Site de New York

Un mapa de la site, con sua sinco distritos

La Site de New York es la site con la plu abitantes en la SUA. Con un cuantia estimada de 2018, lo ave 8,398,748 persones distribuida tra un area de sirca 784 km2. Locada a la fini sude de la stato de New York, la site es la sentro de la area urban de New York ave sirca 19,979,477 persones en sua area urban statistical. Un site con potia global, New York ia es descriveda como la capital cultural, finansial, e media de la mundo, e lo ave un efeto sinifiante sur comersia, media, rexerca, tecnolojia, educa, politica, turisme, arte, moda, e sportes. Con la xeferia de la Nasiones Unida, New York es un sentro importante per diplomatia internasional.

Locada a un de la portos natural la plu grande en la mundo, la Site de New York es composada de sinco buroughs (distritos) - Brooklyn, Queens, Manhattan, Bronx, e Staten Island - cual ia es combinada como un site singular en 1898. La site e sua area urban es la porton xef per migra legal en la SUA. Tan multe como 800 linguas es parlada en New York, e lo es la site de linguas la plu diversa. Lo es la abitada de 3.2 milion abitantes naseda esta la SUA, la cuantia la plu grande en la mundo. Per 2019, la area urban es estimada como un produi urban bruta de SUA$ 1.9 trilion, cual sujesta ce, si la area urban ia es un nasion, lo ta ave la produi interna bruta 12 de grandia.

La Site de New York ia orijina como un stasion comersial fundida par colonistes de la Republica Nederlandes en 1624 en Manhattan sude. Lo ia es nomida orijinal Nova Amsterdam. La site ia deveni controlada par la engles en 1665 e ia es renomida Nova York per la Dux de York, la frate de Re Charles 2 de England. La site ia es la capital de la SUA de 1785 a 1790 e ia es la site la plu grande en la SUA de 1790. La sculta enorme de Libria ia bonveni miliones de migrantes ci ia ariva par barcon en la sentenios 19 tarda e 20 temprana.

Istoria

En la glasia de Wisconsin, 75,000 a 11,000 anios ante aora, la rejion ia es locada a la borda de un glasia grande plu ca 610 m spesa. La erode de la jela movente sude e alora norde ia contribui a la separa de Long Island e Staten Island. Lo ia resta ance la roca madral a un profonda minima, cual ia furni un funda solida per la plu de rascasielos de Manhattan oji.

Ante la eda de coloni european, la area ia es abitada par americanes orijinal algoncian, spesial la lenape. Sua abitada xef, nomida Lenapehoking, ia inclui Staten Island, Manhattan, la Bronx, la parte ueste de Long Island (incluinte Brooklyn e Queens) e la vale de la Rio Hudson sude.

La prima visita european ia es en 1524 par Giovanni da Verrazzano, un esploror de Firenze per la Re de Frans. El ia proclama lo per Frans. Un mision espaniol, gidada par la capitan portuges Estevao Gomes ia ariva en la area en janero 1525 e mapada la boca de la Rio Hudsom. La Pardon Real de 1527, la mapa siensal prima de la costa este de America Norde, ia es informada par Gomes, e ia nomi la SUA norde-este como Tierra de Esteban Gomez en sua onora.

En 1609, la esploror engles Henry Hudson ia redescovre la porton de New York en cuando el xerca per un pasaje norde-este a Asia este per la Compania Nederlandes de India Este. El ia naviga sirca 240 km norde en cual es aora la Rio Hudson, pasante la loca de lo cual es aora la site capital de New York, Albany. En 1614, la area entre Capo Cod, Massachusetts e la Baia de Delaware ia es clamada par Nederland, e es nomida Nieuw Nederland.

La abitante prima, estra la lenapes, de lo cual es ultima la Site de New York, ia es Juan Rodriguez (en nederlandes: Jan Rodrigues), un mercator de Santo Domingo, un desendente de portugeses e africanes. El ia ariva en la inverno de 1613-1614, trapinte pelos e intercambia los con la popla local como un representor de la nederlandeses.

Un colonia permanente ia comensa en Nova Nederland en 1624 con la funda de un stasion per intercambia pelos sur la Isola Governores. En 1925, los comensa construi un fortres e la site Nova Amsterdam, sur la isola de Manhattan. Lo ia estende de la punto a sude a lo cual es aora la Strada Wall, do los erije un ensirca de 4 metres per proteje la colonia contra atacas par americanes orijinal e la brites. En 1616, la dirijor-jeneral de la colonia, Peter Minuit, ia compra la isola de Manhattan per la Compania Nederlandes de India Ueste de la canarsi, un grupo peti de lenapes, per 60 gulden (o sirca SUA$ 900 en 2018).