Wrestling

Der Artikl is im Dialekt Soizkaummaguadlarisch gschriem worn.

tippische Wrestling Kulissn bei WrestleMania

Wrestling (deutsch: Ringen) wiad im deitschn Sprochraum a oft ois Catchen bezeichnet (des kimmt vo da Bezeichnung Catch Wrestling). Es is a populäre Show-Sportort, wobei s' Wrestling in gesaumt Noadamerika und a in Japan (do voroim de Hardcore Matches) am populärstn is. In Deitschlaund und Esdarreich nimmt d'Berühmtheid vom Wrestling a ollaweil mea zua. De meistn Leod moanan, dass beim Wrestling nix passian kau, wei sowieso ois gstöt is (oiso ois ogschprocha), des is owa so ned richtig, wei schau de kleanste Fehlanwendung geng an aundan Wrestla bei de Wrestlingmoves reichd und dea kau si ernsthoft valetzn. Deswegn miassn Profi-Wrestla eanare Tricks und Moves sehr laung trainian, damid sowos ned passiad. Da Siega bei an Wrestlingmatch stehd fost imma schau voahea fest, es wiad owa während de Matches schau improvisiad, oftmois daun waun si a Wrestla nimma an de vorgegebnen Choreographien erinnan kau.

WWE Elimination Chamber Match vom New Year's Revolution PPV in New York City

D'Vamoaktung vom Wrestling und da Aufstieg vo de Wrestla zu Wödstars

Zua heitign Zeit is des Wrestling a gschickt vamoakts Gesaumtprodukt. De gräßte Wrestlingliga, de WWE hoaßt, is soga aun da Börsn und hod do Umsätz bei wohrscheinli 400 Millionen Dollar alloa im Joar 2006 ghobt. Vü WWE Wrestla ham daun späda a Füm und Feansehrolln augnumma. Wobei de bekauntestn von de da Hulk Hogan und da Dwayne Johnson alias The Rock san. Da John Cena bringt zB. Rap CDs aufn Moakt, da Mick Foley Kindabiacha. Unbekauntare Ligen wia de TNA oda de Indy-Liga Ring of Honor kinan eanare Supastars ned soiche steiln Karrieremeglichkeitn aussahoib vo da promotioninteanen Fanbasis bietn.

Bekaunte Wrestla san oda woan: Hulk Hogan, The Rock, Kurt Angle, The Undertaker, Triple H, Andre the Giant, Chris Benoit, Ric Flair, John Cena, Sting, Chris Jericho und da Shawn Michaels.

Da Hauptsitz vo da WWE in Stamford Connecticut

D' WWE ois Moaktfiahra vom Professional Wrestling und vom 'Sports Entertainment'

D' WWE ois soiche gibts schau ziemlich laung (seid 1952) owa da echte Aufstieg is eascht kema, wia da Vince McMahon vo seim Vota 1980 de Titan Sport Inc. und 1982 a de CWC okauft hod und da Vince McMahon daun a WWE (damois nu WWF) Chef woan is. Moßgeblich zum Aufbau vom Wrestling hod da Hulk Hogan beitrogn, dea de WWE mid seina Ausstrohlung und seim Gimmick boid national und daun späda intanational bekaunt gmochd hod. Vo 1993 bis 1995 wor d' WWE in ana Krise wegn an Steroidn Skandal, damois wor d'WWE fost Bankrott gaunga und da McMahon hod si ois sofoatige Notmaßnahme dazua äntschlossn de Gehälta vo de Wrestlingstars um bis zu 40% z' varingan, des ham se owa vü Wrestla ned gfoin lossn und san zua WCW gwechslt. De WCW wor daun bis zum End vo de 90er Joar da Hauptkonkurrent vo da WWE und hod de Liga zu dem Zeitpunkt in de TV Ratings (Eischoitquotn) üwahoit, trotzdem hod de Liga duach a foische Backstagepolitik wegn Bankrott zuaspean miassn und is daun vo da WWE aufkauft woan. A aundara owa ned so eansta Gegna wor de ECW, de oba ebenfalls Bankrott wor und 2006 vo da WWE wiedabelebt woan is. Danoch hods fost a WWE Monopol gem, wei koa Wrestlingliga (wia zB. Ring of Honor) da WWE Konkurrenz mocha hod kina. Seid a poor Joar kimmt owa TNA Wrestling mit ehemolige WWE und WCW Superstars wie an Kurt Angle an Kevin Nash an Sting oda an Booker T oiwei bessa daher und mocht da WWE laungsam ernsthoft a Konkurrenz.

