S Hormonsüsteem
1 Zirbeldrüese
2 Hüpofüüse
3 Schilddrüese und d Nääbeschildrüese
4 Thymus
5 Nääbeniere
6 Pankreas
7 Ovar
8 Hoode
S Hormonsüsteem stüürt und reglet über Hormon underschidligi Stoffwäggselvorgäng und Organfunkzione im Körper vom ene meerzällige Organismus. Hormon si chemischi Bootestoff, wo ummiddelbar uf Nochberzälle parakrin iiwirke oder iiri Ziilzälle erräiche, nochdäm si endokrin in dr Bluetkräislauf abgee worde si.
Zum endokrine Süsteem (griech. ἔνδον endon ‚inne‘; κρίνειν krinein ‚drenne, absondere‘) ghööre näbe de verschiidene endokrine Drüese au endokrini Zälle, wo verströit im Härz, de Niere, dr Lääbere, im Maagedarmdrakt, Thymus, ZNS und andere Organe vorchömme.
D Hormon als extrazelluläri Signalstoff wirke nume über spezifischi Hormonrezeptore in dr Zällmembrane oder im Zytosol von ere Zälle, und vo dene wird s Signal in Effekt übersetzt, wo tüpisch für die Zälle isch.
Chrankhäite vom Hormonsüsteem bzw. Endokrinopathie beschäftige s medizinische Fachgebiet vo dr Endokrinologii.
Die endokrine Drüese
[ändere | Quälltäxt bearbeite]Zu de endokrine Drüese ghööre:
- dr Hypothalamus, wo d Hüpofüüse kontrolliert
- d Hüpofüüse (Hypophysis oder Glandula pituitaria), wo dr grösst Däil vom Hormonsüsteem kontrolliert.
- d Zirbeldrüese (Epiphysis cerebri, Epiphyse, Glandula pinealis) broduziert Melatonin und reeglet drmit dr Schloof-Wach-Rhüthmus.
- d Schilddrüese (Glandula thyroidea), wo für e Energiiumsatz vo de Zälle und für d Äiwissbrodukzion zueständig isch.
- d Nääbeschilddrüese (Epithelkörperli, Glandula parathyroidea), wo mit Parathormon dr Calciumhushalt vom Körper reguliert.
- d Nääbeniere (Glandula adrenalis oder Glandula suprarenalis) schüttet in Situazioone vo Gfoor und Stress Adrenalin und Noradrenalin us, zum d Reakzione vom Körper z beschlöinige.
- die Langerhansche Insle (Inselorgan, Insulae pancreaticae) in dr Buuchspäicheldrüese broduziere Insulin und Glucagon und reguliere eso dr Bluetzuckerspiegel.
- d Hoode und d Äierstöck broduziere d Gschlächtshormon, wo under anderem für d Gschlächtsmerggmol verantwortlig si.
|
Dä Artikel basiert uff ere fräie Übersetzig vum Artikel „Hormonsystem“ vu de dütsche Wikipedia. E Liste vu de Autore un Versione isch do z finde. |