ຢືນຢັນຄວາມສຳຄັນຂອງການຮ່ວມມືລັດຖະສະພາສອງຝ່າຍ

ທີ່ການພົບປະ, ທ່ານ Szymon Holownia ປະທານສະພາຕ່ຳໂປໂລຍ ໄດ້ຕີລາຄາສູງການຢ້ຽມຢາມຂອງທ່ານ ຟ້າມມິງຈິ໊ງ, ໂດຍຖືວ່າ ນີ້ແມ່ນຂີດໝາຍສຳຄັນໃນການພົວພັນ ຫວຽດນາມ - ໂປໂລຍ ໃນສະພາບທີ່ປີນີ້ແມ່ນປີສອງປະເທດສະເຫຼີມສະຫຼອງ 75 ປີແຫ່ງວັນສ້າງຕັ້ງການພົວພັນທາງການທູດ (1950-2025). ທ່ານປະທານສະພາຕໍ່າໂປໂລຍ ກໍ່ຕີລາຄາສູງບັນດາບາດກ້າວພັດທະນາຢ່າງຕັ້ງໜ້າ ແລະແທດຈິງຂອງການພົວພັນມິດຕະພາບທີ່ເປັນມູນເຊື້ອ ແລະການຮ່ວມມືອັນດີງາມລະຫວ່າງສອງປະເທດ, ພິເສດແມ່ນບັນດາໝາກຜົນໃນການຮ່ວມມືດ້ານການເມືອງ - ການທູດ, ເສດຖະກິດ, ການສຶກສາ - ກໍ່ສ້າງ, ວັດທະນະທຳ - ການທ່ອງທ່ຽວ ທີ່ບັນລຸໄດ້ໃນໄລຍະຜ່ານມາ ແລະຢາກປັບປຸງການພົວພັນກັບຫວຽດນາມ ໃຫ້ຢູ່ໃນລະດັບສູງສຸດ, ເປັນຕົ້ນແມ່ນໃນສະພາບການທີ່ໂລກມີການຜັນແປສັບສົນຍາກທີ່ຈະຄາດຄະເນລ່ວງໜ້າໄດ້, ເຮັດໃຫ້ບັນດາປະເທດມີຄວາມຫຍຸ້ງຍາກຫຼາຍຢ່າງ.

ທ່ານ ຟ້າມມິງຈິ໊ງ ຢືນຢັນວ່າ: ຫວຽດນາມ ຍາມໃດກໍ່ຈົດຈຳການຊ່ວຍເຫຼືອຢ່າງຈິງໃຈຂອງ ໂປໂລຍ ໃນພາລະກິດຕໍ່ສູ້ປົດປ່ອຍຊາດໃນໄລຍະຜ່ານມາ ແລະໃນກິດຈະການພັດທະນາປະເທດຊາດຂອງຫວຽດນາມ ໃນປະຈຸບັນ; ຕີລາຄາສູງບັນດາບາດກ້າວພັດທະນາຢ່າງຕັ້ງໜ້າໃນຫຼາຍຂົງເຂດໃນການພົວພັນລະຫວ່າງສອງປະເທດ, ການພັດທະນາຢ່າງຂະຫຍັນຂັນເຄື່ອນໃນການຮ່ວມມືລະຫວ່າງສອງສະພາແຫ່ງຊາດໃນໄລຍະຜ່ານມາ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ພົບປະກັບທ່ານ Szymon Holownia ປະທານສະພາຕ່ຳ ໂປໂລຍ. ພາບ: ສໍານັກຂ່າວສານຫວຽດນາມ

ທ່ານນາຍົກລັດຖະມົນຕີ ສະເໜີໃຫ້ສະພາຕໍ່າໂປໂລຍ ສະໜັບສະໜູນ ແລະຮ່ວມກັນຊຸກຍູ້ນໍາການພົວພັນສອງຝ່າຍຂຶ້ນສູ່ລະດັບຍຸດທະສາດໂດຍໄວ, ສະພາແຫ່ງຊາດໂປໂລຍ ສະໜັບສະໜູນການຊຸກຍູ້ການຮ່ວມມືລະຫວ່າງສອງປະເທດ, ໜູນຊ່ວຍ, ຕິດຕາມກວດກາໝາກຜົນຂອງການປະຕິບັດບັນດາຂໍ້ຕົກລົງທີ່ລັດຖະບານສອງປະເທດບັນລຸໄດ້ໃນການຢ້ຽມຢາມຄັ້ງນີ້. ທ່ານນາຍົກລັດຖະມົນຕີ ຫວັງວ່າ ສອງຝ່າຍຈະເພີ່ມທະວີການພົບປະແລກປ່ຽນ, ຮ່ວມມືໂດຍຜ່ານຊ່ອງທາງພັກ, ການຮ່ວມມືດ້ານວັດທະນະທຳ, ການພົບປະແລກປ່ຽນປະຊາຊົນ.

