Morfolojia

Morfolojia es la studia de la morfemes en un lingua. Morfemes es parolas, radises, e afisas, la unias la plu simple de lingua, un nivel plu alta ca la fonemes. An si los es comun videda como unias de sinifia, los es plu bon videda como un parte de la sintatica de un lingua.

Lo es en sua morfolojia ce nos pote vide plu clar la diferes entre linguas cual es isolinte (como xines, indonesian, creol, etc), los cual es aglutinante (como turces, suomi, tamil, etc), e los cual es infletante (como rusce, latina, arabi, etc). Linguas isolinte usa morfemes gramatical cual es parolas individua. Linguas aglutinante usa morfemes gramatical en la forma de silabas liada a radises, pd afisas. Linguas infletante pote estende un paso plu e cambia la parola a la nivel de fonemes per espresa morfemes gramatical

Tota linguas ave vera sistemes miscada, e difere plu en la proportios. Engles, per esemplo, usa tota tre metodos: Per la tempo futur de un verbo, on usa la paroleta "will" (pe "I will see you"); per la tempo pasada, on usa normal la afisa "-ed" ("I changed it"); ma en multe parolas, on cambia la fonemes de la parola per la pasada ("I see" deveni "I saw"). Regardante nomes, a alga veses on crea la plural con un paroleta ("three head of cattle"), a otra veses on usa un afisa ("three cats"), e a otra veses plu, on cambia la parola ("one man" deveni "three men"). Ma, car on usa multe afisas nonsilabal (como "-ed", pronunsiada como d o t, e "-s", pronunsiada como s o z, engles es plu comun videda como un lingua infletante par linguistes.

Afisas

La plu de linguas, ma spesial la linguas aglutinante e infletante, difere entre la radis de la parola, cual porta la sinifia fundal, e la afisas variosa o otra ajuntas cual porta plu sinifias, comun gramatical. On ave alga tipos de afisas:

Sufisas es ajuntada a la fini de la radis;

Prefisas es ajuntada a la comensa de la radis;

Infisas es poneda en la media de la radis;

Ablaut es un cambia de un vocal;

Redupli es la dupli de un silaba.

Sufisas es la plu comun, e engles usa los. Per esemplo, engles usa -ed per la pasada per la plu de verbos, la partisipio es indicada par -ing, e la plural de un nom es indicada par -s.

Turces es un esemplo de un lingua aglutinante cual usa multe sufisas. Un esemplo a la interede ("Learning Practical Turkish") es la parola terbiyesizliklerindenmis:

bon cortesia - terbiye

sin bon cortesia - terbiyesiz

noncortesia - terbiyesizlik

sua noncortesia (pd de los) - terbiyesizlikleri

de sua noncortesia - terbiyesizliklerinden

me conclui ce lo ia es de sua noncortesia - terbiyesizliklerindenmis

Nota ce un lingua no nesesa es un lingua aglutinante per ave parolas longa. Deutx, per esemplo, ave Rindfleischetikettierungsüberwachungsaufgabenübertragungsgesetz, e engles ave Pneumonoultramicroscopicsilicovolcanoconiosis!

An si linguas usante prefisas es plu rara, los pote ance es multe estendente.

Ablaut es comun en engles e sua cusines germanica. Per esemplo, la pasada de "sing" es "sang", e la partisipio pasada es "sung". La plural de "goose" es "geese". Ablaut pare veni de sufisas pasada cual ia influe la pronunsia de un vocal en la radis, ma alora desapare. "goose-geese" ia es a un tempo "gos-gese", e a ante "gos-göse", e a ante "gos-gose". La sufisa -e per indica la plural ia causa la fronti de la vocal o a ö e alora a e.

