败，但依靠体量比较大个关系，还是让日本弗好彻底拿伊消灭。1941年太平洋战争爆发，蒋中正得到美国个帮忙，实力有一定恢复，但伊本人搭美国人派来个第五战区参谋长史迪威关系搭僵，对美国个观感，也比较一般。1945年，美国对日本战争获胜，蒋中正也顺带获胜，个也是伊威望个顶点。

戡乱战争

战后中华民国制定宪法，蒋当选行宪后第一任总统。勒第二次国共内战当中，因为交关原因，国民党军队勒东北地区、华北地区侪输把共产党，并且因此丧失大部分精锐部队。蒋中正只好第三趟下野，让李宗仁接替担任总统。弗过，下野之后个蒋中正，积极谋划跑到台湾。1949年4月，南京失守，李宗仁搭其余个部长跑到广州，弗过，无几天，交关人就到台北去拜见蒋介石哉。之后，李宗仁跑到美国弗回来，蒋介石就勒台湾重新上台，自称恢复自家职务，重新成为总统。

威权台湾

勒台湾，蒋仍旧以总统身份勒台上，并且勒老百姓当中，拼命打造自家个领袖形象，强制压迫台湾本地人、本地言语、本地历史记忆，强行推广长城长江为代表个中华民族大一统记忆。勒职务上，一脚到1975年过世，伊从来弗曾退位，弗过到晚年，有意识培养自家长子蒋经国接班。勒台湾个廿几年当中，蒋中正一直号称要反攻大陆、反共复国，但从来弗曾进行真正个大规模军事活动。

屋里

1927年12月1号，蒋中正搭第四房老婆宋美龄搞婚礼

蒋介石个屋里，是世代立在浙东明州府下头奉化县居住个吴越人。伊个爸爸叫做蒋肇聪，1895年死脱。妈妈叫做王采玉，1921年死脱。1901年，蒋中正立在妈妈个安排下头，搭毛福梅成亲，毛福梅是伊个原配。弗过，蒋讨厌迭个包办婚姻，对毛福梅也无多少感情。之后伊离开溪口镇后，毛福梅一直搭王太夫人合住。但毛福梅还是帮伊生下唯一个合法亲骨肉蒋经国。

1911年，蒋中正拿姚冶诚变成自家个侧室。弗过，让伊蹲在苏州，弗去奉化。迭个辰光，蒋立在日本。搭戴季陶关系密切。同时搭戴季陶个女伴重松金子也有过关系。重松帮戴季陶生下一个儿子。过继畀蒋中正。蒋拿迭个小孩交畀姚抚养，个就是后势来个蒋纬国。

1921年，蒋介石追求女学生陈洁如得手，就弗管之前个婚姻，铺开老大个场面，立在上海永安大楼举办大型婚宴，让张静江见证自家搭陈洁如个婚礼。弗过，之后，因为蒋中正个地位攀升，伊又想攀上新个家族，获得更加大个政治资本，个能。到1924年个辰光，伊开始自家追求宋美龄。到1927年，强行拿陈洁如送到美国。随后，立在自家下野个辰光，宣布搭宋美龄结婚。

1927年12月1号，蒋中正搭宋美龄立在上海结婚，同时搭之前个三个老婆侪离婚。按照宋家个要求，蒋还皈依基督教，成为基督徒。1930年10月受基督新教洗礼。

著作

蔣中正欢喜写日记，也写过一些其他材料，包括《西安半月記》、《中國之命運》，《蘇俄在中國》之类。

蔣介石日記

蔣介石日記是蒋中正所写日记个汇编，乃朝由美國史丹佛大學胡佛研究所圖書檔案館收藏，已允许研究人员阅览。

饮食

蒋介石欢喜吃个物事是鸡蛋搭鸡汤。蒋介石对鸡汤个欢喜是有名个。早浪吃饭侪会吃一碗温度蛮高个鸡汤。中餐搭晚餐也基本靠鸡汤调味。因为牙齿、肠胃侪弗灵光，蒋介石也欢喜吃芋头，伊欢喜吃鸡汁芋头，也欢喜吃芋头白菜搭芋头青菜。蒋介石吃肉老少，吃鸡蛋是解馋。也欢喜吃笋。欢喜油焖鲜笋，笋尖炒豆腐。立在水产当中，蒋介石欢喜吃西湖醋鱼搭宁波特有个一些海鲜。

外部連結

维基语录上有关个摘錄：

蔣中正

维基共享资源里向寻得着搭该篇文章搭界个多媒体资源：

蔣中正