De Zügruppm vom Wrestling

De Zügruppm vom Wrestling san hauptsächli de junga Leit zwischn 10 und 30. Friaha wor Wrestling seah stoak auf Maunapublikum obgstimmt, middlaweile vasuacht ma owa a schau de Frauen fias Wrestling z' begeistan. Trotzdem is da greste Tei vo de Fans imma nu männlich.

Ring entrance

Da Triple H und da Jeff Hardy mochn eanan Entrance

Olle wichtign Wrestla ham a gscheide Entrance (Eintritt) mid dem sa se beim Publikum voastön, und bei dem se s' Publikum mid dem Wrestla identifiziern kau. A Entrance wiad meistns vo Musik und Pyrotechnik begleit. Vü Wrestla, hauptsächli de vo da WWE ham eana Musik und den Text dazua extrig vafosst kriagt, des hoaßt so vü wia - ea is extrig fia de Wrestla komponiad woan. Seid de 80'a is de Entrance mid ana Musik imma populära woan, gresstnteils resultiat des ausm großn Eafoig vom Hulk Hogan und vo da WWE Rock n' Wrestling Initiative. A Ring Entrance kau a nu wos ondas beinhoitn:

• a Eröffnungsgeräusch voa da eigntlichn Entrance Musik zum Beischpü de schebandn Biakriag vum Stone Cold Steve Austin oda de Kiachaglockn vum Undertaker
• Feiawerke oda Nebl;
• a komplete oda a teiweise Obdunklung vom Stadion. Guade Beispiele waradn do da Triple H, The Undertaker, und da Kane;
• A Wrestla wiad vo an Manager oda an Üwasetza begleit. Wia zB. da Great Khali midn Ranjin Singh oda da Big Daddy V min Matt Striker
• Wrestla de mid an Auto oda an aundan Gerät zum Ring keman, wia da Hollywood Hulk Hogan, da JBL und da Eddie Guerrero

De großn Stars wia da Triple H und da Undertaker kenan se bei eanare Ring Entrances oftmois soga bis 3 Minutn zeitlossn. Desweng iss ned sötn, dass a Entrance länga dauat wias Match söwa.

Wrestling-Fochbegriffe

Da Brock Lesnar

Babyface und Face:

De Babyfaces san de „Cleanen“ (Wrestla ohne unfaire Tricks) unta de Wrestla. Sie ham a symphatischs Auftretn und san so quasi de Guadn. Bekaunte Faces san: Hulk Hogan, Batista, Undertaker, Rey Mysterio, John Cena und da Kurt Angle

Dog Team Matches:

Meistns tretn zwoa 'Dogs' gegeneinaunda au. Oa Dog besteht aus zwoa Leid, de se gegenseitig abklatschn kinan. Des Abklatschn hoaßt, dass gwechslt wead. In England is des Dog Team Wrestling sehr populär. Bekaunte Dog Teams san oda worn de Hardy Boys (Matt Hardy & Jeff Hardy), Cade n' Murdoch und Paul London & Brian Kendrick.

Hardcore Matches:

Bei Hardcore Matches gehts oft ziemli brutla zua. Es derf dort mid Sessln und Loatan zuagschlogn wern, ausssadem derf ma Stacheldrat vawendn und Reisnägl strahn. Japan is bekaunt fia sei Hardcore Wrestling. In de USA wor vorollem de ECW sehr auf Hardcore ausgricht. Bekaunte Hardcore Wrestla san da Mick Foley da Sandman und da Tommy Dreamer

Heel:

De Heels san des beße Pendant zu de Faces. De Heels vawendn unfaire Kaumpftaktikn, wia zB. Augnstecha, Tiafschläg und benutzn unerlaubt Woffn, wos ma ois „Dirty“ bezeichnet. Bekaunte Heels san: Randy Orton, Ric Flair, Edge, Hollywood Hogan, Mankind, William Regal und JBL

Jobber:

Jobber san de Wrestla de fia Göd geng aundane bekaunte Wrestla valiern miassn um de damit 'over' z' bringa. Edeljobber san eigntli des gleiche jedoch deafn de a hin und wieda gegn an Gegner gwinna oda in an Match eana Können beweisn. Es hod a Jobber Dogs gebn wies World's Greatest Dog Team midn Charlie Haas und an Shelton Benjamin.

