Isber

Èn isber, k' on pout lomer eto « ene montinne di glaece », c' est èn eshonna di glaece dins les mers ey oceyans k' est dins eyet so l' aiwe.

Les isbers vegnnut foiravant di l' Antartike eyet do Greunlande.^[1]

Etimolodjeye

El mot « isber » vént d' deus mots neyerlandès : « ijs » eyet « berg » ki volnut dire « glaece » eyet « mont ». C' est sovint ciste oridjene la k' est riprindowe dins les lingaedjes. Totfeye, vla k' des lingaedjes n' uznut nén on derivé d' èç mot la. Inte di yeusses, li latén, wice k' isber s' dijhnut purade « mont di glaece », dj' ô bén « Mons glacialis ».

Grandeurs

Definixhaedje internacionå

Li clasmint des isbers dipind di l' International Ice Patrol. Ki l' adierça principå, c' est d' houwer èn acmaxhaedje inte ene montinne di glaece ey on batea.^[2]

Tåvlea des isbers sorlon li clasmint di l' *International Ice Patrol* :
No^[3]	Hôteur^[3]	Longueur^[3]	Aire	Masse
Grôlere (Growlere)	< 1 m	< 5 m	< 20 m²	< 120 t
Isberon (Bergy bit)	1 m ≤ X ≤ 5 m	5 m ≤ X ≤ 15 m	20 m² ≤ X ≤ 300 m²	120 t ≤ X ≤ 5.400 t
Isberet (small iceberg)	5 m ≤ X ≤ 15 m	15 m ≤ X ≤ 60 m	> 300 m²	5.400 t ≤ X ≤ 180.000 t
Isberea (medium iceberg)	15 m ≤ X ≤ 45 m	60 m ≤ X ≤ 120 m	//wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///	180.000t ≤ X ≤ 2 x 10^6 t
Grandisber (large iceberg)	45 m ≤ X ≤ 75 m	120 m ≤ X ≤ 200 m	//wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///	2 x 10^6 t ≤ X ≤ 3 x 10^7 t
Foirtisber (very large iceberg)	> 75 m	> 200 m	//wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///wa.wikipedia.org///	> 3 x 10^7 t

Definixhaedje francès

E francès, cwand èn isber est pus ptit k' cénk metes di longueur, on-z el lome on « bourguignon ». Inte cénk eyet cwénze metes di lon, on-z el lome puvite on « fragment d'iceberg ». Dj' ô bén, på ratournaedje literå, on « boket d' isber ». Dins ci lingaedje la, fåt ki l' eshonna di glaece åye, å moens, cwénze metes po-z esse erconoxhou come èn « iceberg ».^[4]

Definixhaedje inglès

E-n inglès po k' èn eshonna di glaece soeye erconoxhou tot-z estant ene montinne di glaece, i doet fé, å moens, cénk metes di lon. Les eshonnas di glaece pus ptits sont lomés « growler » ubén « bergy bit ». On « growler » fwait moens di deus metes di lon. Tot rwaitant on « bergy bit », ès longueur est inte el ci do « growler » eyet do definixhaedje inglès di l' isber.^[1]

Ricoird

Les isbers savnut esse grand. El pus lon, lådje eyet spès, c' est l' Isber B-15. On-z el a veyou e 2000, do costé di l' Antartike. Il esteut lon di 295 km, parfond di 37 km ey il aveut ene stindêye di 11 007 km². Li dierin côp k' on l' veyou, c' esteut e 2011.^[5]

Coleurs

La pupårt des isbers sont blancs avou on pô di bleu. Poirtant, sorlon les rîles del fizike, i doevnut normåldimint esse bleus.^[6] C' est a cåze d' ès compôzucion k' les isbers sont blancs avou ene miete di bleu. Dj' ô bén : del nive eyet del glaece des glaecîs.^[7]

