Ramiro de Maeztu
Ramiro de Maeztu y Whitney (4 de mayu de 1874, Vitoria – 29 d'ochobre de 1936, Aravaca), primer conde de Maeztu, foi un diplomáticu y destacáu escritor español perteneciente a la Xeneración del 98, asesináu en 1936 al comenzar la Guerra Civil Española, nel cursu d'una de les saques que les fuercies republicanes efectuaron nel Madrid posterior al pronunciamientu militar del 17 y 18 de xunetu.
Biografía
[editar | editar la fonte]Foi fíu del inxenieru Manuel de Maeztu Rodríguez, un ‘'hacendado cubán d'orixe navarru que conoció a la so madre, Juana Whitney, fía d'un diplomáticu inglés, en París, y cola que se casó cuando ella tenía dieciséis años (nunca se casaron y eso xeneró ciertos problemes cola inscripción nel rexistru civil de dalgunos de los sos fíos). Estableciéronse en Vitoria. Pronto quedóse güerfanu de padre y en 1894 se funden los negocios de la so familia en Cuba por confusos problemes alministrativos (el padre, Manuel, vivía de los negocios derivaos de la pertenencia de Cuba a España; la independencia de Cuba acabó coles sos actividaes). Pa poder faer frente a la repentina viudez y a las necesidaes de los sos fíos, la so madre Juana marchó a Bilbao. Tuvo amás cuatro hermanos: Ángela, Miguel, la pedagoga María de Maeztu y el pintor Gustavo de Maeztu.
Pasó parte de la so xuventú en París y en La Habana dedicáu a oficios diversos ya inicióse nel periodismu. Autodidacta y d'idees combatives, trasladóse a Madrid en 1897, un fechu decisivu na so vida lliteraria, yá qu'inició entonces una collaboración importante con distintos periódicos y revistes, como Germinal, El País: diario republicano y progresista (editáu de 1887 a 1921), Vida Nueva, La España Moderna o El Socialista, ente otros, con una orientación socialista reformista. Nesos años tamién dio iniciu a la so amistá con rexeneracionistes ya intelectuales, especialmente con Azorín y Baroja, con quienes formó'l grupu conocíu baxo'l nome de «Grupo de los Tres» y foi un esponente destacáu de la llamada Xeneración del 98. Nes sos collaboraciones de prensa, agrupaes en bona parte nel so llibru Hacia otra España, esamina les causes de la decadencia española, fai una crítica mui dura de la vida nacional y propón una renovación d'estilu europeísta.
De 1905 a 1919 residió en Londres, en Bayswater, onde trabayó como corresponsal pa La Correspondencia de España, Nuevo Mundo y Heraldo de Madrid. Viaxó per Francia y Alemaña y estuvo como corresponsal de guerra n'Italia (1914–1915). Esti periodu representa la so fase lliberal y d'admiración a les instituciones britániques, ocupando la so atención en numberoses disciplines (filosofía, política, lliteratura, etc.) l'actualidad de la cual acercaba al públicu español. Publica n'inglés Authority, Liberty and Function in the Light of the War (1916), apaecíu en castellán como La crisis del humanismo, onde esamina los conceutos d'autoridá y llibertá na sociedá moderna.
Tres el so regresu a España, en 1919, comienza la so desconfianza na democracia lliberal y va cuayando la so evolución facía lo tradicionalista católico, que se consumó mientres la Dictadura de Primo de Rivera, a la qu'aceptó representar como embaxador n'Arxentina (1928). Ellí tuvo ocasión de tratar con Zacarías de Vizcarra, l'introductor en 1926 de la idea de la «hispanidá» (que propunxo como sustitutu del espuriu términu raza), que Maeztu asumió como propio y dempués abanderó. Nesos años caltién el so conceutu de decadencia, esencial na actitú intelectual de los homes del 98, ya intensifica la so defensa de los valores católicos y de les tradiciones hispániques.
Dende los díes previos a la proclamación de la Segunda República Española collaboró nel movimientu y la revista Aición Española (qu'él propunxo denominar Hispanidad), escribiendo tamién la presentación de la mesma, que se publicó ensin firma, y mereció'l Premiu Luca de Tena dau pol diariu ABC. Dende'l númberu 28 de la revista, Maeztu figuró formalmente como'l so direutor, y foilo hasta l'últimu númberu, el de xunu de 1936.
Nesta última fase'l so ideariu intensifica la so rellación col vieyu troncu de pensamientu tradicionalista español (Donoso Cortés, Menéndez Pelayo, etc.), y caltién afinidaes colos teóricos del Integralismu Lusitán. Esti ideariu en pro de la civilización hispánica y católica, desarrolláu nos sos artículos publicaos en Aición Española, foi recoyíu nel so llibru Defensa de la Hispanidad, que se convirtió na so obra más influyente y en esponente de la so doctrina universalista. Terminó militando en Renovación Española, partíu políticu dende'l que se significó pola so oposición al réxime de la República, del que foi diputáu nes Cortes por Guipúzcoa (1933–1935).
