1. ໃນສະພາບການຫັນເປັນໂລກາພິວັດ ແລະການປະຕິວັດເຕັກໂນໂລຢີ 4.0, ການຫັນເປັນດິດີຈີຕອນ ແລະການປະຕິຮູບດ້ານບໍລິຫານ ໄດ້ກາຍເປັນໜ້າທີ່ຫຼັກແຫຼ່ງຍົກສູງປະສິດທິພາບ, ປະສິດທິຜົນຂອງການຄຸ້ມຄອງລັດ ເພື່ອຮັບໃຊ້ປະຊາຊົນ, ວິສາຫະກິດໃຫ້ນັບມື້ນັບດີຂຶ້ນ.

ທ່ານ ຫວໍຫງອກກວກທ້ວນ ຫົວໜ້າພະແນກພາຍໃນນະຄອນ ໂຮ່ຈີມິນ ໃຫ້ຮູ້ວ່າ ນະຄອນພວມສັບຊ້ອນກົງຈັກການຈັດຕັ້ງໃຫ້ກະທັດລັດ ເພື່ອມີລະບົບການເຄື່ອນໄຫວຢ່າງມີປະສິດທິພາບ, ປະສິດທິຜົນກວ່າ.

ນະຄອນ ໂຮ່ຈີມິນ ໄດ້ຂະໜານນາມວ່າ ແມ່ນນະຄອນທີ່ຂະຫຍັນຂັນເຄື່ອນ ແລະ ເຕັມໄປດ້ວຍພະລັງຊີວິດ. ພາບ: ຮວ່າງຈຽວ

ອາດເວົ້າໄດ້ວ່າ ການນຳເອົາມະຕິສະບັບເລກທີ 98/2023/QH15 ຂອງສະພາແຫ່ງຊາດກ່ຽວກັບການທົດລອງກົນໄກ, ນະໂຍບາຍສະເພາະ ເພື່ອພັດທະນານະຄອນ ໂຮ່ຈີມິນ ເຂົ້າສູ່ການດຳລົງຊີວິດຕົວຈິງ ໄດ້ນຳເອົາກຳລັງແຮງໃໝ່ມາໃຫ້ນະຄອນ.

ທ່ານ ເຈິ່ນເຖທ້ວນ ຫົວໜ້າພະແນກວັດທະນະທຳ ແລະກິລາ  ໃຫ້ຮູ້ວ່າ ນະຄອນສະເໜີຮຽກຮ້ອງການລົງທຶນ ສຳລັບ 40 ໂຄງການ ແລະ ມີ 23 ໂຄງການ ໄດ້ສະພາປະຊາຊົນນະຄອນໄດ້ຮັບຮອງເອົາລາຍການລົງທຶນ, ໃນນັ້ນ ມີຫຼາຍໂຄງການຈຸດສຸມ, ຂອບຂະໜາດໃຫຍ່… ບັນດາໂຄງການເຫຼົ່ານີ້ ໄດ້ຕັ້ງຄວາມຫວັງໄວ້ວ່າຈະກາຍເປັນສັນຍາລັກໃໝ່ຂອງນະຄອນ ໂຮ່ຈີມິນ ໃນອະນາຄົດ.

2. ມະຕິສະບັບເລກທີ 31-NQ/TW ລົງວັນທີ 30 ທັນວາ 2022 ຂອງກົມການເມືອງກ່ຽວກັບທິດທາງ, ໜ້າທີ່ພັດທະນານະຄອນໂຮ່ຈິີມິນ ຮອດປີ 2030, ວິໄສທັດຮອດປີ 2045, ໄດ້ມອບໜ້າທີ່ໃຫ້ນະຄອນຮອດປີ 2030, ກາຍເປັນນະຄອນອຸດສາຫະກຳຕາມທິດທັນສະໄໝ ແລະຮອດປີ 2045 ກາຍເປັນນະຄອນທີ່ມີພື້ນຖານອຸດສາຫະກຳທີ່ທັນສະໄໝ ທຽບເທົ່າບັນດານະຄອນໃຫຍ່ໃນພາກພື້ນ ແລະກ້າວໄປເຖິງລະດັບທະວີບ.