Main Eventer:

De Main Eventa (Hauptmatch) san oftmois de Quotnzugpfead vo de jeweilign Shows und ham deswegn eanare Matches im Main Event. Bekaunte Main Eventa san da Dave Batista, da Undertaker oda da Kurt Angle (TNA)

Marks:

Marks san de Fans, de ned wissn, dasss Wrestling inszeniad is. De Marks san meistns de gaunz Jungen, de wos de ois 'Faces' doagstodn Wrestla aufeian, de 'Heels' owa ausbuhn. De meistn Wrestlingfans worn friaha amoi Marks und song dass des de schenste Zeit ois Fan wor.

Midcarder:

De Midcard is da middlare Bereich vo ana Show, in dem Wrestler autretn, de a gringeren Status ois de Main Eventer hobn. Deswegn weadn de Wrestla a Midcarder gnennt. Es gibt oftmois eigane Titl fia Midcarder, z. B. da WWE Intercontinental Championship. Bekaunte Midcarder san da Rob Van Dam da Dave Finlay da MVP da Chris Jericho da Great Khali oda da JBL

Overselling:

Overselling hoaßt, wenn Wrestla auf Schläge oda Tricks vo de Gegner übatriebn reagiern, und des so ausschaut wie ois ob da Gegner vui Kroft hod oda bsundas stork is. Oftmois findt s'Overselling bei Wrestla statt de gegn Riesn kämpfn, damit denen eanare Schläg bsundas stark ausschaun. Overselling hods hauptsächlich in de 90er gebn, deswegn betreibn Wrestla de eanan Höhepunkt in dera Zeit ghobt hobn oftmois a übatriebnes Overselling. Da bekauntaste Overseller is woi da Shawn Michaels

Smart Marks:

Da Smart Mark oda Smark is quasi de „Foigeform“ vo de Marks. Se san se darüba bewusst dass Wrestling inszeniad is. Wrestler wia da Dean Malenko oda da Chris Benoit san (bzw. woan) zwor exzellente Techniker, owa eha schwoche uncharismatische Dorstella, deswegn san denen eanare Fans eha de Smart Marks, während aundane Gimmick-Wrestler wia da Undertaker oda da Batista öfta vo de Marks megn wern. „Monster-Heels“ wia da Great Khali dagegn keman in da Regel üwahaupt ned bei de Smarks au, wei de, wie da Khali oftmois fost koa Können hom.

Tweener:

De Tweener san meistns de Wrestla de weda richtig clean nu richtig dirty (unsaubare Kampfweisn) san. A bekaunta Tweener wor da Chris Benoit

Undercarder:

San meistns de Wrestla de nu ned den Sprung in de Midcard gschofft hom. Oftmois san Undercarder Leid fia de ma koa gscheide Vawendung findt. A tippische Undercarder Show wor WWE Heat. tippische Undercarder san oft Jobber oda Leid wie da Snitsky, Super Crazy, Charlie Haas, Mike Knox, Stevie Richards, Jimmy Wang Yang Paul London und Vladimir Kozlov

Uppercarder:

Uppercard is da obare Bereich vo ana Show an der Schwön zum Main-Event. De Uppercarder san Wrestla de no ned so populär san wia de Main Eventa oba kurz voa eanan Durchbruch stengan.

Wrestling aussahoib vo da USA

Deitschlaund

Bis ind Mittn vo de 90a Joar hods Catchn, wias Wrestling in Eiropa gnennt wiad große Halln gfüd. Da Untaschied zun amerikanischn Wrestling wor, dass spoatlicha zuagaunga is. Aussadem hods aundane Regln gem, wias Rundnsystem und de göbn und rodn Kortn. Heitzdog is de Ort vum Wrestling sötn woan und wiad neta nu bei bestimmte Matches und Promotions braktiziad (wia bei da European Wrestling Promotion).

