طير
طير
| ||
| ||
| معلومات عامة | ||
| سمية لعيلمية | Aves (كارولوس لينيوس، 1758) | |
| لخاصية د ترتاب | كلاص | |
| تابع ل | طيريات الذيل | |
| خصايصو | ||
| صوت لي كايدير | صوت الطيور | |
| معلومات خرين | ||
| لكائن مصدر ديال | بيض *ريش *لحم *براز الطير | |
| رمز ديال ليونيكود | 🐦 | |
الطيور (ب النڭليزية birds) مجموعة ديال السنسوليات مولات دم سخون، لي كاتشكل لكلاص "أڤيس" (ب اللاتينية Aves). كايتميّزو الطيور بلي عندهوم الريش، جوج فكاك بلا سنان و ب قمقوم، لحطان ديال بيض عندو قشرة قاسحة، قلب ب 4 د الشومبرات، و سكيليط قوي و خفيف ف نفس لوقت. كاينين نواع د الطيور ف لعالم كامل، و كيوصل لحجم ديالهوم ل مابين 5,5 سنتيميتر (الطنان) ل 2,8 ميترو (النعامة). كاينين كتر من 11.000 نوع د الطيور لي عايشين دابا، و كتر من النص ديالهوم كينتاميو ل التنضيمة ديال عصفوريات الشكل. الطيور عندهوم جناوح لي النمو و لقدرات ديالهوم كيختالفو من نوع ل نوع. الجوج نواع لوحيدين لمعروفين لي ماكانوش عندهوم جناوح هوما لموا و طير لفيل لي بجوج نقارضو. الجناوح ف لأصل تطوّرو من لأطراف لقدّامية لي كانلقاو عند جميع لحيوانات مولات ربعة، و عطاو لإمكانية ل الطيور باش يطيرو ف السما، وخا كاينين سلالات لي عاودو فقدو هاد لقدرة ب مرة، بحال لپانڭوان. بعض النواع ف أوساط مائية تخصصو الجناوح ديالهوم ف لعومان. الصيونص لي كاتدرس الطيور كاتسمى ؤرنيطولوجيا (ب النڭليزية ornithology).
الطيور كيتّعتابرو ديناصورات ب الريش، و هوما لكائنات لوحيدة من السلالة د الديناصورات لي باقين عايشين دابا. ف التقسيم ب لكليدات، كيتّعتابرو الطيور من الزواحف، و أقرب ولاد لعم ديالهوم هوما التمساحيات. كينحادرو الطيور من الطيريات (ب اللاتينية Avialae) لي هوما ديناصورات كانو كيطيرو (منهوم لأركيوپطيريكس)، و لي بانو ف لعصر الجوراسي لمعطل. لعولاما دابا كيقدّرو بلي الطيور ب الشكل لعصري ديالهوم، بانو ف جوايه لعصر الطباشيري لمعطل، و بداو كيتنوّعو بزاف ف لوقت ديال لإنقراض د الطباشيري و لپاليوجيني لي طرا هادي علاين 66 مليون عام، و لي نقارضو فيه جميع لپطيروصورات و الديناصورات لي ماكاتطيرش.[1]
- ^ Claramunt، S.؛ Cracraft، J. (2015). "A new time tree reveals Earth history's imprint on the evolution of modern birds". Sci Adv. 1 (11): e1501005. Bibcode:2015SciA....1E1005C. doi:10.1126/sciadv.1501005. PMC 4730849. PMID 26824065.