ສອງຝ່າຍເຫັນດີເປັນເອກະພາບສືບຕໍ່ສົມທົບກັນຢ່າງແໜ້ນແຟ້ນ, ສະໜັບສະໜູນເຊິ່ງກັນ ແລະກັນຢູ່ບັນດາເວທີປາໄສຫຼາຍຝ່າຍ, ອົງການຈັດຕັ້ງສາກົນ, ເປັນຕົ້ນແມ່ນຢູ່ສະຫະປະຊາຊາດ, ອາຊຽນ - ອີຢູ. ທ່ານປະທານສະພາຕ່ຳໂປໂລຍ ຫວັງວ່າ ຫວຽດນາມ ຈະສະໜັບສະໜູນໂປໂລຍ ເຂົ້າຮ່ວມສົນທິສັນຍາເປັນມິດ ແລະການຮ່ວມມືຢູ່ອາຊີຕາເວັນອອກສ່ຽງໃຕ້ (TAC) ໂດຍໄວ.

ຊຸກຍູ້ການຮ່ວມມືດ້ານເສດຖະກິດ, ການຄ້າ ແລະການລົງທຶນ

ຕອນບ່າຍວັນທີ 17 ມັງກອນ (ຕາມເວລາທ້ອງຖິ່ນ), ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ເຂົ້າຮ່ວມເວທີປາໄສວິສາຫະກິດ ໂປໂລຍ - ຫວຽດນາມ. ກ່າວຄຳເຫັນທີ່ເວທີປາໄສ, ທ່ານນາຍົກລັດຖະມົນຕີ ໄດ້ສະແດງຄວາມປິຕິຊົມຊື່ນອີກເທື່ອໜຶ່ງທີ່ໄດ້ມາຢ້ຽມຢາມ ໂປໂລຍ - ເຊິ່ງເປັນປະເທດໃຫ້ກຳເນີດ ຜູ້ທີ່ຍິ່ງໃຫຍ່ຫຼາຍຄົນ; ຢືນຢັນວ່າ ເຖິງວ່າໂລກຈະມີການປ່ຽນແປງຫຼາຍຢ່າງກໍ່ຕາມ, ແຕ່ການພົວພັນຫວຽດນາມ - ໂປໂລຍ ນັບມື້ນັບສະໜິດແໜ້ນ, ເຂົ້າສູ່ລວງເລິກ, ແທດຈິງ ແລະມີປະສິດທິຜົນ.

ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ກ່າວຄຳເຫັນທີ່ເວທີປາໄສວິສາຫະກິດ ໂປໂລຍ - ຫວຽດນາມ. ພາບ: ສໍານັກຂ່າວສານຫວຽດນາມ.

ທ່ານນາຍົກລັດຖະມົນຕີ  ໃຫ້ຮູ້ວ່າ: ປະຈຸບັນ, ສອງປະເທດໄດ້ ແລະພວມສົ່ງເສີມການເຂົ້າຮ່ວມຫຼາຍກົນໄກຮ່ວມມື ແລະສະເໜີບັນດາວິສາຫະກິດຍາດແຍ່ງເອົາທ່າໄດ້ປຽບ, ຂຸດຄົ້ນບັນດາກົນໄກຮ່ວມມືດັ່ງກ່າວ ເພື່ອຊຸກຍູ້ການຮ່ວມມືດ້ານເສດຖະກິດ, ການຄ້າ, ການລົງທຶນລະຫວ່າງສອງປະເທດ, ສອງພາກພື້ນ.

ທ່ານນາຍົກລັດຖະມົນຕີ ໃຫ້ຮູ້ວ່າ ໃນການຢ້ຽມຢາມຄັ້ງນີ້, ທ່ານຈະມີການພົບປະ, ເຈລະຈາກັບການນຳຂັ້ນສູງຂອງໂປໂລຍ. ສອງຝ່າຍສະແດງຄວາມຮັກແພງ, ຄວາມຈິງໃຈ, ຄວາມໄວ້ເນື້ອເຊື່ອໃຈເຊິ່ງກັນ ແລະກັນ ແລະເຫັນດີເປັນເອກະພາບກັນຊຸກຍູ້ການຮ່ວມມື, ສະໜັບສະໜູນ ແລະເພີ່ມເຕີ່ມຊ່ວຍຊູໃຫ້ກັນ. ພິເສດ ທ່ານໄດ້ໃຫ້ຂໍ້ສັງເກດວ່າ ການພົວພັນດ້ານເສດຖະກິດຍັງບໍ່ສົມກັບການພົວພັນລະຫວ່າງສອງປະເທດ ແລະຄວາມສາມາດບົ່ມຊ້ອນທີ່ແຕກຕ່າງ, ກາລະໂອກາດທີ່ດີ, ທ່າໄດ້ປຽບ, ການແກ່ງແຍ້ງຂອງແຕ່ລະປະເທດ.

