Thaksin Shinawatra
Thaksin Shinawatra (Thai: ทักษิณ ชินวัตร; gebore 26 Julie 1949) is 'n Thaise sakeman, politikus, en besoekende professor. Hy is aan korrupsie skuldig bevind en leef tans in ballingskap. Hy dien vanaf 1973 tot en met 1987 in die Thaise Polisie en was vanaf 2001 tot en met 2006 Eerste Minister van Thailand.
| Thaksin Shinawatra | |
 | |
Persoonlike besonderhede
| |
|---|---|
| Gebore | 26 Julie 1949 |
In 1987 stig Thaksin die selfoonnetwerk Advanced Info Service en die IT- en telekommunikasiekonglomeraat Shin Corporation, wat uiteindelik daartoe lei dat hy een van die rykste mense in Thailand word. In 1998 stig hy die Thai Rak Thai-party (TRT) en in 2001 word hy na 'n oorweldigende oorwinning in die verkiesing premier. Hy was die eerste demokraties verkose premier van Thailand wat 'n volle termyn uitgedien het en is in 2005 weer eens met 'n oorweldigende meerderheid tot premier herverkies.
Thaksin het 'n "oorlog op dwelms" verklaar waarin 2 500 mense gesterf het. Sy regering het programme van stapel gestuur om armoede te verminder, infrastruktuur uit te brei, klein en middelmatige sakeondernemings te bevorder, en universele gesondheidsorgdekking te verbreed. Thaksin het die separatistiese opstand in die Islamitiese suidelike provinsies gewelddadig onderdruk.
Hy het skerp kritiek gelok na hy aandele in sy maatskappy vir meer as 'n miljard belastingvrye dollar aan buitelandse beleggers verkoop het. 'n Burgerlike beweging teen Thaksin, genaamd die Volksalliansie vir Demokrasie oftewel die "Geelhemde", het massaproteste van stapel laat loop en hom van korrupsie, magsmisbruik, en outokratiese neigings beskuldig. In reaksie hierop het Thaksin 'n vroeë verkiesing uitgeroep wat deur die opposisie geboikot is en deur die grondwethof ongeldig verklaar is.
Thaksin is op 19 September 2006 in 'n militêre staatsgreep omvergewerp. Sy party is verban en hy is verbied om aan politieke aktiwiteite deel te neem. Thaksin leef sedertdien in selfopgelegde ballingskap wat in 2008 deur 'n kort besoek aan Thailand onderbreek is. Hy is in absentia tot twee jaar tronkstraf gevonnis vir magsmisbruik. Hy hou aan om vanuit die buiteland Thaise politiek te beïnvloed deur middel van die Volksmagparty, wat in 2008 geregeer het, die opvolgorganisasie Pheu Thai-party, en die Verenigde Front vir Demokrasie Teen Diktatorskap oftewel die "Rooihemde". Sy jonger suster, Yingluck Shinawatra, was vanaf 2011 tot en met 2014 eerste minister, en sy jongste dogter Paetongtarn Shinawatra is die huidige aangewese eerste minister sedert 17 Augustus 2024.
Eksterne skakels
wysig
Wikimedia Commons het meer media in die kategorie Thaksin Shinawatra.