Vü Wrestla, de eanan Durchbruch in da USA ghobt ham, ham eana Grundwissn bei de Catchtuniere vo da Catch Wrestling Association griagt. Große Städt, wos soichane Tuniere gem hod, woan Wean, Hannover, Hamburg, Bremen und Dortmund. Da bekaunteste und eafolgreichste deitsche Wrestla is da Alex Wright. Da Alex hod 9 Joar (1994–2003) long in de USA fia d'WCW gorweit. Da Wright hod sei easchts Match a bei da CWA ghobt. Seid Jenna 2007 hod a a eigane Wrestlingschui de „The Wright Stuff“ Pro Wrestling School hoaßt [4] und in Nürnberg stähd. Da is oiso nua oa Wrestlingschui in Bayern.

Heitige Lign san u. a. de GWP de in Schwabach bei Nürnberg ihre Events hod, d'European Wrestling Promotion in Hannover, westside Xtreme wrestling in Essen, d'German Stampede Wrestling im Saualaund, de NEW aus Heßdorf und d'ACW in Weinheim, de alle guade Shows bringa. In de letztn Joar hods mehrare Auftritte vo amerikanische Indy Wrestla in de deitschn Lign gem.

Englaund

Wrestling in Eiropa findt ma meistns in Deitschlaund und Englaund. Da Stü vo da britischn Wrestling-Szene is traditionell und tächnisch oriendiad. Da Slogan vom britischn Wrestling is „We wrestle!“. Generell ham de britischn Wrestla koa bsundane Attackn um a Match z'gwina, dafia owa vaschiedane Aufgobegriff um a Match z'gwina. In de 50a Joar is in in Englaund s'Rundnsystem eigfiad woan, de fünf minutn dauat ham. Aussadem hods damois vü „2 out of 3 Fall Matches“ gem, des hoast, waunst gwina wüst, muast dein Gegna zwoamoi besiegn. Bekaunte britische Wrestla san da William Regal aus Blackpool, da Dave Taylor und da Dave Finlay aus Noadirlaund.

Estarreich

Bis zua Einstellung in Deitschlaund und Estarreich im Joar 1998 wor d'CWA de wichtigste estarreichische Liga. Se is vo de legendärn estarreichischn Wrestla Georg „Schurl“ Blemenschütz bzw. späda vom Otto Wanz gfiad woan. Große Popularität hods Catchn am Heimorkt aufm Ploth vom Weana Eislaufvarein ghobt.

Seid 1998 vasuacht d'WSA des Loch auszfün. Ois oanzige Liga in Estarreich mid ana reglmäßign TV Show (Wrestling Fightnight seid 2006) aufn OKTO und steignde Zuaschauazoin, hams gschofft s'Turni am Heimoakt neich z'vaaunstoitn, sodass ob Juli 2009 wieda an jedn Summa a 5-Toges-Turnia gem wiad.

Japan

S' japanische Wrestling wiad ois Puroresu bezeichnet. Im Vagleich zua Laundesgress und da Bevökarungszoi gibts in Japan a hohe Dichtn vo eafoigreiche Wrestlingpromotions. De Erfoigreichstn san New Japan Pro Wrestling vom Antonio Inoki und Pro Wrestling NOAH. Im Vagleich zum US-amerikanischn Wrestling wiad neta bei kleanare Vaonstoita auf greßane Schoweinlogn gsedzd. De gräßan Lign woin owa des Büd vom hortn und spoatlichn Wettkompf aufrechtdahoidn. S'Puroresu güt ois de Bruadstätt vom Mixed Martial Arts Boom, dea owa laungsam s'japanische Wrestling vadrengt.

