NHA namigay ng bahay sa 85 pamilya sa Bukidnon
IPINAMAHAGI ng National Housing Authority (NHA) ang 85 pabahay sa mga kwalipikadong pamilya na naapektuhan ng mga infrastructure projects, partikular ng Bukidnon Airport Development Project sa Don Carlos, Bukidnon, noong Enero 24.
Pinangunahan ni NHA General Manager Joeben Tai kasama si Region X Manager Madeleine Gilda Abellera ang seremonya ng turnover ng mga yunit sa Don Carlos Village Phase II.
Sa kabuuan, 126 na pabahay ang itinayo sa lugar na binubuo ng 41 sa Don Carlos Phase I at iginawad sa mga kwalipikadong benepisyaryo at 85 naman sa Don Carlos Phase II.
Kasama ni GM Tai si Sen. Juan Miguel Zubiri at ang kanyang maybahay, Audrey Tan Zubiri na naglaan ng pondo para sa konstruksyon ng proyekto.
Nakibahagi din sa okasyon sina Don Carlos Mayor Ma. Victoria Ontanillas-Pizarro at Quezon, Bukidnon Mayor Pablo Lorenzo.
Bukod sa turnover, namahagi rin ang NHA ng tig-P20,000 sa 12 pamilya na naapektuhan ang mga bahay ng baha at sunog sa ilalim ng Emergency Housing Assistance Program (EHAP).
Ang programang ito naglalayong tulungan ang mga benepisyaryo na makapagsimula muli at maipatayo ang kanilang mga bahay.
Samantala, tatlong dating miyembro ng Kapatiran ang binigyan ng Certificate of Award, matapos maipatayo ang kanilang mga tahanan gamit ang P450,000 financial assistance sa ilalim ng Resettlement Assistance for Former Rebels Program ng NHA.
Bahagi ang inisyatibong ito ng Enhanced Comprehensive Local Integration Program (E-CLIP) na naglalayong magbigay ng suporta sa mga dating rebelde na nagdesisyong magbalik-loob sa lipunan at talikuran ang armadong pakikibaka.
