Gastritis
 | Tink derom dat de Wikipedy gjin medyske konsultaasje jout! |
Gastritis is in ûntstekking fan it mageslymflues. De ûntstekking kin de beskermjende wurking fan it mageslym ferminderje, wêrtroch't it maachsoer en fertarringsenzymen it maachflues oantaaste kinne. Gastritis jout in baarnderich gefoel, it 'soer' hawwe.
Ferskaat oan faktoaren kinne in gastritis jaan, de wichtichste binne:
- Ynfeksjes, faak troch de baktearje Helicobacter pylori dy't by in soad minsken yn de mage húsmannet en ien fan mar in pear baktearjes is dy't maachsoer (sâltsoer) ferneare kinne.
- Skansearring troch gemikaliën en medisinen (NSAID's).
- Hommelse stressreaksjes
- Ymmunologyske oandwanings
Gastritis jout meast net in protte klachten, mar kin op 'e lange doer slimme gefolgen hawwe lykas in maachswolm of in swolm yn it duodenum, mar ek maachkanker.
Behanneling
[bewurkje seksje | boarne bewurkje]In mylde gastritis kin faak goed behanne wurde mei in soerbiner. At dat net genôch helpt kinne H2 blokkearders en fral protonpomprimmers de maachsoerproduksje foldwaande ferminderje om de ûntstekking de baas te wurden en komplikaasjes te foarkommen.
At NSAIDs geregeldwei brûkt wurde moatte, wurde dy medisinen meast al previntyf foarskreaun om de mage te beskermjen.
At Heliobacter pylori de ynfeksje feroarsaket wurdt in antibiotikum tagelyk mei in protonpomprimmer foarskreaun.