Rusio kaj Ukrainio interŝanĝis arestitojn
|
 |
Lundo, la 9-a de septembro 2019
La 7-an de septembro finiĝis la interŝanĝo de detenitaj personoj inter Rusio kaj Ukrainio. La landoj interŝanĝis po 35 personojn, inter kiuj estis 24 ukrainaj maristoj, malliberigitaj post konfrontiĝo de rusiaj kaj ukrainaj ŝipoj en Kerĉa markolo okazinta la 25-an de novembro 2018 kaj la krimea reĝisoro Oleg Sencov, kondamnita de rusia juĝejo en 2015 je 20 jaroj da malliberigo pro akuzoj pri terorismo. Unuafoje la ukrainaj politikistoj informis pri la kvazaŭ okazinta interŝanĝo la 30-an de aŭgusto, sed samtage la prezidanto de Ukrainio Volodimir Zelenskij refutis la aferon kiel ankoraŭ ne finitan.
Ĉiuj personoj, liberigitaj de la rusia flanko, estis civitanoj de Ukrainio (Oleg Sencov, laŭ la rusia leĝaro, estis konsiderata kiel aŭtomate transirinta al la rusia civitaneco, dum li mem kontestis tion). Duono de la personoj, liberigitaj de Ukrainio, ankaŭ estis civitanoj de Ukrainio. Inter ili estis la opozicia ĵurnalisto Kirill Viŝinskij, akuzita pri ŝtata perfido, kio kaŭzis protestojn de internaciaj homrajtaj kaj ĵurnalismaj organizaĵoj. Krome estis liberigita Vladimir Cemaĥ, ukraina civitano, militisto de la neagnoskita Donecka Popola Respubliko. La 27-an de junio li estis kaptita de la ukraina sekurecservo, senkonciigita per narkotikaĵoj kaj transportita al Kievo, kie oni akuzis lin esti komandestro de kontraŭaviadila trupo, kiu en 2014 paffaligis la aviadilon de Malaysia Airlines. Plejparto de la ukrainaj detenitoj estis akuzitaj pri spionado por Rusio aŭ sabotado kaj batalado kontraŭ la Ukraina armeo dum la Donbasa milito.
Fontoj
([[Lingvo ruse|ruse]]) «Россия и Украина все-таки обменялись заключенными Олег Сенцов — уже в Киеве, Кирилл Вышинский — в Москве» – [[Meduza]], 2019-09-07 (arkivita [ ]) [[Kategorio:Artikoloj kun informo de Meduza]] ([[Lingvo ruse|ruse]]) «Кто участвовал в обмене между Москвой и Киевом Списки бывших заключенных» – [[Meduza]], 2019-09-07 (arkivita [ ]) [[Kategorio:Artikoloj kun informo de Meduza]]
|
Vi povas disvastigi ĉi-tiun artikolon per Interkonaj retejoj |
|
|
|
|
 |
Ĉi tiu artikolo estas pli ol sep tagojn malnova. Ĝi estas arĥivita kaj ne povas esti redaktata plu. Artikoloj en la arĥivo de Vikinovaĵoj spegulas la specifan momenton de sia publikiĝo, kaj ne celas inkluzivi pli novan informon nek eventojn poste okazintajn. Arĥivitaj artikoloj povas esti redaktitaj nur okaze de etaj eraroj nerilataj al la enhavo (ekz. misa ortografio aŭ interpunkcio). Por peti korekton, bonvole lasu mesaĝon sur la diskutpaĝo. |