Bernadina Growell
Bernadina Growell-Kock (☆ 27 di februari 1939 na Aruba - † 22 di januari 2009), tambe conoci como “Flor di Brasil” o “Mama di Cultura”, tabata un cantante y compositor Arubano.[1]
Bida
[editá | editá fuente]Growell a nace dia 27 di februari 1939 como yiu di Francisco Kock y Bonaventura Kock-Geerman. E famia tabatin shete yiu, cuater yiu muhe y tres yiu homber. For di chikito Growell tabata canta den coro di misa. Cu su 12 aña e tabata actua y canta na scol tambe.[1] Banda di cantamento e tabata toca guitara, cuarta, harmonica y orgel. Cu 15 aña el a cuminsa compone; su prome cantica tabata “Un Soño”. Un aña despues el a forma e trio “Las Campiranas”, hunto cu su ruman muhe Mariana Kock y Lucrecia Stamper.
Na 1965 Bernadina ta casa cu Cecil Growell, kende tabata integrante di Sensacion del Caribe, un banda legendario di Aruba.[2]. Como compositor fiho di e banda Bernadina tabatin un papel importante den e exito di Cecil y e grupo.
Carera artistico
[editá | editá fuente]Growell a compone mas cu 700 obra, consistiendo di piesanan musical pa Carnaval, Pasco, Dia di Mama y pa misa.[3] Na 1977 e tabata e prome hende muhe pa participa den e Festival di Tumba di Aruba, unda el a canta su propio composicion "Galiña den Carnaval".[4] Na 1982 e ta saca su prome disco LP, titula "Un Sono" y produci na e studio di Radio Kelkboom. E LP aki ta contene 10 cantica na Papiamento.[5] Growell tambe a lanta, dirigi of forma parti di diferente grupo folklorico, manera grupo di aguinaldo y di gaita, cu tabata duna show na diferente hotel.
Reconocemento
[editá | editá fuente]Na 1997 Growell a ricibi un condecoracion como miembro den Orden di Oranje-Nassau.[2] Na 2001 minister di Turismo, Lily Beke-Martinez, a reconoce Growell como ‘Mama di Folklore y Cultura di Aruba’.[2] Na 2011 a duna un caya den bario di Brasil su nomber: Caya Bernadina Growell-Kock. Anualmente, cu excepcion di un par di aña, fundacion Bernadina Growell-Kock ta organisa na Brasil un festival di canto tipico dedica na Bernadina Growell-Kock.[6]
Referensia
|