Suður-Holland
| Fáni Suður-Hollands | Skjaldarmerki Suður-Hollands |
|---|---|
 |
|
| Upplýsingar | |
| Höfuðborg: | Haag |
| Flatarmál: | 3.418,50 km² |
| Mannfjöldi: | 3.576.359 |
| Þéttleiki byggðar: | 1.271/km² |
| Vefsíða: | [1][óvirkur tengill] |
| Lega | |
| |
Suður-Holland (hollenska: Zuid-Holland) er fylki í Hollandi. Þar eru nokkrar af stærstu borgum landsins og er fylkið bæði það fjölmennasta og þéttbýlasta í Hollandi. Það liggur nær allt neðan sjávarmáls.
Lega og lýsing
[breyta | breyta frumkóða]Suður-Holland liggur við Norðursjó nær vestast í Hollandi. Stóru árnar Lek, Waal (aðalkvíslar Rínarfljóts) og Maas renna þar til sjávar. Önnur héruð sem að Suður-Hollandi liggja eru Norður-Holland fyrir norðan, Utrecht fyrir norðaustan, Gelderland fyrir austan, Norður-Brabant fyrir suðaustan og Sjáland fyrir sunnan. Íbúar eru 3,4 milljónir talsins og er Suður-Holland þar með fjölmennasta fylkið í Hollandi. Þar eru stórborgir eins og Rotterdam og Haag. Sú síðarnefnda er höfuðborg fylkisins.
Fáni og skjaldarmerki
[breyta | breyta frumkóða]Skjaldarmerki Suður-Hollands sýnir rautt ljón með bláar klær og tungu á gulum grunni. Ljónið hefur verið merki greifanna af Hollandi síðan á 12. öld. Fylkið Holland skiptist í norður og suður 1840. Það var þó ekki fyrr en 30. desember 1959 að Júlíana drottning veitti fylkinu nýtt skjaldarmerki. Fáninn var ekki tekinn upp fyrr en 1. janúar 1986 og er sniðinn eftir fyrirmynd skjaldarmerkisins.
Orðsifjar
[breyta | breyta frumkóða]Holland hét upphaflega Holtland (eða Holtlant), sem merkir skógarland. Það var ekki fyrr en 1840 að fylkið Holland skiptist í tvennt, þ.e. í Norður-Holland og Suður-Holland, og voru heitin smíðuð á því ári.
Söguágrip
[breyta | breyta frumkóða]Í gegnum aldirnar var fylkið Holland eitt fremsta og auðugasta fylki Niðurlanda og var stjórnað af greifunum af Hollandi. Í sjálfstæðisbaráttu landsins á 16. og 17. öld hafði fylkið sig hvað mest frammi. Það var að sama skapi stærsta fylki landsins þegar Holland varð að sjálfstæðu ríki. Þetta varð til þess að heiti fylkisins var gjarnan notað fyrir landið allt. Þegar Frakkar hertóku Holland 1795, skiptu þeir fylkinu í fimm einingar (département). En 1807 var þessum einingum breytt í tvö svæði. Norðurhlutinn kallaðist Amstelland og suðurhlutinn Maasland. Þegar Frakkar hurfu úr Niðurlöndum 1813 voru hlutarnir sameinaðir aftur en yfir þá voru settir tveir ríkisstjórar, einn fyrir norðursvæðið og hinn fyrir suðursvæðið. Þegar stjórnarskrá landsins var endurnýjuð 1840 var ákveðið að aðgreina svæðin varanlega. Þannig mynduðust Norður-Holland með Haarlem að höfuðborg og Suður-Holland með Haag að höfuðborg.
Borgir
[breyta | breyta frumkóða]Stærstu borgir Suður-Hollands:
| Röð | Borg | Íbúar | Ath. |
|---|---|---|---|
| 1 | Rotterdam | 618 þúsund | Næststærsta borg Hollands |
| 2 | Haag | 508 þúsund | Höfuðborg fylkisins |
| 3 | Zoetermeer | 124 þúsund | |
| 4 | Leiden | 121 þúsund | |
| 5 | Dordrecht | 119 þúsund | |
| 6 | Alphen aan den Rijn | 107 þúsund | |
| 7 | Westland | 103 þúsund | |
| 8 | Delft | 100 þúsund | |
| 9 | Schiedam | 76 þúsund | |
| 10 | Spijkenisse | 73 þúsund | |
| 11 | Leidschendam-Voorburg | 73 þúsund | |
| 12 | Vlaardingen | 71 þúsund | |
| 13 | Gouda | 71 þúsund |
Heimildir
[breyta | breyta frumkóða]Fyrirmynd greinarinnar var „Zuid-Holland“ á hollensku útgáfu Wikipedia. Sótt 30. ágúst 2011.
