Housemusik

House (afkörting van Housemusik) is ne gaddername vöär vöäle verskillende ården elektroniske dansmusik. Dee hebbet allemåle nen starken, swåren bassdrum. Et tempo ligt meysttyds tüsken de 120 en 130 BPM, al sint der undersoarten dee as dår van afwyket. House untstünd in de tachtiger jåren van den twentigsten eywe in et amerikaanske Chicago, do as platendraiers in dansgeleygenheiden en musikproducenten olde diskonummers nen swöärderen bas gavven. Eyne den as housemusik maket wördt nen producer enöömd, eyne wat et drait up feasten is nen DJ.

Grundleggers van den musikstyl sint under meyr Frankie Knuckles, Ron Hardy, Jesse Saunders, Chip E., Steve "Silk" Hurley, Farley "Jackmaster" Funk, Marshall Jefferson, Phuture. Vanuut de lokale chicageeske danshallen en radiostations tröäk et når Detroit en Stad Nyjork, mär ouk oaver den plas når Londen in et VK. Van dåruut wör et en internationaal verskynsel.

House hevt en grouten invlood ehad up popmusik, med name up dansmusik. Et wör rap oaverenöämen döär popartisten dee as in dee tyd al bekend warren, sou as Janet Jackson, Madonna en Kylie Minogue. Mär ouk nye specifik up house erichte artisten as Lil Louis ('French Kiss', 1989), de Nightcrawlers ('Push the Feeling On', 1992/1995) en Robin S. ('Show Me Love', 1992) hadden der grout sukses med.

Vöäle houseproducers verknippet up versöök ouk vake bestånde nummers van popartisten üm der en eygen gelüüd an te krygen. Housemusik blivt in untwikkeling en is noch altyd populäär in danshallen en vöär de radio. Der sint unmündig vöäle undersoorten, van eurobeat töt techno, hardcore house, gabber en trance.

Karaktertrekken

Et meyst herkenbåre an House is et herhaaldelike veerkwartsritme, dat in beginsel upebouwd is med nen swåren bassdrum up yderen tel, nåpikkende slöätene hihats der tüskendöär en ne kleine trumme, klapfragment of klikgeluud up den tweyden en veerden tel. De drums wordet håste altyd nåbootsed med ne elektroniske drummachine, meystal nen Roland TR-808, 909 of 707. Andere klapgeluden, shakers, kleine trummen of bekkengelüden geavet wydere synkopaty. Med snippers van Konga's en Bongo's krigt et en meyr afrikaansk gelüüd, med kobellen en andere metaalachtige slagwarkgeluden en meyr latynsk-amerikaansk.

Et tempo ligt meystal tüsken de 120 en 130 slagen de minute. Vake ligt der swåre baslynen in stakkato under, med dåroaverhen gelüüdssnippers van bestånde nummers of korte akkoordstouten. Dee geavet de musik en ekstra ritmisk element.

Mangs wordet de drumgeluden 'oaverstüürd' döär de gain up te draien üm et en gnadderiger geluud te geaven. Eyn old subgenre, acidhouse, dankt et bestån an de knauwerige geluden uut de Roland TB-303 bassyntesiser. Housemusik kan worden emaked up 'apparaten dee neet tovöäle kostet un makkelik to gebruken sint', wårmed as lüde selv meyr DJ-wark güngen doon. Traditionäle musikanten musten der eyrst niks van weaten, want dee vünden de geluden uut disse apparaten 'te goudkoup klinken'. Makers van housemusik gebruket vake geluudssnippers van bestånde instrumenten, in steade van musikanten in te hüren.

Undanks at housemusik uut meyrere lågen besteyt, sou as drums, syntetiske basloupen, akkoordstouten, melodylynen en geluudssnippers, vöölt et geheyl wat spaarsaam of simplistisk an. As teagenstelling töt popmusik benådrükket house neet de mid- en houge tounfrekwensys, mär jüüst et swöärdere basregister. Teagenoaver trance, wat stark in heavigheid blivt upbouwen töt en höygdepunt, is house jüüst fråi konstant en spöält et voordan med verskillende lågen en geluudsteksturen. In en nummer kan byvöärbeald deselvde melody mangs med en sunder bas herhaald worden. Ouk wordet der in meyrere of mindere sinne filters en verförmers oaverhen esat, kenmarken dee as et genre deylet med dubreggae.

Housenummers hebbet vake en intro, en refrein, verskeidene versdeylen, en middel en ne korte uutgeleide, al ligt dat neet vaste. Wat nummers hebbet geheyls gin versen, mär neamet en deyl van et refrein en herhaalt et in wat anepasden förm. Vake hebbet nummers en deyl van acht måten med nen swåren basloup wat se voordan herhalet. Mangs sit der nen (bewarkeden) geluudssnipper uut en bestånd disko-, soul, jazz- of funk-nummer by döär. Der künnet ouk (flarden van) sanglynen oaverhen liggen as nen ård popnummer, mär wat nummers sint weaderümme bracht töt de basis, as minimalen instrumentalen musik.

Vöäle housemakers leyveret nen "12-inchmix" van ses töt acht minuten vöär in nen klub, dee as se terüggeknipped töt nen "radio edit" van ungeväär 3,5 minute, soudat et up de radio draid kan worden.

Oorsprung van et woord 'house'

Wat lüde meynet dat et woord 'house' ne afleiding is van "The Warehouse", nen diskoteek in Chicago tüsken 1977 en 1983, wåras DJ Frankie Knuckles in dee tyd platen draiden. Mangs deade den diskoplaten in mekander låten oaverloupen as de lüde noch vulup an et dansen warren en et nummer an den ende. Andere lüde meynet dat et woord kümt van et feit dat alleman et in huus kunde maken.

Neadersassisk

In et neadersassisk wördt döärgåns når engelsk model et woord house gebruked. Lüde dee as der minder med hebbet, hebbet der verskillende nyvindingen vöär, sou as dörskemöäle of veerkante radermusik.