ເພື່ອບັນລຸໄດ້ໜ້າທີ່, ເປົ້າໝາຍຍຸດທະສາດທີ່ໄດ້ວາງອອກ, ສະຫາຍ ຫງວຽນວັນເນນ, ກຳມະການກົມການເມືອງ, ເລຂາພັກນະຄອນ ໂຮ່ຈີມິນ ໃຫ້ຮູ້ວ່າ ໃນໄລຍະປະຈຸບັນ, ພ້ອມກັບບັນດາວິທີການແກ້ໄຂເພື່ອພັດທະນາແບບຍືນຍົງ, ນະຄອນ ໄດ້ເລືອກເອົາການຫັນເປັນສີຂຽວຮອບດ້ານເປັນໜ້າທີ່ຈຸດສຸມ, ການຫັນເປັນອຸດສາຫະກຳເປັນກຳລັງຜັກດັນ, ການຫັນເປັນດີຈີຕອນເປັນໜ້າທີ່ບຸກທະລຸ ແລະການຮ່ວມມືພັດທະນາເປັນໜ້າທີ່ທີ່ສຳຄັນ ແລະຈຳເປັນຢ່າງເດັດຂາດ.

ຖະໜົນດອກໄມ້ລະບານໃໝ່ ຟູໝີຮຶງ, ນະຄອນ ໂຮ່ຈີມິນ. ພາບ: ເຍີດທິ້ງ

ໃນ 5 ປີຜ່ານມາ, ເສດຖະກິດຂອງນະຄອນສືບຕໍ່ພັດທະນາຢ່າງປົກກະຕິ, ມີບົດບາດເປັນໃຈກາງຫຼາຍດ້ານຂອງພາກ ແລະທົ່ວປະເທດ; ເປັນສູນກາງເສດຖະກິດ, ການເງິນ, ການຄ້າ, ວິທະຍາສາດ - ເຕັກໂນໂລຊີ, ນະວັດຕະກຳຂອງພາກ ແລະທົ່ວປະເທດ. ເຖິງຢ່າງໃດກໍ່ຕາມ, ນອກຈາກບັນດາຜົນງານທີ່ບັນລຸໄດ້, ຂົງເຂດອຸດສາຫະກຳຂອງນະຄອນພວມຢືນຢູ່ຕໍ່ໜ້າສິ່ງທ້າທາຍຫຼາຍຢ່າງ.

ເພື່ອແກ້ໄຂຂໍ້ຈຳກັດ, ເວທີປາໄສເສດຖະກິດນະຄອນ ໂຮ່ຈີມິນ ປີ 2024 ດ້ວຍຫົວຂໍ້ “ການຫັນເປັນອຸດສາຫະກຳ, ກຳລັງໜູນໝ່ເພື່ອພັດທະນາແບບຍືນຍົງຂອງນະຄອນ ໂຮ່ຈີມິນ” ຢືນຢັນວ່າ, ການຫັນເປັນອຸດສາຫະກຳຂອງນະຄອນຕາມທິດຕິດພັນຢ່າງແໜ້ນແຟ້ນກັບບັນດາແຂວງ, ນະຄອນ ແລະ ທົ່ວປະເທດ.

ນະຄອນສືບຕໍ່ສຸມໃສ່ຂຸດຄົ້ນບັນດາຄວາມສາມາດບົ່ມຊ້ອນ, ທ່າໄດ້ປຽບ ຂອງຕົນໃນການພັດທະນາອຸດສາຫະກຳດ້ວຍບົດບາດເປັນສູນກາງວິທະຍາສາດ, ເຕັກໂນໂລຊີ ແລະນະວັດຕະກຳຂອງທົ່ວປະເທດ, ຂຸດຄົ້ນແຫຼ່ງ ກຳລັງທີ່ດິນ, ແຫຼ່ງຊັບພະຍາກອນມະນຸດມີລະດັບສູງຢ່າງມີປະສິດທິຜົນ, ໝູນໃຊ້ບັນດາໝາກຜົນຂອງການປະຕິວັດອຸດສາຫະກຳຄັ້ງທີ 4 ເພື່ອຍົກສູງສະມັດຕະພາບ, ຄຸນະພາບ, ປະສິດທິຜົນບັນດາຂະແໜງການ, ຜະລິດຕະພັນອຸດສາຫະກໍາ.

