Max Havelaar (Roman)
„Max Havelaar oder die Kaffeeversteigerungen der Niederländischen Handels-Gesellschaft“ isch dr Titel vom ene Buech, wo dr holändisch Schriftsteller Eduard Douwes Dekker under em Pseudonym Multatuli gschriben und usegää het.
Uf Holändisch heisst s Buech Max Havelaar of de koffij-veilingen der Nederlandsche Handelsmaatschappij.
Es isch e Roman, wo i dr Raamehandlig verzellt wird, es sig en Chauffme z Amsterdam gsi, dää heig Droogstoppel gheisse, und zu däm sig öpper choo, ass er iim hälfi es Manuskript trucke. I däm Entwurf isch d Gschicht vom ene holändische Kolonialbeamte beschribe gsii, wo Max Havelaar gheisse heig und für d Holänder uf dr Insle Java sig go gschaffe.
Es isch e kritische Bricht vo dr holändische Kolonialzyt. S Buech isch z Holand ganz populäär worde. Me het s es paar Mol nöi truckt und au i verschidene Fassigen is Dütschen übertreit. Di nöischti düütschi Übersetzig isch z Berlin als Ullstein Taschebuech usecho anne 1997 (ISBN 3-548-24166-2). D Gschicht isch anne 1976 au verfilmt worde.
Vo dr fiktyve Figuur vom Max Havelaar chunt dr Name von es paar modärnen Organisazioone, wo füre fair Handel uf dr Wält luege, so wie öppe di schwiizerischi Max-Havelaar-Stiftig.