བཤད་བྲུག
སྤེལ་དུས 2024-01-02
ཡོང་ཁུངས། ཀྲུང་གོ་བོད་ཀྱི་དྲ་བ།
རྩོམ་པ་པོ། སེང་རྡོར།
ཇ་ཁ་ཆང་ཁའི་སྐད་ཆ་ལ་མཚོན་ན། དོན་ལ་གནས་མི་གནས་སྣ་ཚོགས་པ་ཡིན་ཅིང་། དོན་ལ་མི་གནས་པའི་ཆ་དེར་འབྲོག་པ་ཚོས“བཤད་བྲུག་འཕུད་པ”ཡང་ཟེར། མི་གོ་རྒྱུ་ཡང་མེད་དེ། བཤད་པ་ཐལ་དྲགས་ནས་ཆུ་བོ་ལྟར་དུ་བྲུག་པའི་དོན་རེད། དཔེར་ན་རྩྭ་ལུང་སྡེ་བའི་རྣམ་རྒྱལ་ཐར་གྱི་སྐོར་ལྟ་བུའོ།། གྲང་ངར་བཟོད་དཀའ་བའི་དགུན་ཁ་ཞིག་ལ། རྣམ་རྒྱལ་ཐར་གྱིས་རླངས་འཁོར་གོང་ཆེན་ཞིག་ཉོས་ནས་སྲང་ལམ་དུ་ཐོན། ཁོ་དང་འབྲེལ་བ་ལེགས་པ་ཚོས་ཤོག་སྦག་བཀད། དར་ལིང་འཐེན། མདོར་ན་རྟེན་འབྲེལ་ཞུས་སོ།། འོན་ཀྱང་སྡེ་མི་ལ་ལ་དེ་ཙམ་མི་དགའ་བར་གྱུར། དེའི་སྟབས་ཀྱིས་རླངས་འཁོར་དེ་ལག་བརྒྱུད་རེད་ཟེར་མཁན་དང་། གཏའ་འཁོར་རེད་ཟེར་མཁན་དང་། ཞིབ་ཏུ་བལྟས་ན་རྐྱལ་བ་བཞི་བོ་ཐེད་ལ་ཉེ་ཟེར་མཁན་སོགས་བརྩིས་པས་མི་ཚར་བ་བྱུང་། ཁྱོད་ཀྱིས་བཤད་བྲུག་ཅེས་པ་འདི་ཙམ་རེད་མ་འདོད་ཨང་།ཁྲོ་ལོ་ན་རེ། ད་ལོར་རྣམ་རྒྱལ་ཐར་གྱི་ལག་པ་ནད་པར་གྱུར་ཡོད་ཁོ་ཐག་ཡིན་ཟེར། ངས་ཧ་མ་གོ་བར་ཞིབ་ཏུ་དྲིས་པས། ཁྲོ་ལོས་སྣ་དགོད་བྱེད་བཞིན། རྣམ་རྒྱལ་ཐར་གྱིས་རླངས་འཁོར་གོང་ཆེན་དེའི་བདག་པོ་རང་ཉིད་ཡིན་པ་ཤེས་ཆེད་ཤེལ་སྒོ་སྔོན་མ་གཉིས་གཏན་ནས་བརྒྱབ་མྱོང་མེད་ཚུལ་དང་། ཁོའི་གསེར་གྱི་མཛུབ་དཀྲིས་ཆེ་ཞིང་མཐུག་པ་དེ་སྟོན་ཆེད་ལག་པ་ཡ་གཅིག་སྒེའུ་ཁུང་ཕྱི་རོལ་དུ་བསྲིངས་བསྲིངས་སུ་དགུན་ཟླ་ཧྲིལ་པོ་བསྐྱལ་སོང་ཟེར། འདི་ནི་ད་གཟོད་བཤད་བྲུག་ཅེས་པའི་ཆ་གཅིག་ཙམ་རེད་ཨང་། སྟག་སྐྱིད་སོགས་ཀྱི་ངག་ལ་གཞི་བཅོལ་ན་འདི་ལྟ་སྟེ། རྣམ་རྒྱལ་ཐར་གྱི་རླངས་འཁོར་དེ་ཁོའི་ཨ་ཕའི་ལག་གི་གཟི་ཞིག་གིས་ཉོས་པ་རེད་ཟེར། འདི་ནི་བསམ་གྱིས་མི་ཁྱབ་པའི་བཤད་བྲུག་གཞན་ཞིག་ཡིན་པས། རྣམ་ཤེས་མ་བསྒྲིམ་ན་རྟོགས་ཀྱང་མི་ཐུབ་ཡ། དེ་ཡང་རྣམ་རྒྱལ་ཐར་གྱི་ཨ་ཕ་ནི་ས་འདིའི་ལས་བྱེད་མཐོ་གྲས་ཤིག་ཡིན་ལ། ལས་གཞི་མང་པོའི་དབང་ཆ་ལ་ཁ་ལོ་སྒྱུར་གྱིན་ཡོད་པས། ཚོང་པ་ཚོ་ཁོ་ལ་སྙིང་ནས་དད་ཅིང་དགའ། ཐེངས་ཤིག་ཚོང