Walter Kohn
Walter Kohn (* 9. März 1923 in Wien; † 19. April 2016 in Santa Barbara, Kalifornien) weer en US-amerikaansch Physiker vun öösterrieksch Herkunft. 1998 wurr he för sien Entwicklung vun de Dichtefunktschonaltheorie, deren Grundlaag dat Hohenberg-Kohn-Theorem is, mit den Chemie-Nobelpries uttekent. Den Pries muss he sück aber mit John Anthony Pople deelen.
Leven
[ännern | Bornkood ännern]Kohn is in Wien as Söhn vun jöödsch Öllern upwussen. He hett dat Akademisch Gymnasium in Wien besöcht. Sien Vader bedreev den vun Salomon Kohn grünndten Postkartenverlag Brüder Kohn. Wiels sien Öllern un völ Verwandte in’ Holocaust to Dood keemen, kunn he mit en Kinnertransport nah England un dornah nah Kanada emigreeren un weer ok up kanaadsch Siet in den Tweeten Weltkrieg Suldat.
Kohn hett sien B.A. in Mathematik un Physik an de University of Toronto 1945 un een Johr later sien Master in anwend Mathematik maakt. To sien Lehrern tellen H. S. M. Coxeter, John Lighton Synge, Leopold Infeld un Richard Brauer. 1948 hett he sien Doktertitel an de Harvard University bi Julian Seymour Schwinger in theoretischer Physik maakt (Thema weer dat quantenmechanische Dreekörperproblem). He lehr van 1950 bit 1960 an de Carnegie Mellon University, denn bit 1979 an de University of California, San Diego. Af 1953 bit Midden vun de 1960er Johren weer he regelmatig för Bell Laboratories tätig, wo he ünner annern mit William Bradford Shockley un Joaquin M. Luttinger to’n Bispeel över de Theorie vun de Störstellen in Halfleitern tosommenarbeiten dee.
In dat Johr 1959 hett he sien Opdecken to de Kohn-Anomalie bekannt maakt, en Divergenz in Betoog vun de Dispersionsrelatschoon bi Phononen. De Anfang vun sien Arbeiten to de Dichtefunktschonaltheorie liggt nah Kohn in Arbeiten to de elektronisch Struktur vun Legeerungen (siet 1963), wobi he in Paris mit Pierre Hohenberg tosommen arbeit hett un in San Diego mit Lu Jeu Sham.
1979 wurr he Grünnensdirekter vun dat internatschonal renommeert Institute for Theoretical Physics in Santa Barbara; 1984 wurr he Perfesser an de University of California, Santa Barbara, wo he ok emeriteeren dee. Siet 1957 weer he US-Staatsbörger.
He hett in Wien dat jöödsch Privatrealgymnasium Zwi-Perez-Chajes-Schule un dat Akademischen Gymnasium den Walter-Kohn-Pries för Arbeiten in dat Rebeet vun de Minschnrechte un Natuurwetenschap stift.
Walter Kohn weer tweemal verheiraadt un Vader vun dree Döchter. För sien Arbeiten to de Dichtefunktschonaltheorie kreeg he 1998 den Nobelpries för Chemie. Dat he as Physiker den „falschen“ Nobelpries kreegen hett, hett hüm dorbi nich stört.
Kohn is an’ 19. April 2016 in Santa Barbara (Kalifornien) in dat Öller vun 93 Johren storven.[1]
Pries un Utteknungen (Uttoog)
[ännern | Bornkood ännern]
- 1961: Oliver E. Buckley Pries in Fastkörperphysik vun de American Physical Society
- 1977: Davisson-Germer-Pries vun de American Physical Society.
- 1988: National Medal of Science
- 1996: Ehrendokter vun de Technische Universität Wien[2]
- 1998: Nobelpreis för Chemie
- 1999: Österrieksch Ehrenteeken för Wetenschap un Kunst
- 2002: Ehrendoktor der TU Dresden[3] * 2009: Groot Sülvern Ehrenteeken mit den Steern för Verdeenste um de Republike Öösterriek[4]
- 2012: Ehrendokter vun de Universität Wien[5][6]
He weer siet 1963 Liddmaat vun de American Academy of Arts and Sciences un siet 1969 vun de National Academy of Sciences. 2011 wurr he Ehrenliddmaat vun de Öösterrieksch Akademie vun de Wetenschapen (ÖAW).[7] Siet 2006 weer he utwärtig Liddmaat vun de Russisch Akademie vun de Wetenschapen.[8]
Referenzen
[ännern | Bornkood ännern]- P. Hohenberg und W. Kohn: Inhomogeneous Electron Gas. In: Physical Review- Band 136, 1964, S. B864–B871
- W. Kohn und L. J. Sham: Self-Consistent Equations Including Exchange and Correlation Effects. In: Physical Review. Band 140, 1965, S. A1133–A1138
Weblenken
[ännern | Bornkood ännern]
- DNB-Katalog
- Websteed vun Walter Kohn an der University of California at Santa Barbara
- Walter Kohn up de Sieden vun den Nobelpries
- Biographie bi de APS
- Originaltöne: Walter Kohn in dat Online-Archiv vun de Öösterrieksch Mediathek (Levensgeschichtliche Interviews, Radio-Porträt)
Enkeld Nahwiesen
[ännern | Bornkood ännern]- ↑ orf.at - Nobelpreisträger Walter Kohn gestorben. Artikel van’ 22. April 2016, afropen an’ 18. Juni 2016.
- ↑ "Antisemitismus ist ein furchtbares Gift" up ORF van’ 4. Dezember 2012, afropen an’ 5. Dezember 2012
- ↑ Ehrendoktoren der Fakultät Mathematik und Naturwissenschaften der TU Dresden
- ↑ Upstellung vun all dör den Bundspräsidenten verleeht Ehrenteeke för Verdeenste um de Republiek Öösterriek af 1952 (PDF; 6,9 MB)
- ↑ Uni Wien ehrt drei NS-Flüchtlinge up ORF van’ 3. Dezember 2012, afropen an’ 3. Dezember 2012
- ↑ Uni:Blicke: Verleihung des Ehrendoktorats an die "Weltstars der Wissenschaft"
- ↑ Walter Kohn wird Ehrenmitglied der ÖAW
- ↑ Russisch Akademie vun de Wetenschapen: [1] russisch, Ausländische Mitglieder der Russischen Akademie der Wissenschaften seit 1724, Walter Kohn, afropen an’ 22. September 2015