ທ່ານນາຍົກລັດຖະມົນຕີ ຫວັງວ່າ ປະຊາຄົມວິສາຫະກິດຂອງສອງປະເທດຈະເພີ່ມທະວີການເຊື່ອມຕໍ່, ດຳເນີນທຸລະກິດຢ່າງມີປະສິດທິຜົນບົນຈິດໃຈ “ຜົນປະໂຫຍດກົມກຽວ, ແບ່ງປັນຄວາມສ່ຽງ”. ທ່ານນາຍົກລັດຖະມົນຕີ ຮຽກຮ້ອງມາຍັງບັນດາວິສາຫະກິດ ໂປໂລຍ ຫວັງວ່າ ວິສາຫະກິດເຫຼົ່ານີ້ຈະເພີ່ມທະວີການລົງທຶນຢູ່ຫວຽດນາມ ເພື່ອຜົນປະໂຫຍດຮ່ວມກັນ.

ກາລະໂອກາດໃຫຍ່ເພື່ອນຳການພົວພັນຫວຽດນາມ - ໂປໂລຍ ຂຶ້ນສູ່ລະດັບສູງໃໝ່

ກ່ອນໜ້ານັ້ນ, ຕອນເຊົ້າວັນທີ 17 ມັງກອນ, ຢູ່ນະຄອນຫຼວງ Warsaw, ທ່ານ ຟ້າມມິງຈິ໊ງ ນາຍົກລັດຖະມົນຕີຫວຽດນາມ ໄດ້ໄປຢ້ຽມຢາມ ແລະກ່າວຄຳເຫັນກ່ຽວກັບນະໂຍບາຍຢູ່ມະຫາວິທະຍາໄລ Warsaw.

ກ່າວຄຳເຫັນນະທີ່ນີ້, ທ່ານ ຟ້າມມິງຈິ໊ງ ຊີ້ແຈ້ງວ່າ ການຢ້ຽມຢາມຄັ້ງນີ້ຂອງທ່ານແມ່ນການສົ່ງສານຂອງຫວຽດນາມ ນັ້ນແມ່ນມຸ່ງໄປເຖິງຍົກລະດັບການພົວພັນຫວຽດນາມ - ໂປໂລຍ ໃຫ້ຂຶ້ນສູ່ລະດັບຍຸດທະສາດ, ເພື່ອເຮັດໃຫ້ການພົວພັນລະຫວ່າງສອງປະເທດເລິກເຊິ່ງ, ແທດຈິງ ແລະມີປະສິດທິຜົນກວ່າເກົ່າ.

ກ່ຽວກັບການພົວພັນຫວຽດນາມ - ໂປໂລຍ, ທ່ານນາຍົກລັດຖະມົນຕີ ໃຫ້ຮູ້ວ່າ: ຫວຽດນາມ ຖືເປັນສຳຄັນ ແລະປາດຖະໜາຢາກຊຸກຍູ້, ເຮັດໃຫ້ການພົວພັນຮ່ວມມືຮອບດ້ານກັບບັນດາປະເທດເອີລົບຕາເວັນອອກກາງ ເລິກເຊິ່ງກວ່າ, ພິເສດແມ່ນກັບບັນດາປະເທດເພື່ອນມິດທີ່ເປັນມູນເຊື້ອຄື ໂປໂລຍ. ທ່ານນາຍົກລັດຖະມົນຕີ ກໍ່ສະເໜີ 6 ຂໍ້ບຸກທະລຸ ເພື່ອນຳການພົວພັນຫວຽດນາມ - ໂປໂລຍ ຂຶ້ນສູ່ລະດັບສູງໃໝ່.

ເມື່ອເບິ່ງໄປໃນອະນາຄົດ, ທ່ານນາຍົກລັດຖະມົນຕີ ເຊື່ອໝັ້ນວ່າ ຫວຽດນາມ ແລະ ໂປໂລຍ ພວມຢືນຢູ່ຕໍ່ໜ້າກາລະໂອກາດໃຫຍ່ເພື່ອນຳການພົວພັນລະຫວ່າງສອງປະເທດຂຶ້ນສູ່ລະດັບສູງໃໝ່, ກາຍເປັນຮູບແບບກ່ຽວກັບການພົວພັນຮ່ວມມືມິດຕະພາບຢູ່ພາກພື້ນອາຊີຕາເວັນອອກສ່ຽງໃຕ້ ແລະເອີລົບຕາເວັນອອກກາງ ເພື່ອຜົນປະໂຫຍດຂອງປະຊາຊົນສອງປະເທດ, ເພື່ອສັນຕິພາບ, ການຮ່ວມມື ແລະພັດທະນາໃນພາກພື້ນ ແລະໃນໂລກ.

ໂດຍ: ຈາງຫງວຽນ