་པ་ཞིག་གིས་ཁྲོམ་ར་ནས་སྒོར་ཁྲི་སུམ་བརྒྱ་བྱིན་ནས་གཟི་དག་མ་ཞིག་ཉོས། དེའི་འཕྲོར་གཟི་དེ་རྣམ་རྒྱལ་ཐར་གྱི་ཨ་ཕར་བསྟན་ནས“གཟི་འདི་ཤིན་ཏུ་གོང་ཆུང་ཞིག་ཡིན་མོད། ཁྱེད་ཚང་གི་འཕྲུལ་རྟ་དེ་ལ་བརྗེ་ཨེ་ཆོག”ཅེས་དྲིས་སྐད། ཚོང་སྐད་མང་པོས་སྦྲེལ་རྗེས་རྣམ་རྒྱལ་ཐར་གྱི་ཨ་ཕས་འཐད་མི་འཐད་ཅིག་གིས་འཕྲུལ་རྟ་ཆག་རོ་དེ་ཕར་གཏད་ཅིང་། གཟི་དག་མ་དེ་ཚུར་བླངས་ཤིང་དེའི་ཕྱི་ཉིན་ཁྲོམ་ར་གཞན་ཞིག་ཏུ་ཕྱིན་ཏེ་སྒོར་ཁྲི་ཉིས་བརྒྱ་ལྷག་ལ་བརྗེས་སོང་ཟེར། ཚུལ་འདི་ལྟ་བུ་ལ་འབྲོག་པ་ཚོས། བཙོང་ཟེར་ན་གསེར་ལ་གོང་མེད།། ཉོ་ཟེར་ན་ཁྱི་ཤར་གོང་ཆེ།། ཞེས་ཀྱང་ལབ་ཡོང་། གང་ལྟར། བྱུང་རིམ་འདིའི་ཤུགས་སུ་ཅི་ཞིག་སྟོན་གྱིན་ཡོད་པ་རེད་ཟེར་ན། རྒྱུ་ཟ་ས་མི་འགྲོ་བའི་དུས་ཀྱི་ཟ་སྟངས་ཁྱད་པར་བ་ཞིག་རྗོད་ཀྱིན་ཡོད་པ་རེད། བཤད་བྲུག་ཏུ་དེ་ཙམ་མི་འགྲོ་བ་ཞིག་ནི། རྣམ་རྒྱལ་ཐར་གྱི་རླངས་འཁོར་གཟི་རིན་མ་དེ་སྲང་ལམ་འདིའི་སེར་རྩི་བསྐུས་ཡོད་པའི་ལམ་ཐིག་དག་ཏུ་རྟག་པར་མཐོང་ཡོང་། ལམ་ཐིག་ཏུ་སེར་རྩི་བསྐུས་པ་ནི་རླངས་འཁོར་བསྡད་མི་ཆོག་པའི་རྟགས་ཤིག་ཡིན་མོད། རྣམ་རྒྱལ་ཐར་གྱིས་གཟས་ནས་སྒྲིག་ལམ་དེར་སྣང་མེད་བྱེད་ཀྱིན་ཡོད། དེ་བས་ནམ་རྒྱུན་ཁོའི་རླངས་འཁོར་ནི་མིག་རྒྱག་དང་བཅས་མཐོང་ཡོང་།དེ་དེ་ལྟར་མིག་རྒྱག་ཆེ་དོན་ཡང་ཁོའི་རླངས་འཁོར་མ་གཏོགས་པའི་གཞན་དག་དེ་རུ་འཇོག་མི་ཕོད་པས་སོ།། རྣམ་རྒྱལ་ཐར་གྱིས་ནི་ཆད་པའི་སྒོར་མོ་ཉིས་བརྒྱ་རེ་སྟེར་བར་ཅི་ཡང་མི་སྙམ་པ་འདྲ། ད་བལྟས་ཡོང་ན། འདི་ཡང་བཤད་བྲུག་ཅིག་ཡིན་པ་འདྲ། སུས་ཤེས་ཨང་། ལྟོས་དང་། དེ་རིང་ཡང་ཤར་མདོའི་ལམ་ཐིག་སེར་པོ་དེའི་གཞི་དཀྱིལ་དུ། རྣམ་རྒྱལ་ཐར་གྱི་རླངས་འཁོར་དམར་པོ་འདམ་ཤན་མ་དེ་སྟོད་བསེགས་སྨད་ཡོ་ཞིག་གིས་བཞག་འདུག བཤད་བྲུག་ནི་ཡོངས་སུ་བདེན་པ་ཞིག་མིན་ཁར། ཕྱེད་ཙམ་བདེན་པའི་ངེས་པའང་ག་ལ་ཡོད་ཀྱང་། འབྲོག་པ་ཚོས་ནི“རྒྱལ་ཁམས་ཀྱི་ཁ་ན་ཡེ་ཤེས་ཀྱི་སྤྱན་ཡོད”ཅེས་བཤད་བྲུག་ལའང་ཆ་འཇོག་ཏོག་ཙམ་བྱས་དང་བྱེད་ཀྱིན་ཡོད་དོ།།
རྩོམ་སྒྲིག་པ། རིག་གྲོལ།