Al iniciu de la Guerra Civil Española foi deteníu polos milicianos republicanos. Tres ser encarceláu, na madrileña cárcel de Ventas el 30 de xunetu de 1936, foi fusiláu nel cementeriu d'Aravaca'l 29 d'octubre de 1936, víctima d'una de les saques (trasllaos o execuciones de presos) qu'ocurrieron mientres la Guerra Civil. Les sos postreres pallabres, se diz que dixo, foron:[9]
Vosotros no sabéis por qué me matáis, pero yo sí sé por lo que muero: ¡Para que vuestros hijos sean mejores que vosotros!
Vós nun sabéis por qué me matáis, pero yo sí sé polo que muero: ¡Pa que vuesos fíos sían meyores que vós!
En 2011 el Conceyo de Madrid colocó una placa na casa en que vivió hasta la so muerte situada na cai Espalter, 13.
Obres
[editar | editar la fonte]Anque Maeztu escribió aislladamente poesía, dalgún cuentu, una novela (La guerra del Transvaal) y una obra de teatru inédita (El sindicato de las esmeraldas), la so tarea foi básicamente la d'un periodista que pon la so prosa al serviciu d'unes idees. Dalgunos de los sos artículos foron recoxíos en llibros, anque non toos: Hacia otra España (1899), La crisis del humanismo (1919), Defensa de la Hispanidad (1934) y Defensa del Espíritu (póstuma). D'ésta postrera, por cierto, perdiéronse dalgunos fragmentos mientres el so cautiveriu, posiblemente refugaos polos milicianos republicanos. Maeztu pensaba realizar una Defensa de la Monarquía, que dexó ensin realizar. Con esti plan pensaba axuntar nes sos trés defenses, una defensa de Dios, una de la patria y otra del rei.
Entre los sos ensayos de carácter lliterariu, cabo mentar Don Quijote, don Juan y la Celestina (1926) —una meditación sobro de Don Quixote como héroe d'una España decadente, de Don Xuan como vacíu espiritual y de la Celestina como degradación— y La brevedad de la vida en la poesía lírica española (1935), pronunciáu como discursu d'ingreso na Real Academia Española.
Referencies
[editar | editar la fonte]- ↑ 1,0 1,1 1,2 1,3 1,4 1,5 1,6 Afirmao en: Hombres y documentos de la filosofía española: volumen 5. Sección, versículu o párrafu: MAEZTU WHITNEY, Ramiro. Páxina: 69–74. Editorial: Conseyu Superior d'Investigaciones Científiques. Llingua de la obra o nome: castellanu. Data d'espublización: 1995. Autor: Gonzalo Díaz Díaz.
- ↑ URL de la referencia: https://datos.gob.es/es/catalogo/e00123904-autores-espanoles-en-dominio-publico-fallecidos-desde-1900.
- ↑ URL de la referencia: https://books.google.es/books?id=BdW5apG6MHAC&pg=PA955. Data de consulta: 26 ochobre 2019.
- ↑ Afirmao en: autoridaes BNF. Identificador BnF: 121553627. Data de consulta: 10 ochobre 2015. Autor: Biblioteca Nacional de Francia. Llingua de la obra o nome: francés.
- ↑ URL de la referencia: http://hemeroteca.sevilla.abc.es/nav/Navigate.exe/hemeroteca/sevilla/abc.sevilla/1934/05/05/030.html. Data de consulta: 13 xunetu 2017.
- ↑ «Los amigos de Portugal». ABC Madrid: páxs. 27. 23 abril 1922.
- ↑ URL de la referencia: http://riubu.ubu.es/bitstream/10259.4/1538/1/0211-8998_n183_p370-381.pdf. Páxina: 372.
- ↑ Afirmao en: Contrarrevolucionarios. Radicalización violenta de las derechas durante la Segunda República, 1931-1936. Páxina: 57. Editorial: Alianza Editorial. Llingua de la obra o nome: castellanu. Data d'espublización: 2011. Autor: Eduardo González Calleja.
- ↑ «El combatiente deslumbrado», por Manuel Vicent en Babelia, suplemento literario de El País, 18/08/2012.
Enllaces esternos
[editar | editar la fonte]- Biografía de Ramiro de Maeztu
- Otra biografía del autor
- Artículos en la revista Aición Española
- Texto de la Defensa de la Hispanidad
- En Obras digitalizadas de Ramiro de Maeztu en la Biblioteca Digital Hispánica de la Biblioteca Nacional de España
| Control d'autoridaes |
|
|---|
Datos: Q1340223
Multimedia: Ramiro de Maeztu
Cites famoses: Ramiro de Maeztu
Testos: Autor:Ramiro de Maeztu
- Homes
- Persones nacíes en 1875
- Persones finaes en 1936
- Académicos de la Real Academia Española
- Escritores d'España
- Escritores en castellanu
- Embaxadores d'España
- Escritores del País Vascu
- Vitorianos
- Rexeneracionismu
- Monárquicos d'España
- Anticomunistes d'España
- Políticos y polítiques de Renovación Española
- Persones de Vitoria