Mahomm

Mahomm (po محمد, Muhammad, yn arabek) yw an diwettha ha moyha profos a Islam. Genys y'n vledhen 570 OK, moy po le, yn Mekka, Arabi, ev a gavas y gynsa hunros dhyworth an el Gabriel yn 610, herwydh hwedhel hengovek y vywnans. Gabriel a'n erghis kovhe ha dythya an gwersyow a wra hedhyw an Koran, lyver sans a Voslemyon. Yn 622 y eskerens a'n fesyas a-dhyworth Mekka, mes Mahomm a wrug kres gordhyans nowydh yn Medina. A-dhyworth Medina, Mahomm a unyas Arabi oll yn-dann vaner Islam. Y ferwis ev yn 632 yn Medina, Arabi.

Yn Europa y'n Osow Kres, Kristonyon a dhispresyas Mahomm avel arwodh a 'dhiskryjyans' an Sarsyns. Yn lyenn an oes ma, yma tus pagan ow kordhya Mahomm war-barth gans Satnas avel duwow. Y'n fordh ma, Mahomm yw gordhys gans an arlodh Tewdar yn Bywnans Meryasek. Byttegyns, nyns usi Moslemyon ow kordhya Mahomm dhe wir – enorys yw ev unweyth avel "sel an brofosi".