Mexiko

S'lateinamerikanische Wrestling wiad oigemein ois Lucha Libre bezeichnet und is bsundas in Mexiko populea. Im Vagleich zun klassischn US-amerikanischn Wrestling wiad im Lucha Libre vü mea auf schnöle Bewegungsobfoign und akrobatische Einlogn gschaud. De meisten mexikanischn Wrestler trogn a Maskn, de ois Eisotz in wichtige Matches heagnumma wean kau. Da Verlust vo da Maskn is de greßtmegliche Demütigung vo an Luchador. De greßte Legendn vom mexikanischn Wrestlings is da El Santo, dea schau laung noch seim Tod imma nu ois a Ort Voikshöd gfeiat wiad. Da eafoigreichste Star vom Lucha Libre is momentan da Místico.

A boa Wrestling Kampftechnikn

Da Hardcore Holly mocht an Armbar

Ochtung: Olle aufzöhdn Moves und Holds san fia Laien gfährlich und ned zua Nochahmung empfoin.

Ankle Lock

Beim Ankle Lock wiad da Fuaßknöchi vom am Bodn liegadn Gegna „vadraht“ und iwadehnt. Da Ankle Lock wiad oftmois foisch Angle Lock gnennt. Des kimmd vom Wrestla Kurt Angle, dea den Move ois Finisha vawendt.

Armbar

Bei dea Aktion kau da Gegna in stehada, liegnda oda knierada Position zua Aufgob brocht wean.

Bear Hug

De Aktion wiad dafia augwendt um an Gegna de Luft obzschneidn und eam so zua Aufgob zu zwinga.

Body Scissors

Bei de Body Scissors schliaßt da ausführnde Wrestla d'Haxn uman Rumpf vo seim Kontrahentn.

Boston Crab

Da Wrestla greifd se d'Haxn vo seim am Bauch liegndn Gegna, hebts au und üwadehnt eam dadurch d' Bauchmuskin. An Chris Jericho sei Finisher Walls of Jericho is a Elevated Boston Crab.

Chokehold

Da Chokehold bezeichnet an Griff, dea darauf abzüt, am Gegna d' Luft obzschnian.

Clawhold

Beim Clawhold greift da Wrestler an Koobf vo seim Gegna mid oana Haund und übt an Druck auf eam und bsundas seine Schläfn aus.

Cobra Clutch

Da Wrestler pockt si sein stehadn Gegna vo hintn und ziagt den oanen Orm üwan' Hois vo seim Kontrahentn.

De „Creative-Control-Klausl“

Da Hollywood Hogan mocht sein Entrance

De Creative Control Klausl griagn oft neta de ödan und erfoigreichn Wrestla. De Creative Control Klausl, is a „kreative Kontrolle“ üwan eiganen In-Ring Charakta. Es gibt junge Wrestla de oftmois vaschwindn, damids a poa Monad späda mid vaändata Frisua, Naum und Ringgimmick wieda zruckkeman, sowos is bei ödare Wrestla wia an Hulk Hogan oda an Ric Flair näd meglich. De Klausl is vastärkt während de Quotenkriage zwischn da WWE und da WCW gnutzt woan, ums obwandan vo de Worker (Wrestla) zua Konkurrenz z'vahindan.

Wia de WCW pleite gaunga is und durch d' WWE aufkauft woan is, san de Rechte vo de Wrestla deitlich eigschränkt woan, wei de Wrestla a Druckmiddl gföd hod. Des kinat owa aundas weadn, waun de TNA ihrn Aufschwung fortsetzt.