Tenawete, i polnut esse completmint bleu^[7], vert^[6]^[7], u co djaene^[6]. Virpus k' telcôp k' il ont deus coleurs al môde d' ene gåde-a-roye. Les vetès montinnes di glaece si trouvnut seulmint do costé di l' Antartike.^[8] Li grande diferince, c' est k' ces isbers la, i n' ont pont d' bouye, contråvmint ås ôtes. Avou ça k' i sont compôzé d' aiwe d' mer djalêye. Houte di çoula, sacwants elemints djouwnut eto so leu vete coleur.^[7]

Po les isbers avou des coleurs al manire d' on zebe, on-z elzès ritrouvnut seulmint e-n Antartike. I sont askepyîs avou l' enancraedje di l' aiwe d' mer dins des bîleures astampêyes.^[7] Les ales savnut afeye dner des vetès royes åzès montinnes di glaece tins d' leu crexhince dsu mins so les bokets dins l' aiwe.^[9]

E-n Artike, les isbers polnut divni blanc ubén bleu, si leu nivaye fondnut. Ådzeu d' ça, les blankès montinnes di glaece avou ene miete di bleu sont råle. Dandjreus k' i sront co pus råles avou les candjmints climatikes.^[6]

Fômes

Djenerålmint, les isbers ont dijh å cint d' leu stindêye ådzeu d' l' aiwe, pindant k' les nonante å cint sont padzo.^[10]^[11]

On conte shijh fômes d' isbers. Les fômes n' ont rén a vir avou les grandeurs u co les coleurs des montinnes di glaece. Les nos inte les åtchetes vegnnut di l' inglès eyet do neyerlandès :

Tabulare (Tabular ubén ijsschots eyet vlakke vorm) : les tabulares ont l' fôme d' ene tåve.
Wigue (Wedge eyet wig) : ces montinnes di glaece la rshonnnut a des otos d' coûsse wice ki les dvants sont plats.
Dôme (Dome eyet koepel) : ces isbers la rshonnnut a ene cloke.
Drôdoke (Drydock eyet droogdok) : el fôme rshonne al ci di sacwants bateas.
Pinakele (Pinnacled eyet pinakel) : gn a des teras come so des monts.
Bloki (Blocky eyet blok) : ça rshonne mo a on rectangue e dessén.

Les discrijhaedjes des fômes si trouvnut dins el lisse padzeu.

Nateure

Tchimin

Les tchimin shuvous pa ces tchôzes la sont shuvou på sincieus specialisses d' èç dominne la. Pacô, c' est po-z aveuri si les montinnes di glaece n' sont nén riscantes po l' biyovaryisté.^[12] Les isbers ki vegnnut do Greunlande, do Levant do Canada u co del Bijhe di Mer do Nôr, s' evont viè l' Coûtchant di l' Irlande, li Rweyåme-Uni eyet do costé di Mer Mantche.^[13] Tot å lon d' leu voye, les isbers divegnnut d' pus e pus ptits, veyånmint k' el vint shoufele dzeu, k' i s' copårtî avou les ans yet sins conter k' i fondnut eto.^[14]

Candjmints climatikes

Avou les candjmints climatikes, i gn a d' pus e pus d' isbers ki vegnnut.^[15] Aprume di l' Antartike, ç' ki fwait k' ci continint la est ki piede si stindêye.^[16] Totfeye, les isbers ki vegnnut des pôles n' sont nén todi a cåze des candjmints climatikes.^[17] C' est l' veur po èn isber ki s' a dislaxhî do platea d' glace å moes d' djanvî 2023, k' esteut pus grand k' el province do Roman Payis. Dj' ô bén, aviè 1.550 km², 400 km² di pus k' ci province la.^[18]

Si djamåy èn isber va dins des mers ubén des oceyans wice k' i fwait pus tchôd, i polnut fonde. On-z a les pinses k' el vicance d' ene montinne di glaece, inte li moumint wice ki li prumire nive a tcheyou sol glaecî eyet l' tins k' i fondnut est di troes meyès anêyes.^[19] Avou les candjmints climatikes, gn a kécfeye des isbers ki sacramintnut des moxhons, come les « sfénixhifômes » ([LA] Spheniscidae).^[20]