Infisas es mostrada la plu bon par la linguas semitica, como arabi. Multe parolas en arabi es composada de tre consonantes, e multe de la varias gramatical es produida par altera la vocales entre e sirca los. Per esemplo, la radis per scrive es ktb:

scrive (infinitiva) - kataba

scrive (jerundio) - kaatib

un libro - kitaab

libros - kutub

scrivor - kattaab

Posible, miles de anios en la pasada, alga persones ia comensa jenerali de ablautes - como si parlores de engles ia comensa dise "can-cen" en loca de "can-cans", seguente la model de "man-men".

Eres (e la otra linguas celitca, como galica, cimri, e bresonica) es alga strana car la consonantes cambia en situas variosa, en loca de la vocales. (En la esemplo a su, nota ce th es pronunsiada h, dt es pronunsiada d, ea es a, ch es un h dur, e bh es v):

		casa	aparte
		teach	árasán
me	mo	mo theach	m'árasán
tu	do	do theach	d'árasán
se (om)	a	atheach	a árasán
se (fem)	a	a teach	a hárasán
nos	ar	ar dteach	ar n-árasán
vos	bhur	bhur dteach	bhur n-árasán
se (los)	a	a dteach	a n-árasán

Nomes

Nomes es parolas cual nomi o indica un person, cosa, ata, o cualia. Los es parolas de "cosas" - an si "cosas" pote inclui multe tipos de ideas astrata cual pote, en otra situas, pare plu como verbos o ajetivos. En multe linguas, los es marcada par afisas o paroletas, per sua cuantia, seso, defini, e, plu importante, casos.

Defini pertine a la estende ce nos parla sur un cosa o aveni spesifada, conoseda par la parlores, o sur alga cosa min bon definida, como cualce cosa o alga cosa no spesifada.

En engles, la defini es marcada par la article "the". Lo pote es ance marcada par otra parolas, como "this", "that", "my", "yours", etc. La nondefini es marcada par la article "a" o "an", e ance par "one", "two", "some", "any", etc, o par la plural sin un article. A la otra lado, multe linguas no usa articles, pe latina, rusce, hindi, e xines.

On ave alga linguas en cual la defini es marcada par un sufisa. Esta es la caso en svensce, dansce, norsce, islansce, romanian, bolgarsce, e xcip (albanian). La linguas de Scandinavia es clar relatada, mar la otras no es prosima relatada. Los es posible ce los ia influe lunlotra, o ce la popla cual ia abita la Balcanes en edas ple antica ia influe tota de los.

Cuantia, natural, refere a como multe de un cosa de cual nos parla. On ave tre cuantias comun: Singular, pd un; plural, pd plu ca un; e (alga plu rara) dual, pd du. La dual es retenida un multe linguas sola per indica duples tradisional, como sposes o oios. Nota ce multe linguas no marca an la plural.

La aspeta la plu complicada de nomes es la casos. Filosofistes en Elas e India antica ia discute ja esta a min 2500 anios en la pasada! Multe de la termas cual nos usa oji ia es inventada en la Impero Roman, e donce refleta la casos usada en latina.

La caso prima es la nominativa, plu comun la sujeto de un frase. En multe linguas, esta es la forma plu fundal, comun representada par sola la radis. Un caso du es la vocativa, cual es la forma usada cuando on clama algun, como "O, Claudius!". La resta de la casos es nomida la ojetal. Linguas cual ave multe distinguis entre la casos ojetal usa los en la mesma modo en cual otra linguas usa preposadas o posposadas:

Acusativa - la ojeto direta de la verbo: El lansa la bal.

Dativa - la ojeto nondireta: El lansa la bal a Joan.

Ablativa - la loca de cual la ata prosede: El lansa la bal de sua fenetra.

Locativa - la loca a cual un ata aveni: El ia es a se casa.

Jenitiva - la caso de posese: La bal es de Juan.

Strumental - cual es usada per enata la ata: El lansa la bal con se mano destra.

Sosiativa - los cual acompania la ator: Me jua con Juan.

