Negus

Negus (vun amhaarsch „König“) weer en Titel in dat Kaiserriek vun Äthiopien.

De Historie vun den Titel reckt trüch bet in de Tiet vun dat Riek vun Aksum. Den Titel „Negus Negest“ geev al, so warrt dat tominnst överlevert, Salomo sien Söhn, den Äthiopier Menelik I. De Negus weer en sülvststännigen Herrscher un weer blots den Kaiser vun Äthiopien ünnergeven. De äthioopsche Kaiser sülvst harr den Titel „Neguse Negest“, wat König vun de Königen bedüüd.

To de Tiet vun Kaiser Beyde Maryam 1468 bet 1478 heet eenzig de Herrscher vun Gen Negus. Je nadem, wo stark de Macht vun’n Kaiser weer, änner sik ok de Macht vun’n Negus. Bi starke Kaisers harr de Negus wenig Macht, bi swacke harr he veel. Later hebbt de Kaisers den Titel Negus ok an de Herrschers vun Shewa, Gonder, Tigray un Gojam vergeven.

De Letzte, de vun Kaiserin Zauditu to’n Negus kröönt worrn is, weer 1928 Ras Tafari Makonnen. Ras Tafari is 1930 denn as Haile Selassie sülvst Kaiser vun Äthiopien worrn. To siene Tiet is nüms mehr to’n Negus kröönt worrn.