Biesses

Les isbers savnut afeye catibuler les ecosistinmes, come e candjant les corants marins u co e sacramintant les biesses ki vicnut dins les mers ey oceyans cwand les montinnes di glaece dmeurnut astok.^[21] Gn a ossu l' risse k' des biesses dmeurnut blokêyes sont èn isber.^[22]

Djintrinnté

Risses

Al copete do mårtchî, l' aiwe des isbers ki vont dins les mers ey oceyans fijhnut discrexhe el salinitêye.^[23] Les isbers n' ont nén seulmint ene poûssance so les biesses eyet les plantes, mins so les djins eto. Come di djusse, des veyes eyet des viyaedjes avént ddja dvou esse evacuwer, pask' ene montinne di glaece s' a raprepyî di trop.

E 1912, li Titanic, on grand batea a stî evoyî å fond d' l' aiwe pa èn isber. Edward John Smith, el captinne do batea daléve si télmint rade ki n' aveut nén savou houwer l' acmaxhaedje.^[24] Ouy, c' est moens dandjreus d' si prinde ene montinne di glaece, gråce a l' tecnolodjeye k' on-z a, mins ça arive co tenawete.^[25] Fådreut bouter k' avou, eviè, nonante å cint d' ès stindêye dzo l' aiwe, les isbers sont foirt nén-veyåves.^[11] Po houwer ces rujhes la, on-z uze volti el sistinme GPS po-z awè pus åjhey a lzès trover.^[19]

Lingaedjes

El mot « isber » est ossu uzé po d' ôtès tchôzes, inte di yeusses l' Etrernete. Come di djusse, çk' on lome li « clear web » fwait sondjî å boket del montinne di glaece ådzeu d' l' aiwe, pindant k' les « deep web » eyet « dark web » sont les bokets ki sont dzo l' aiwe, virpus dins les « abisses » des waibes.^[26]

Sins conter k' des lingaedjes, come l' inglès ey el francès, ont des fråzletes avou ci mot la :

« Tip of the iceberg » ki dene på ratournaedje literå « Tera di l' isber » : fråzlete e-n inglès ki mostere el boket d' ene estance, sovint d' ene rujhe, k' on sait vir.^[27] Li francès end a ene sifwaite : « La partie visible de l'iceberg » ki dvént e walon « Li boket veyåve di l' isber ».
Tot rwaitant li lingaedje da Molière, on-z uze puvite li fråzlete contråve : « La partie cachée/émergée/immergée de l'iceberg ».

El prumîre fråzlete est foiravant corante dins les lingaedjes tîxhons come veyou padzeu, mins eto e-n almand ey e neyerlandès. Mins nerén, la k' elle egziste e portuguès, e roumin, insi k' e polonès ossu. El deujhinme, on l' ervoet k' e spagnol.^[28]

Coleur

L' isber, c' est ossu l' no d' ene coleur. Ès côde éndjolike, c' est « #71A6D2 ». La k' li bleu eyet l' vert sont les deus mwaissès coleurs avou, po tchaeke, 82,35 % eyet 65,1 %.^[29] Foû des coleurs éndjolikes, l' isber shonne esse inte li gris eyet l' vert.^[30]

Hårdêye difoûtrinne

Waibe ewou çk' on pout ponde èn isber eyet vir comint i s' codût avou l' aiwe.

Pî-note

Mwints noûmots ont stî askepyîs tins d' escrijhaedje di l' årtike. Vir li pådje copene po sawè cwè.

Po des linwincieusès racsegnes sol mot "Isber", alez s' vey sol Wiccionaire

Referinces eyet sourdants

[:0-1] 1,0 et ^1,1 https://www.antarcticglaciers.org/glacier-processes/glacier-types/icebergs/

[2] ttps://www.navcen.uscg.gov/international-ice-patrol-about-us

[:1-3] 3,0 ^3,1 et ^3,2 https://www.researchgate.net/figure/Iceberg-size-classification-defined-by-the-International-Ice-Patrol_tbl1_334379015

[4] ttps://www.canada.ca/fr/environnement-changement-climatique/services/previsions-observations-glaces/conditions-glaces-plus-recentes/services-educatifs/icebergs/formes-tailles-couleurs.html