On ave multe otra casos posible. Un lingua en la Caucasos nomida tasaran ave 48 casos de nomes! Ma multe linguistes nota ce casos debe sola refere a linguas infletante como latina. Un lingua cual usa preposadas ave formulas preposadal, no casos. E un lingua aglutante como suomi, turces, o magiar ave afisas cual es plu como posposadas cual ia es liada a la nom. Los es coerente e fasil reconoseda, no como la casos en latina.

Asi es un esemplo de la parola rusce per "pais", en la singular e plural:

	singular	plural
nominativa	strana	strany
acusativa	stranu	strany
jenitiva	strany	stran
dativa	strane	stranam
strumental	stranoj	stranomi
locativa	strane	stranax

Esta no ta es un problem asta on reconose cual rusce ave multe declinas (familias de parolas cual difere en la model de sua formas per casos), e multe esetas ance. Compara la casos rusce con esta: la "casos" de la parola tamil per "om":

	singular	plural
nominativa	manitan	manitarkal
acusativa	manitanai	manitarkalai
dativa	manitanukku	manitarkalukku
sosiativa	manitanotu	manitarkalotu
genitive	manitanutaiya	manitarkalutaiya
strumental	manitanal	manitarkalal
locativa	manitanitam	manitarkalitam
ablativa	manitanitamiruntu	manitarkalitamiruntu

An si tamil ave an plu casos ca rusce, esta finis es la mesma per tota otra nomes! E nota como la plural es un caso simple de pone "-kal-" entre la radis e la afisa.

Un otra caso interesante: En la plu de linguas, la sujeto de un verbo nontransitiva (pe, el sede) es en la mesma forma (pd la nominativa) como la sujeto de un verbo transitiva (pe, el sede los), e la ojeto de un verbo transitiva es diferente (pd la acusativa). Esta linguas es nomida nominativa-acusativa. Ma on ave ance linguas en cual la sujeto de un verbo nontransitiva es en la mesma forma como la ojeto de un verbo transitiva (pd la asoluta), e la sujeto de un verbo transitiva es diferente (pd la ergativa). Estas es nomida linguas ergativa-asoluta.

Entre la linguas ergativa-asoluta es euscara, la linguas de Caucasos norde, multe linguas de la australianes orijinal, inuit-aleut, e multe linguas de la americanes orijinal de America Norde e Sentral. Los es tota linguas cual pone la verbo prima o final.

Seso es posible la varia plu strana de nomes. On nomi lo "seso" car lo es - laxe - liada a la seso fisical de persones e animales. Multe linguas difere entre nomes mas e nomes fema, con finis diferente per cada, e an nesesa formas diferente oer articles e ajetivos. Esemplos inclui franses, espaniol, italian, e portuges.

Otra linguas, como deutx, ave tre sesos - mas, fema, e neutra. Neutra refere a cosas cual no ave un seso, ma esta no aplica en cualce modo coerente. En nederlandes, on ave du sesos, ma los es neutra e comun, la comun derivante de los cual ia es orijinal mas e fema. Nomes en engles no ave un seso, ma la pronomes per person tre singular - "he" e "she" - ave un indica de seso fisical.

Multe linguas estra la sfero european difere entre nomes animada e nonanimada (simil a lfn), animada referente a persones, animales, e spiritos, e nonanimada referente a cosas - con esetas, natural. E on ave otra linguas cual difere entre multe categorias. La linguas bantu, per esemplo, ave multe categorias de nomes, como "cosas longa e magra", "partes de la corpo, "locas", etc.

En xines, on ave un varia isolinte (sin afisas) de esta: Cuando on vole indica plu ca un de alga cosa, on debe usa un parola spesial nomida un clasador entre la numero e la ojeto. En engles ance, on debe dise "three head of cattle".

On ave an plu esemplos de varia en nomes: Diminuintes espresa picia (engles "dog" deveni "doggy", per esemplo), e aumentantes espresa grandia. La diminuintes es ance comun usada per indica amosia, e aumentantes a alga veses espresa peril o malia.

