Alan Rickman

Alan Rickman
Statsborgarskap	Storbritannia
Fødd	21. februar 1946 Acton i London
Død	14. januar 2016 (69 år) London
Yrke	fjernsynsskodespelar, filmskodespelar, stemmeskodespelar, karakterskodespelar, filmregissør, filmprodusent, grafisk designar, teaterskodespelar, skribent, skodespelar, manusforfattar, sceneinstruktør, regissør
Språk	engelsk
Politisk parti	Det britiske arbeidarpartiet
Medlem av	Royal Shakespeare Company
Ektefelle	Rima Horton
Alan Rickman på Commons

Alan Rickman i desember 2009.

Alan Sidney Patrick Rickman (21. februar 1946–14. januar 2016) var ein britisk skodespelar frå London. Han var særleg kjend for rolla som Severus Slur i filmane om Harry Potter.

Biografi

Alan Rickman vart fødd inn i ein familie på fire born South Hammersmith i London, og gjekk på montessoriskule i barndommen. Faren døydde då Alan var åtte år gamal. Mora gifte seg opp att, men skilde seg etter tre års ekteskap med den nye ektemannen. Alan Rickman viste gode evner for kalligrafi og måleri med vassfargar. Sjølv om han hadde stor interesse for drama, utdanna han seg til grafisk designer. Han byrja i jobb for avisa Notting Hill Herald, og starta opp sitt eige designstudio med nokre kameratar. Etter eit par år bestemte han seg likevel for å søkja om plass ved Royal Academy of Dramatic Art og gjekk der frå 1972 til 1974. Han fordjupa seg i Shakespeare ved akademiet, og i 1978 fekk han si fyrste rolle for fjernsyn, i ei oppsetjing av Romeo og Julie. Rickman vart også med i Royal Shakespeare Company.

Alan Rickman vart seinare ein kjend skodespelar både på teater og på film og fjernsyn. Av større filmproduksjonar kan nemnast at han spelte skurken i Hollywood-filmen Die Hard i 1988 og i komedien Truly Madly Deeply i 1990. I 1991 var han med i Robin Hood - Tyvenes prins, og han spelte i filmoppsetjinga av Fornuft og følelser i 1995. I 2003 hadde han ei av hovudrollene i Love Actually (2003) og han var med i Sweeney Todd - Demonbarbereren fra Fleet Street i 2007. Alan Rickman var også ein dyktig stemmeskodespelar. Han spelte inn stemma til roboten Marvin i Haikerens guide til galaksen (2005), og til larven i Alice i Eventyrland i 2010.

Alan Rickman vann m.a. Emmy-prisen og BAFTA-prisen.

Rolle i Harry Potter-filmane

I 2001 spelte han Severus Slur i den fyrste Harry Potter-filmen; Harry Potter og de vises stein. Alan Rickman skulle få spela i denne rolla i til saman åtte filmar frå 2001 til 2011. I Harry Potter-universet til J.K. Rowling underviser karakteren Severus Slur i eliksirar og i forsvar mot svartekunstar ved Galtvort. Slur er framstilt som ein kompleks og tvitydig karakter. Han er svært dyktig på den magiske eigenskapen psykoblokking, noko som gjer at han forsvara seg mot at andre kan lesa tankane hans og sjå kva han eigentleg føler. I filmane er Slur difor ein kald og streng figur som ikkje fortel mykje om seg sjølv.

Filmografi

• 1988: Die Hard
• 1989: The January Man
• 1990: Quigley Down Under
• 1990: Truly Madly Deeply
• 1991: Closet Land
• 1991: Robin Hood - Tyvenes prins
• 1991: Close My Eyes
• 1992: Bob Roberts
• 1994: Mesmer
• 1995: An Awfully Big Adventure
• 1995: Fornuft og følelser
• 1996: Michael Collins
• 1997: Vintergjesten
• 1998: Judas Kiss
• 1998: Dark Harbor
• 1999: Dogma
• 1999: Galaxy Quest
• 2000: Hjelp, jeg er en fisk
• 2001: Blow Dry
• 2001: Harry Potter og de vises stein
• 2001: The Search for John Gissing
• 2002: Filmen Harry Potter og mysteriekammeret
• 2003: Love Actually
• 2004: Harry Potter og fangen fra Azkaban
• 2005: Haikerens guide til galaksen
• 2005: Harry Potter og ildbegeret
• 2006: Snow Cake
• 2006: Perfume: The Story of a Murderer
• 2007: Nobel Son
• 2007: Harry Potter og Føniksordenen
• 2007: Sweeney Todd - Demonbarbereren fra Fleet Street
• 2008: Vin i vrangstrupen
• 2009: Harry Potter og halvblodsprinsen
• 2010: Alice i Eventyrland
• 2010: Harry Potter og dødstalismanene - del 1
• 2011: Harry Potter og dødstalismanene - del 2
• 2012: Gambit

Kjelder

• Denne artikkelen byggjer på «Alan Rickman» frå Wikipedia på engelsk, den 1. mars 2012.
• Avsnittet om Harry Potter-filmane er henta frå «Severus Slur» frå Wikipedia på bokmål, den 1. mars 2012.
• Filmografien er henta frå imdb.com, den 1. mars 2012.