Vlag van Angola

Vlag van Angola

Vlag van Angola
Gebruik	Nasionale vlag en vaandel
Verhouding	2:3
Goedgekeur	11 November 1975
Ontwerp	’n Horisontale tweekleurige vlag in rooi en swart en ’n geel tandrat-kapmes-ster-motief in die middel van die vlag.

Die nasionale vlag van Angola is op 11 November 1975 in gebruik geneem met Angola se onafhanklikheid. Die vlag vertoon ’n horisontale tweekleur met ewe wye bane in rooi (bo) en swart (onder) met ’n tandrat-kapmes-ster-motief in die middel van die vlag.

Simboliek

Rooi verteenwoordig die bloed van die Angolese wat gevloei het in hul stryd om onafhanklikheid; die swart verteenwoordig die Afrika-kontinent. Die simbool in die middel is van ’n tandrat (wat werkers en industrieë verteenwoordig) en ’n kapmes (wat die landelike bevolking verteenwoordig) met ’n goue ster. Dit is aanvaar gedurende die tyd toe Angola ’n Marxistiese regering gehad het, en was veronderstel om die beeld van die hamer en sekel, ’n algemene simbool van kommunisme in die vlag van die Sowjetunie is, na te aap. Die mees resente beskrywing en verduideliking van die vlag is in artikel 162 van die Grondwetlike Wet van die Republiek van Angola (Grondwet) van 25 Augustus 1992.

Ontwerp

Soos in verskeie ander Afrikalande is hierdie vlag ’n verwerkte weergawe van die vlag van die regerende party. Die guerillabeweging en later regerende party, die Movimento Popular de Libertação de Angola (Volksbeweging vir die Bevryding van Angola of MPLA), het dieselfde ontwerp gebruik met ’n goue ster in die middel van die vlag. Rooi het gestaan vir sosialisme en swart vir Afrika. Die ster is gebaseer op die rooi ster van die Sowjetunie, wat die borg vir die MPLA was.

Kleure

Wapperende vlag van Angola

Die kleurskema word hieronder gelys:

	Rooi	Goud	Swart
RGB	239–42–0	254–254–4	0–0–0
Heksadesimaal	EF2A00	FEFE04	000000
CMYK	0–82.43–100–6.27	0–0–98.43–0.39	0–0–0–100
Pantone	485 C	803 C	Swart 6 C

Ander vlae

• 
  Voorgestelde vlag vir Portugees-Oos-Afrika, nooit gebruik nie
• 
  Vlag van die voormalige guerillabeweging en nou regerende party MPLA
• 
  Vlag van Unita, 'n rebelbeweging wat vanaf 1975 tot 2002 teen die MPLA-regering geveg het
• 
  Voorgestelde vlag vir Angola (1996)
• 
  Presidentsvlag van Angola
• 
  Voorgestelde vlag vir Angola in 2003

2003-voorstel

In 2003 is ’n nuwe, meer “optimistiese” vlag voorgestel deur die Grondwetlike Kommissie van die Nasionale Vergadering van die Angolese Parlement, wat nog nie aanvaar is nie. Die son-ontwerp in die middel is veronderstel om rotstekeninge wat in die Tchitundo-Hulugrot in herinnering te roep. Hoewel die ontwerp en simboliek van die vlag radikaal verskil van die huidige een is die verhoudinge (2:3) steeds dieselfde. Baie Angolese hou nie van die nuwe ontwerp nie omdat hulle voel dit dra geen betekenis nie, waar die huidige vlag duidelike historiese verbintenisse het. Ander meen ook dat die voorgestelde vlag nie uniek tot Angola is nie omdat dit basies dieselfde lyk as die vlae van Costa Rica en Noord-Korea.

Eksterne skakels

• (en) Angola by Flags of the World
• (en) http://www.angola.org/referenc/proposed_flag.html Geargiveer 22 Junie 2004 op Wayback Machine
• (en) "Flag of Angola". Encyclopædia Britannica. Besoek op 14 Mei 2019.