Uga

Quest articol chì l'è scrivuu in lombard, grafia milanesa.

On grappell de uga negra.

	«A San Lorenz, l'uga la tensg.»
	(Proverbi lombard.)

L'uga (del latin uva) l'è el frutt del vidor.

Descrizzion

Per vess pussee precis, l'uga l'è on'infruttescenza, che 'l saria on rosc de frutt, ciamaa grappell. El grappell l'è faa su d'ona sgrazza (che l'è 'l sò ass central) e de tanti grann, anca ciamàa pincireou, pussee piscininn e de color ciar o scur a segonda de la qualità de l'uga.
L'uga la vegna doperada per fà el vin, ma anca per vess mangiada. La pò vess mangiada sia 'me frutt fresch che secch: in 'sto cas la troeuvom despess dent ai bombon, ai tort o al panatton.
A se cognossen tanti speci de uga.