[5] ttps://www.worldatlas.com/articles/the-10-largest-icebergs-ever.html

[:2-6] 6,0 ^6,1 ^6,2 et ^6,3 https://news.cgtn.com/news/3d3d774e78456a4d30457a6333566d54/share_p.html

[:3-7] 7,0 ^7,1 ^7,2 ^7,3 et ^7,4 https://www.abc.net.au/news/science/2018-03-22/not-just-white-what-makes-icebergs-blue-green-striped/9546940

[8] ttps://news.cgtn.com/news/3d3d774e78456a4d30457a6333566d54/share_p.html

[9] ttps://oceanservice.noaa.gov/facts/iceberg-color.html

[10] ttps://www.usgs.gov/media/images/ninety-percent-iceberg-below-waterline

[:4-11] 11,0 et ^11,1 https://parlonssciences.ca/ressources-pedagogiques/activites-pratiques/quelle-proportion-dun-iceberg-depasse-de-leau

[12] ttps://www.bbc.co.uk/newsround/64938674

[13] Barker, Stephen & Chen, James & Gong, Xun & Jonkers, Lukas & Knorr, Gregor & Thornalley, David. (2015). Icebergs not the trigger for North Atlantic cold events. Nature. 520. 333-6. 10.1038/nature14330.

[14] ttps://earthsky.org/earth/iceberg-b15z-antarctica-ross-ice-shelf/

[15] ttps://www.britannica.com/science/iceberg/Climatic-impacts-of-icebergs

[16] ttps://www.lalibre.be/planete/environnement/2023/03/16/images-impressionnantes-un-gigantesque-iceberg-plus-grand-que-le-brabant-wallon-sest-detache-de-lantarctique-video-COJ2MUTONNAG7EM3FPMXTWCHWM/

[17] ttps://www.rtbf.be/article/antarctique-un-immense-iceberg-se-detache-de-la-banquise-mais-cela-ne-serait-pas-du-au-rechauffement-climatique-11141541

[18] ttps://www.francetvinfo.fr/monde/environnement/antarctique-un-immense-iceberg-grand-comme-15-fois-la-taille-de-paris-s-est-detache-de-la-banquise_5619233.html

[:5-19] 19,0 et ^19,1 https://education.nationalgeographic.org/resource/iceberg/

[20] ttps://www.ouest-france.fr/environnement/rechauffement-climatique/a-cause-du-rechauffement-climatique-un-iceberg-geant-menace-des-colonies-de-manchots-sur-une-ile-7041387

[21] ttps://www.sciencesetavenir.fr/nature-environnement/un-iceberg-a-la-derive-entraine-des-evacuations-au-groenland_125871

[22] ttps://www.cbc.ca/news/canada/newfoundland-labrador/arctic-fox-rescue-iceberg-1.4720525

[23] ttps://www.futura-sciences.com/planete/actualites/terre-voici-premieres-images-iceberg-geant-derive-ocean-austral-104087/

[24] ttps://www.lepoint.fr/societe/titanic-le-naufrage-aurait-pu-etre-evite-13-04-2012-1451387_23.php

[25] ttps://safety4sea.com/titanic-threat-do-ships-still-hit-icebergs/

[26] ttps://lesresoteurs.fr/face-cachee-de-linternet-deep-web-liceberg-dinternet/

[27] ttps://blogs.missouristate.edu/international/2020/05/27/idiom-tip-of-the-iceberg/

[28] ttps://www.expressio.fr/expressions/la-partie-cachee-immergee-de-l-iceberg

[29] ttps://encycolorpedia.com/71a6d2

[30] ttps://www.benjaminmoore.com/en-us/paint-colors/color/2122-50/iceberg

[1]

[2]

[3]

[4]

[5]

[6]

[7]

[8]

[9]

[10]

[11]

[12]

[13]

[14]

[15]

[16]

[17]

[18]

[19]

[20]

[21]

[22]

[23]

[24]

[25]

[26]

[27]

[28]

[29]

[30]