Dmitri Medwedef
| Dmitri Medwedef (Дмитрий Медведев) | |
 | |
Eerste minister van Rusland
| |
| Ampstermyn 8 Mei 2012 – 16 Januarie 2020 | |
| President | Wladimir Poetin |
|---|---|
| Voorafgegaan deur | Wladimir Poetin |
| Opgevolg deur | Michail Misjoestin |
3de President van Rusland
| |
| Ampstermyn 7 Mei 2008 – 7 Mei 2012 | |
| Eerste minister | Wladimir Poetin |
| Voorafgegaan deur | Wladimir Poetin |
| Opgevolg deur | Wladimir Poetin |
Adjunkpremier van Rusland
| |
| Ampstermyn 14 November 2005 – 12 Mei 2008 dien saam met Sergei Iwanof | |
| Eerste minister | Michail Fratkof Wiktor Zoebkof Wladimir Poetin |
| Voorafgegaan deur | Betrekking geskep |
| Opgevolg deur | Wiktor Zoebkof Igor Sjoewalof |
Persoonlike besonderhede
| |
| Gebore | 14 September 1965 Leningrad, Sowjetunie (nou Sint Petersburg, Rusland) |
| Politieke party | Onafhanklik (Amptelik)[1] Beamings: Verenigde Rusland Regverdige Rusland Landbouparty Burgerlike Mag |
| Eggenoot/-note | Swetlana Wladimirowna Medwedewa (geb. Linnik) |
| Kind(ers) | Ilya Medwedef (geb. 1996) |
| Alma mater | Staatsuniversiteit van Leningrad |
| Professie | Regsgeleerde |
| Religie | Russies-Ortodoks[2] |
| Handtekening | 
|
Dmitri Anatoljewitsj Medwedef (Russies: ; gebore 14 September 1965) is ’n politikus van Rusland. Hy is op 7 Mei 2008 as president beëdig nadat hy die verkiesing van 2 Maart 2008 met sowat 70% van die stemme gewen het.
Nadat Wladimir Poetin die Russiese presidentsverkiesing van 4 Maart 2012 gewen het, is Medwedef aangewys as die volgende premier, ’n amp wat Poetin die vorige vier jaar beklee het. Medwedef het die amp tot in 2020 beklee.
Medwedef is in 1965 in Leningrad, tans Sint Petersburg gebore. Hy was voorheen eerste adjunkpremier saam met Sergei Iwanof. Hy is getroud en het ’n seun, Ilja.
Loopbaan
Medwedef behaal sy regsgraad in 1987 aan die Staatsuniversiteit van Sint Petersburg en in 1990 sy doktorsgraad in privaatreg. Van Junie 1991 tot Junie 1996 is hy ’n regsadviseur van die burgemeester van Sint Petersburg. Tegelykertyd is hy van 1991 tot 1999 dosent aan sy alma mater. In 1999 stel Wladimir Poetin hom aan as adjunkdirekteur van die presidentstaf. In 2000 word hy benoem tot president van die bestuursraad van Gazprom. Van 2000 tot 2001 is hy voorsitter van Gazprom. In Oktober 2003 vervang hy Aleksandr Wolosjin as presidensiële stafhoof.
Op 15 November 2005 stel Poetin hom aan as eerste adjunkpremier. Hy word in Januarie 2020 deur Michail Misjoestin vervang.
Politiek
Dimitri Medwedef word beskou as ’n gematigde liberale pragmatikus, ’n goeie administrateur, en nog altyd lojaal aan Poetin.
2008-presidentsverkiesing
Ná sy aanstelling as eerste adjunkpremier het talle politieke waarnemers voorspel dat hy benoem sal word as Poetin se opvolger vir die 2008-presidentsverkiesing. Poetin het hom dan ook op 10 Desember 2007 aangewys as die kandidaat wat hy steun. Op 17 Desember van daardie jaar is hy op die pro-Kremlin-party Verenigde Rusland se kongres amptelik benoem as hul kandidaat vir die verkiesing. Op 3 Maart 2008, terwyl die stemme getel is, het dit gou duidelik geword dat hy die verkiesing loshande gewen het. Sy naaste teenstander was die leier van die Kommunistiese Party, Gennadi Zioeganof, met 17,77% van die stemme, gevolg deur die Liberaal-Demokratiese Party se Wladimir Zjirinofski met 9,37% en die Demokratiese Party se Andrei Bogdanof met 1,29%. Die kiespersentasie was 69,5%.
Volgens meningspeilings vooraf het baie kiesers Medwedef gesteun omdat hy Poetin se keuse as opvolger was. In sy eerste toespraak ná sy benoeming het Medwedef gesê as hy president word, sal hy Poetin as eerste premier aanstel. Al kon Poetin nie vir ’n derde termyn verkies word as president nie, kan ’n premierskap hom in staat stel om nog lank die toon aan te gee in die Russiese politiek. (Hy kan dan ook later weer as president verkies word.) Sommige kenners meen Medwedef het daarmee erken dat hy slegs ’n skynhoof sal wees en dat die ware mag in Poetin se hande sal lê.