Alga linguas ave un varia de onorantes, comun afisas cual indica stato. La afisa "-san" en japanes es bon conoseda. On ave ance afisas per indica un stato basa, e en alga linguas (pe indonesian) on debe deside entre multe grados de stato.

Pronomes

Pronomes es parolas cual servi como locatenintes per nomes (o la cosas real). En loca de refere a un person par sua nom, on usa "el"; en loca de nomi alga cosa repetente, on pote usa "lo". Pronomes ave multe de la mesma varias como nomes, incluinte person, cuantia, e caso. La plu de linguas difere entre tre persones - prima (la person ci parla o sua grupo), du (la person a cual on parla, o sua grupo), e tre (persones o cosas estra la conversa). En lfn, nos ave me, nos, tu, vos, el, lo, los. En engles, on ave...


	nominativa	ojetal	posese (ajetiva)	posese (pronom)
me	I	me	my	mine
tu	you	you	your	yours
el (mas)	he	him	his	his
el (fema)	she	her	her	hers
lo	it	it	its	its
nos	we	us	our	ours
vos	you	you	your	yours
los	they	them	their	theirs

An si la varias engles es plu rica ca los en lfn, on ave linguas con multe plu varias. Per compara, asi es la varias en islansce per un sola pronom - "algun":

	mas	fema	neutra
singular
nominativa	nokkur	nokkur	nokkurt
acusativa	nokkurn	nokkra	nokkurt
dativa	nokkrum	nokkurri	nokkru
jenitiva	nokkurs	nokkurrar	nokkurs
plural
nominativa	nokkrir	nokkrar	nokkur
acusativa	nokkra	nokkrar	nokkur
dativa	nokkrum	nokkrum	nokkrum
jenitiva	nokkurra	nokkura	nokkura

En alga linguas on ave du formas de la person prima plural: Un es incluinte e refere a la parlor e la escutor con lunlotra, e otra persones (pe "perce nos no vade per cafe con lunlotra?"); la otra es la escluinte, e refere a la grupo de la parlor e no a la escutor o sua grupo (pe "nos va vinse supra vos!"). En alga linguas de la americanes orijinal, los usa un estra forma de la person tre cual refere a alga person o cosa en ajunta a un person tre plu importante.

On ave ance pronomes cual refleta la ata a retro a la sujeto, nomida pronomes refletante. En engles, los es tipal marcada con "-self" ("myself", "yourself", etc). En multe linguas on usa un pronom refletante jeneral per person tre, singular e plural - espaniol e lfn, per esemplo.

Cortesia es comun un conserna con pronomes. En multe linguas european, on distingui entre varias familin e formal de la person du singular. En franses, on usa "tu" per tua amis, ma "vous" per tua profesor o empleor. On no cambia a usa "tu" asta vos acorda mutua ce vos es sufisinte familin per "tutoyer". En alga linguas asian, on debe usa multe plu detalias per es cortes.

On ave otra tipos de pronomes estra la pronomes personal. Pronomes de mostra inclui "esta" e "acel". Multe linguas ave tre grupos de estas, un per cosas prosima a la parlor, un per cosas prosima a la escutor, e un per cosas distante de ambos.

Pronomes nondefinida inclui parolas como algun, cadun, multe, etc. Como la article nondefinida, los no indica esata la person o cosa a cual on refere.

Pronomes de demanda es usada per demandas - "Ci es la om?". Pronomes de relata es usada per junta un nom con un proposa cual dona plu detalia sur la nom: "El es la person ci tu ia vide ier". En lfn, como en engles e multe otra linguas, la pronomes de demanda e pronomes de relata es la mesma.

Verbos

Verbos es parolas cual espresa un ata par alga cosa, la state de alga cosa o un cambia de esta state, o un interata entre un cosa e un otra. Como nomes, on ave multe varias de verbos.