3. ວັນທີ 17 ສິງຫາ 2024, ນະຄອນ ໂຮ່ຈີມິນ ເປັນກຽດໄດ້ຕ້ອນຮັບທ່ານເລຂາທິການໃຫຍ່  ໂຕເລິມ  ມາຢ້ຽມຢາມ ແລະເຮັດວຽກ. ໃນການຢ້ຽມຢາມຄັ້ງນີ້, ທ່ານເລຂາທິການໃຫຍ່ ໄດ້ຝາກຝັງ ແລະເຊື່ອໝັ້ນຕໍ່ການບືນຕົວຂຶ້ນຂອງນະຄອນໃນໄລຍະຈະມາເຖິງ. ທ່ານເລຂາທິການໃຫຍ່  ຢືນຢັນວ່າ ອະນາຄົດຂອງນະຄອນທີ່ໃສ່ຊື່ລຸງໂຮ່ ຕ້ອງເປັນນະຄອນທົ່ວໂລກ, ພັດທະນາຕາມທິດເປັນຕົວເມືອງອັດສະລິຍະ, ທັນສະໄໝ, ເຊື່ອມໂຍງ ແລະຍືນຍົງ, ສັງຄົມສະໜິດສະໜົມ, ເປີດກວ້າງ, ສີວິໄລ, ເຕົ້າໂຮມບັນດາຄຸນຄ່າທີ່ກ້າວໜ້າຂອງບັນດາປະເທດໃນທົ່ວໂລກ.

ຄະນະບໍລິຫານງານອົງຄະນະພັກນະຄອນ ໂຮ່ຈີມິນ ພ້ອມກັບທົ່ວລະບົບການເມືອງຕ້ອງໄດ້ຮັບຮູ້ຢ່າງເລິກເຊິ່ງກ່ຽວກັບບົດບາດ, ທີ່ຕັ້ງຂອງນະຄອນກັບທົ່ວປະເທດ, ຈາກນັ້ນ ກໍ່ຕ້ອງມີຄວາມສາມັກຄີ, ເປັນເອກະພາບສູງ, ມີຄວາມຕັດສິນໃຈທາງດ້ານການເມືອງ, ຂະຫຍັນຂັນເຄື່ອນ, ມີຫົວຄິດປະດິດສ້າງກວ່າ, ເປັນເຈົ້າການກຳໄດ້ກາລະໂອກາດ ແລະ ຜ່ານຜ່າ ສິ່ງທ້າທາຍ.

ດ້ວຍປະຫວັດສາດ ແລະມູນເຊື້ອປະຕິວັດອັນສະຫງ່າລາສີ, ນະຄອນ ໂຮ່ຈີມິນ ຍາມໃດກໍ່ຮູ້ວິທີຜ່ານຜ່າຄວາມຫຍຸ້ງຍາກ ດ້ວຍກຳລັງໜຸ່ມ, ຄວາມຂະຫຍັນຂັນເຄື່ອນ ແລະການປະດິດສ້າງຂອງຕົນ. ການເສີມຂະຫຍາຍບັນດາມູນເຊື້ອອັນດີງາມນັ້ນ ພ້ອມກັບການໜູນຊ່ວຍ, ເພີ່ມພູນຄູນສ້າງຂອງສູນກາງ, ບັນດາກະຊວງ, ຂະແໜງການ ແລະປະຊາຊົນໃນທົ່ວປະເທດ, ເຊື່ອໝັ້ນວ່າ ນະຄອນ ໂຮ່ຈີມິນ ຈະຮຸ່ງເຮືອງເຫຼືອງເຫຼື້ອມ ຈະມີການພັດທະນາຢ່າງເຂັ້ມແຂງ, ໝັ້ນແກ່ນ, ສືບຕໍ່ສ້າງບັນດາລະດູບານໃໝ່.

ໂດຍ: ທະນາພອນ