San Salvator (AL)

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

San Salvator Stat: Italia Region: Piemont Provincia: Provincia ëd Lissandria Nòm 'n italian: San Salvatore Monferrato Coordinà: Latitudin: 44° 59′ 42.3′′ N Longitudin: 8° 34′ 01.3′′ E Autëssa: 205 m s.l.m. Surfassa: 31,69 km² Abitant: 4.212 (2019) Comun dj'anviron: Castlèt Monfrà, Lissandria, Lu e Cucri, Mirabèl, Quargnent, Valensa CAP: 15046 Prefiss tel.: 0131 Còdes ÌSTAT: 006154 Còdes fiscal: I144  Sant protetor: san Cirìach e Pentecost  Festa dël borgh: martes ëd Pentecost  Sit istitussional San Salvator o San Salvador (San Salvatore Monferrato an italian) a l'é un comun dël Piemont ëd 4.212 abitant , ant la provinsa ëd Lissandria. Ël pais a resta an sij brich ai margin orientaj dël Bass Monfrà, a na desen-a 'd km a nòrd ëd Lissandria. Stòria Ël teritòri 'd San Salvator a l'é abità fin da l'Età dël Fer, quand ch'a l'é probàbil che un prim ansediament a sia stàit fondà da part ëd na tribù ligurin-a dël grup che ij roman a ciameran "Ligures Statielli" opura "Ligures Bagienni". Dal IV sécol prima 'd Crist, a s'anandia la calà dij Celt (o Gaj, pr'ij roman) da Oltralp, che a së stabilisso an bon-a part ëd l'Italia stentrional mës-ciandse con le popolassion locaj e lassand trasse përfonde ant la cultura dle gent dël pòst. La cesa parochial ëd San Martin La conquista roman-a dl'area a pija sò achit antra 'l ters e lë scond sécol prima 'd Crist; ël pais a dovìa ciamesse Villa ad Vites e a l'era colocà ai màrgin stentrionaj ëd la IX Region Augùstea (Liguria), che a andasìa dal Mar Lìgur al Pò. La tradission a veul che la conversion al Cristianesim dël pais a sìa dovùa a le campagne d'evangelisassion ëd san Siro, vësco pavèis dël sécol ch'a fa IV, e ch'a sìa stàit pròpi chiel a arbatié 'l pais tanme Villa Sancti Salvatoris. Le prime vere sorgiss ch'a documento la stòria dël pais a armonto a l'Età 'd Mès: ant ën diplòma imperial dël 7 ëd magg 999 l'imperator Oton III ëd Sassònia a conced ël borgh al vësco 'd Vërsèj. Antra ij sècoj ch'a fan X e XI, l'abà dl'abassìa 'd san Pé 'd Breme a fa edifichè 'n castel an sla sima dla colin-a për dësfende j'abitant dj'anviron da le incursion dij Sarasin; davsin a le muraje dël castel a l'è stàita batìa la cesa 'd San Martin. Dantorn a castel e piev as dësvlupa ël neuv borgh. Dël 1164 l'imperator Federich I Barbarossa a don-a San Salvator a Vielm, marchèis ëd Monfrà. Ant ël sécol ch'a fa XIII, ël pais a subiss sachegi e atach dai Lissandrin e dël 1290 a ven drocà dël tut, dòp la catura dël marchèis Vielm VII ëd Monfrà. Dal sécol ch'a fa XIV ël pais as ministra con la creassion ëd la Comun-a rural, dotà 'd pròpie lèj ch'a ven-o codificà dël 1374. San Salvator a sarà mai anfeodà a chèich famija nòbil, ma a resta "Tèra Inmedià" (valadì a la direta dipendensa) dij Marchèis ëd Monfrà (prima j'Aleràmich, peui dal 1306 ij Paleòlogh, anfin dal 1536 ij Gonsaga e Gosaga-Nevers). Dël 1514 ël capitan ëd ventura Gaspare Stampa, a j'órdin ëd jë Sfòrsa, a fa n'àutra terìbil incursion sël pais e dël 1555 ël castel a ven demolì për evitè ch'a fussa dovrà da jë Spagneuj për but militar. Dël 1708, an séguit a la Guèra 'd Sucession Ëspagneula e al sucessiv Tratà d'Utrecht, San Salvator a passa ansema a tut ël Monfrà al Ducà 'd Savòja 'd Vitòrio Medeo II, che pì tard a dventa Regn ëd Sardëgna. D'apress a l'época dla dominassion fransèisa ëd Napoleon Bon-a-part, dël 1814 a torna ant ël Regn ëd Sardëgna col tìtol ëd Borgh Regio e a l'é aministrà sota a la Division (peui Provinsa) ëd Lissandria, a la Provinsa (peui Sircondari) ëd Lissandria e a l'é a cap d'ën Mandament comprendent ëdcò Castlèt Monfrà e Lu. Për des dì dai 30 d'avril 1859 a së stabiliss a San Salvator ël Quarté General ëd l'Armà Sarda, comandà dal re Vitòrio Emanuel II. Ai 3 ëd magg ël re a monta an sla Tor dël Paleòlogh për vardé da leugn le maneuvre dle trupe austrìache ant la Sconda guèra d'Indipendensa. Dël 18 d'otóber 1894 a oten ël tìtol onirìfich ëd Sità. Aministrassion Ël sìndich a l'é Enrico Beccaria (dal 06/06/2016). Sità gemelà San Salvator a l'é gemelà con: Agerola, Italia Anliure esterne Sit istitussional Arferiment Panorama con la Tor dël Paleòlogh

Aiuto per la lettura Ayuda para la lectura Help for Reading Rintré ant la Piòla Contaté j'Aministrator Lìber për Amprende Coression ortogràfica Tastadura piemontèisa Portaj e Proget Agiut pr'ij Contributor Travajòt sempi