Verbos transitiva es verbos cual ave e un sujeto e un ojeto: "Juan colpa la bal". "Juan" es la sujeto e "bal" es la ojeto de la verbo "colpa". Verbos nontransitiva es verbos cual ave sola un sujeto "me rie". On ave no cosa cual "es rieda" (estra la rie se mesma). Multe verbos ave un forma nomida la refletante, pd con un sujeto cual es ance la ojeto: "me feri me". Como esta esemplo indica, verbos refletante aseta comun un pronom refletante como se ojeto. Ma on ave ance verbos refletante cual no opera en esta modo: "los sposi".

La morfolojia la plu importante per verbos es conjuga. En alga linguas, lo es multe simple, ma en otra on ave un varia multe grande de afisas e otra cambias.

Person es un aspeta de verbos en multe linguas. La plu comun, on ave un fini o otra afisa cual indica alga cosa sur la sujeto (pe la person prima, du, o tre, la seso, e singular o plural). En engles, la sola fini per person en la plu de verbos es la -s de la person tre singular en la tempo presente (pe, "he does", no "he do"). La verbos en lfn no varia.

En alga linguas (pe Euscara), la ojeto direta e an la ojeto nondireta pote es indica en la verbo: "Dakarzkizu", per esemplo, sinifia "el condui los a tu", cuando "zenekarzkidan" sinifia "tu condui los a me. "Kar" es la peso de esta parolas cual sinifia "condui".

Asi es un conjuga simple de franses, en la tempo presente:

	singular	plural
person prima	chante	chantons
person du	chantes	chantez
person tre	chante	chantent

Plu, alga linguas ave varias cual espresa niveles de cortesia. En japanes, per esemplo, "hon o katta" sinifia "me compra un libro" - ma en un modo corta e simple. "Hon o kaimashita", a la otra lado, sinifia la mesma, ma en un modo plu cortes.

Plu familin per europeanes es la tempo de verbos. Multe linguas difere entre la tempo pasada, la tempo presente, e la tempo futur. Alga lingua difere ance detalias de tempo, como un forma direta, un forma prosima, e un forma distante. Multe linguas (pe rusce e japanes) distingui sola la pasada de la "non-pasada".

En frases, la verbo per espresa "me canta" en la tre tempos ave esta formas:

pasada - chantai

presente - chante

futur - chanterai

Aspeta es, en realia, un modo multe plu vea, e lo pare liada a nos psicolojia como umanas. La aspeta perfeta (e la aspetas simil completante o aoriste) indica ce la ata es completa, finida, "perfetada". En engles, lo es representada par formas variosa de la parola "ave", segueda par la partisipio pasada: "I had said" (pasada perfeta, acc pluperfeta), "I have said" (presente perfeta"), e "I will have said" (futur perfeta). La esemplo de la futur perfeta sujeste ce, a la tempo a cual nos ariva a un punto spesifada en la futur, mea dise de alga cosa va es ja completa e finida. La varia de la perfeta per la pasiva vose es nomida la efetante. En engles, alga persones ta dise "he got seen" ( simil a "el ia es ja videda").

La nonperfeta (acc durante o continuante) ave un senti de continua: la ata continua tra la momento. En engles, on usa un forma de la verbo "es" segueda par la partisipio presente: "I was saying", "I am saying", "I will be saying". En lfn, on ta usa la mesma modo.

On ave alga varias de la aspeta nonperfeta. La aspeta progresante sujeste ce la ata ia comensa plu temprana e continua tra la presente: "I have been saying", "me es ja disente". La aspeta repetente sujeste ce un ata singular es repeteda: "I keep saying", "me continua dise". E la aspeta comensante sujeste ce la ata va o ta es comensante: "let's get going", "ta ce nos ta comensa vade".

E on ave la aspeta simple (o nondefinada). Esta inclui la tempos normal como "me ia dise", "me dise", e "me va dise".