Lignvazeichnis

Siagst unta: Wrestlingverbände

Naum	Kiazl	Staundort	Zeitraum	Bsundares
Athletic Club Wrestling	ACW	Deitschland	1998-
All Japan Pro Wrestling	All Japan	Japan	1972-
American Wrestling Association	AWA	USA	1960-1991	Nimma existierade, ehemols bekaunte Liga.
Asistencia Asesoría y Administracion	AAA	Mexiko	1992-
Big Japan Pro Wrestling	Big Japan	Japan	1995-
Chaotic Wrestling	CW	USA	2000-
Chikara Pro Wrestling	Chikara	USA	2002-
Combat Zone Wrestling	CZW	USA	1999-	Hardcorelastige Liga
Consejo Mundial de Lucha Libre	CMLL	Mexiko	1933-	Bekaunteste Liga vo Mexiko
Deep South Wrestling	DSW	USA	2000-2006	Ehemolige Farmliga vo da WWE, middlaweile zuadraht.
Deutsche Wrestling Allianz	DWA	Deitschland	2002-
Eastside Wrestling	ESW	Deitschland	2003-
European Wrestling Association	EWA	Östarreich	1998-
Extrem Championship Wrestling	ECW	USA	1992-2001	Hardcorelastige Liga; 2006 is vo da WWE wiederbelebt worn.
German Stampede Wrestling	GSW	Deitschland	2001-	Bekannteste deitsche Liga
German Wrestling Promotion	GWP	Deitschland	2006-	älteste aktive Wrestlinglia as Bayern mit Events in Schwabach bei Nürnberg
Global & German Wrestling Organisation	GGWO	Deitschland	2005-
Independent Wrestling Association Mid-South	IWA-MS	USA	1996-
International Wrestling Association	IWA	Puerto Rico	1994-	Bis 2001 Mitglied woa s' NWA, 1999 - 2001 "Farmliga" vo da WWE
International Wrestling Association Switzerland	IWA-S	Schweiz
Italian Championship Wrestling	ICW	Italien	2001-
Major League Wrestling	MLW	USA	2003-2004	A Vasuach vo ana neichn "Indy-Liga" nachm End vo da ECW. Grindt is vom NWA-Champion Harley Race wordn.
National Wrestling Alliance	NWA	USA	1948-	A nationala Wrestling Verbaund, dea meistns regionale Ligen vertritt
New Japan Pro Wrestling	New Japan	Japan	1972-
Nu-Wrestling Evolution	NWE	Italien	2005	de deazeit populärste Promotion in Italien
Ohio Valley Wrestling	OVW	USA	1998	ehemolige "Farmliga" vo da WWE
Organization of Modern Extreme Grappling Arts	OMEGA	USA	1997-1998	A kloane Liga de vom Matt und an Jeff Hardy gründt woan is.
Pro Wrestling Guerrilla	PWG	USA	2003-
Pro Wrestling NOAH	NOAH	Japan	2000-
Ring of Honor	RoH	USA	2002-	Bekauntaste "Indy-Liga"
Rings of Europe	RoE	Östarreich	2004-
Rings of Europe Switzerland	RoE Swiss	Schweiz	2005-
Smoky Mountain Wrestling	SMW	USA	1991-1995	Vom Jim Cornette gründt, Kooperation mit da WWE
Total Nonstop Action Wrestling	TNA	USA	2002-	Größter Konkurrent vo da WWE, bis 2004 Mitglied vo da NWA
United States Wrestling Association	USWA	USA	1988-1997	Promotion vom Jerry Jarrett (heid: TNA) und an Jerry Lawler
westside Xtreme wrestling	wXw	Deitschland	2000-
World Championship Wrestling	WCW	USA	1988-2001	Ehemoliga Moaktfiahra, is Konkurs gaunga, is vo da WWE aufgkauft wordn.
World Wrestling Entertainment	WWE	USA	1952-	Moaktfiahra
Xtreme Pro Wrestling	XPW	USA	1999-2003

A kloana Üwablick üwa de bekauntestn Promotions vo de jeweilign Lända

Da Ric Flair bei WrestleMania X-8

De führendn amerikanischn Promotions

• Total Nonstop Action Wrestling (TNA)
• World Wrestling Entertainment (WWE)

De Independent (Indy) Promotions

• CHIKARA
• Combat Zone Wrestling (CZW)
• Juggalo Championship Wrestling (JCW)
• Mainstream Wrestling (MSW)
• National Wrestling Alliance (NWA)
• Pro Wrestling Guerrilla (PWG)
• Ring of Honor (ROH)

Puroresu - Japanischs Wrestling

• All Japan Pro Wrestling (AJPW)
• Big Japan Pro Wrestling (BJW)
• New Japan Pro Wrestling (NJPW)
• Pro Wrestling NOAH
• Pro Wrestling ZERO1-MAX

Lucha Libre - Mexikanischs Wrestling

• Asistencia Asesoría y Administracion (AAA)
• Consejo Mundial de Lucha Libre (CMLL)

Beleg

 Commons: Category:Wrestling – Sammlung vo Buidl, Videos und Audiodateien