Terwyl die stemme getel is, het Poetin en Medwedef saam van die Kremlin na Rooiplein gestap, waar Medwedef aan ’n opgewonde skare gesê het: "Saam kan ons voortgaan op die pad wat pres. Poetin begin het. Saam sal ons wen. Hoera!"
Hy het ook gesê hy sal sy eie kop volg, ook in buitelandse beleid, ondanks sy voorneme om Poetin as eerste premier aan te stel. Die mag lê by die president en so sal dit bly, het hy bygevoeg.
2012-presidentsverkiesing
Op die kongres van Verenigde Rusland op 24 September 2011 in Moskou het Medwedef voorgestel dat Poetin, sy voormalige mentor, in die presidentsverkiesing van 4 Maart 2012 staan, en Poetin het die aanbod aanvaar. Poetin het dadelik voorgestel dat Medwedef Verenigde Rusland se kandidaat vir die amp van eerste minister moet wees.[3]
In die verkiesing het Poetin met 63,6 persent van die stemme gewen. Hy is daarmee verkies vir die nuwe, verlengde termyn van ses jaar. Medwedef het gevolglik van 2008 tot 2012 in die presidentsamp gestaan.[4]
Russiese inval in Oekraïne
- Die hoofartikel vir hierdie afdeling is: Russiese inval in Oekraïne, 2022.
Op 17 Maart, kort na die Russiese inval Oekraïne, het Medwedef as adjunksekretaris van Rusland se Veiligheidsraad gesê dat die Verenigde State 'n walglike Russofobie aangewakker het in 'n poging om Rusland op sy knieë te dwing. Die Weste is daarvan beskuldig dat hulle die wilde komplot aanstook om Rusland uitmekaar te skeur. Die Verenigde State inbesonder is gewaarsku dat Moskou die mag het om die brutale supermoondheid op hul plek te sit, en dat die Russe ondanks sanksies goed kan vaar sonder wat hulle as 'n bedrieglike en dekadente Weste onder die leiding van die Verenigde State beskou.[4]
Na die inval het die Verenigde State en sy Europese en Asiatiese bondgenote sanksies teen Russiese leiers, maatskappye en sakemanne toegepas, in 'n poging om Rusland van 'n belangrike segment van die wêreldekonomie af te sny. Russiese pogings om bande met die Weste te smee ná die val van die Sowjetunie in 1991 is laat vaar, en daar is op beter betrekkinge met ander moondhede insluitend China gefokus.[4]
Persoonlike lewe
Dmitri Medwedef en sy vrou, Swetlana Wladimirowna Medwedewa, gebore Linnik, is van kleins af vriende en sy was ook sy skoolliefde. Hulle is getroud ’n paar jaar nadat hulle hul hoërskoolloopbane in 1982 voltooi het. Hul seun, Ilja, is in 1996 gebore. Medwedef is die skrywer en medeskrywer van verskeie regsboeke.
Verwysings
- ↑ Eerste Adjunk Eerste Minister Dmitri Medwedef goedgekeur vir volgende Presidentsamp Geargiveer 2 Junie 2009 op Wayback Machine, Voice of Russia, 10 Desember 2007.
- ↑ BBC NEWS | World | Europe | Profile: Dmitry Medvedev
- ↑ "Russia's Putin set to return as president in 2012". BBC News (in Engels). 24 September 2011. Geargiveer vanaf die oorspronklike op 3 Januarie 2020. Besoek op 24 September 2011.
- ↑ 4,0 4,1 4,2 "Russia warns United States: we have the might to put you in your place". news24.com. Reuters. 17 Maart 2022. Besoek op 24 Maart 2022.
Bronne
- Levy, Clifford J. (11 Desember 2007) Putin Backs a Young Loyalist As Hic Choice to Follow Him. The New York Times. New York, New York
- White, Gregory L.; Osborn, Andrew; Cullison, Alan (11 Desember 2007) Putin Chooses Young Loyalist As Successor. The Wall Street Journal, New York, New York.
- Umland, Andreas (17 Desember 2007) The Two Towers of Future Russia: The Rise of Dmiry Medvedev and the Re-Configuration of Post-Soviet Politics. Russia Profile. Moscow. [1]
Eksterne skakels
- Gazprom se proefoel van Medwedef Geargiveer 11 Januarie 2008 op Wayback Machine
- Heir to Russia Inc mixes ruthlessness with diplomacy deur Quentin Peel[dooie skakel] Financial Times 11 Desember 2007
- Peter Lavelle, "UT’s “Operation Successor 2008” Project: Is Dmitry Medvedev the one?" Geargiveer 13 Desember 2007 op Wayback Machine, Untimely Thoughts, 9 Oktober 2005.
- J. Bernstein, Dmitrii Medvedev: Compromise In The Kremlin Geargiveer 10 Januarie 2008 op Wayback Machine
- A cautious welcome in Europe for Medvedev, deur Stephen Castle, IHT, 11 Desember 2007
Wikimedia Commons het meer media in die kategorie Dmitri Medwedef.
Normdata  |
|
|---|