Un otra forma de la verbo es la modo. La forma fundal es la real (o indicante): on dise alga cosa cual ia aveni, es aveninte, o va aveni. Un varia es la stativa, cual indica ce algun o alga cosa es en un state spesifada e no es atante o cambiante: "El sede".

On ave tree modos usada cuando on ave un grado de nonrealia. Esta es comun miscada con lunlotra. La modo desirante indica un desira o espera per la aveni de alga cosa. En engles, on espresa lo con verbos aidante como "should" o "would", e con espresas como "I wish...". En lfn, nos usa parolas como "ta", "ta ce", "debe", "vole", etc.

La modo dependente es usada cuando la realia de un aveni depende de la realia de un otra: "me ta vade si tu vade". En engles, los ave sola un resta de la modo dependente: On dise "if I were to go" en loca de "if I was to go". Ma esta es ja desaparente!

La modo sujuntiva es usada cuando on ave alga dutas o nonsertia sur la aveni. Multe linguas ave conjugas completa de esta modo, con tempos e aspetos incluida. La sujuntiva ia es la parte plu confusante de mea lesones de franses!

On ave otra modos. En japanes, per esemplo, on ave modos de tempora e esitosa. E la plu de linguas ave un varia de la verbo per espresa comandas, pe par no indica la sujeto (tu o vos).

En franses la varias de aspeta e modo de "me canta" pare como estas:

nonperfeta - chantais

dependente - chanterais

sujuntiva presente - chante

Alora, on ave alga voses. La vose ativa es la forma fundal. Esta es usada cuando la sujeto fa un ata. La vose pasiva es usada cuando la sujeto de un frase es vera la ojeto de la ata. En lfn (e en engles) on usa un forma de "es" con la partisipio pasada: "me ia es colpada", "I was hit".

La vose causante es usada cuando la sujeto causa ce la ojeto fa un ata: "el fa ce me fa lo". Cuando la causante es combinada con la refletante, on nomi lo la dinamica: "los sposi la un la otra".

Un otra varia comun de verbos es la nega. En lfn, on usa simple la paroleta "no" ante la verbo. En engles, on usa "not" pos un de la verbos aidante. Ala, la tende es ce la verbos cambia en la nega, par combina con cortis de "not": "I can't", "I won't", "I don't", "I ain't". En otra linguas la verbo cambia plu completa.

En alga linguas, la verbo cambia cuando lo es un parte de un demanda. En eres, per esemplo, "tá" (es) deveni "an bhfuil" en demandas.

Nos no pote oblida la esemplo de hausa (un lingua de Nijeria). En lo, la tempo, aspeta, etc, es indicada par varias, no de la verbo ma de la pronom-sujeto. Per esemplo, per "el":

perfeta - kin

futur - záaki

predisante - kyâa

abitual - kíkàn

sujunctiva - kì

continuante - kínàa

Nota ce engles es ance movente en esta dirije: "I'd", "I've", "I'll", etc!

En linguas isolante como xines, o en lingua cual move en acel dirije (como engles e franses), multe de la varias a supra no es fada par la ajunta de sufisas o la cambia de la verbo. On indica acel intendes con verbos aidante. En engles, per esemplo, on dise "he will sing" en loca de "il chantera" como en franses. En franses, a la otra lado, on dise comun "il a chanté" en loca de "he sang" en engles. Esta esemplos es nomida tempos composada, ma los pote ance inclui aspetas e modos, etc.

Partisipios es formas de verbos comun usada en verbos composada. En engles, on ave du: la partisipio pasada (cual fini con -ed, como la tempo pasada) e la partisipio presente (cual fini con -ing). Partisipios es ance usada como ajetivos: "el es un fol dansante", "el ia es un om bateda", etc. Nota ce la partisipio pasada es ance nomida la partisipio pasiva, e la partisipio presente es ance nomida la partisipio ativa. En alga linguas (como esperanto), on pote indica ance la tempo en un partisipio.

Un otra forma de la verbo comun usada en verbos composada es la infinitiva. En lfn, on no ave un forma vera de la infinitiva. En engles, on pone "to" ante la radis: "to sleep, perchance to dream..." E en multe linguas on ave un forma spesial. En italian, per esemplo, la infinitiva fini en -re.

La infinitiva es un esemplo de un nom verbal (o jerundio). On ave multe otra esemplos de verbos usada como nomes, con o sin finis spesial. Multe linguas usa la radis de la verbo - engles, per esemplo: "I dance", "I go to the dance", "I do a dance", and "I devote my life to the dance". Lfn fa la mesma.

Otra clases de parolas

Ajetivos es parolas cual altera la sinifias de nomes. En multe linguas, ajetivos ave afisas cual debe acorda con se nomes en caso, numero, seso, etc.

Un cualia spesial de ajetivos en multe linguas es compara: On ave formas spesial de la ajetivo per cuando on vole dise ce un nom es plu o min de cualce cualia la ajetivo espresa (nomida la forma comparativa), o ce lo ave la plu o la min de acel cualia (la forma superlativa). En otra linguas, como lfn, on usa paroletas como plu, min, la plu, e la min. En engles, on vide un varia de metodos: parolas spesial como good/better/best, sufisas coerente como big/bigger/biggest, e forma analisal como significant/more significant/most significant.

Averbos es parolas (o espresas) cual altera verbos, ajetivos, o an otra averbos. On ave comun finis spesial cual difere la averbos de ajetivos simil. En engles, averbos fini comun con -ly; en franses, los fini comun con -ment. Averbos no difere de ajetivos en lfn.

A alga veses, averbos es usada per crea demandas o per introdui alga varias de proposas suordinada cual introdui informa sur cuando, do, e como de la ata. Per esemplo, "cuando tu va vade?", "me va vade cuando me es preparada".

Cuantia (o numeros) ave comun formas e ajetival e averbal. En la eda de Shakespeare, on ta dise "three men" ma "it was done thrice". Aora "thrice" ia deveni "three times" (como lfn "tre veses").

La forma la plu simple de un numero es la numero cardinal, cual indica un cuantia spesifada de alga cosa. On ave ance la numero ordinal, cual indica la loca de alga cosa en un segue: "el ia es la om tre". Lfn usa un construi analisal, ma multe linguas usa formas spesial, pe engles "he was the third man". Ma engles permete ance espresas como "he was man number three".

Preposadas es parolas cual permete un nom cuali un otra nom o un verbo en un modo cual paraleli ajetivos e averbos: "la om en la jardin core a la casa" Multe linguas, como japanes, ave posposadas en loca de preposadas, ma los ave la mesma intende. En otra linguas, como latina, rusce, suomi, etc, la casos de nomes es usada en loca de preposadas o posposadas.

Eres es interesante car lo usa preposadas cual varia par person, esata como verbos. Asi es la "conjuga" de la preposada roimh: (nota ce mh es pronunsiada como w)

ante me - romham

ante tu - romhat

ante el (mas) - roimhe

ante el (fema) - roimpi

ante nos - romhainn

ante vos - romhaibh

ante los - rompu

Juntas es parolas cual junta du partes de un frase. On ave du spesies: La plu familiar es la conjuntas (o juntas coordinante) como e, o, e ma. La spesie du es la sujuntas (o juntas suordinante) como si, car, afin, ce, etc. Estas introdui alga tipos de proposas suordinada, como "me labora tan multe afin me enfantes pote come" e "me pensa ce el es bela".

Final, on ave esclamas (o introjetas). Estas es espresas de emosia - no tipal parolas vera, ma sonas vocal cual refleta la emosias de la parlor: o! e? he! txa. merde. "Merde" es, natural, un parola vera, ma en multe casos la usa de la parola no ave un lia real con la cosa se mesma.