Beerbieskes

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

---

Milnesium tardigradum

Beerbieskes, mosbeerkes of waterbeerkes (Tardigrada) zijn 'n stam binne 't diereriek. 't Zien micro-organisme, ze zien neet groeter es 1,5 mm, gesegmenteerd mèt 8 pu.

Kinmerke

De gruutde varieert vaan kleiner es 0,1 mm tot 1,5 mm. Ze höbbe vief segminte, boevaan 4 mèt eder 'n paar pu. Ouch al zien ze klein, ze höbbe toch ouge, 'ne moond, pu en 'n spijsvertering.

Ze leve in 'n vochtege umgeving euveral op de wereld, zoewel in zaajt es zeut water, mer ouch op 't land in beveurbeeld mosse. Ze zien te vinde op groete huugdes in de Himalaya (bove de 6000 m), mer ouch in de deepzie (oonder de 4000 m) en vaan de pole tot aon de evenaar.

Euverlevingsstrategieë

Vaan 't beerbieske is bekind tot 't zier bestand is tege extreem umstandeghede. Sommege beerbieskes kinne temperature weerstoon vaan -272 °C, dewijl aandere hoeg temperature vaan 150 °C mierdere minute kinne weerstoon, drökke vaan 6 kier zoe hoeg es te kins vinde in de deepste oceaontroge, mer ouch 't vacuüm vaan de ruimte. Ze kinne ioniserende straoling weerstoon vaan hoonderde kiere de doejeleke dosis veur 'ne mins. Ze kinne mie es 30 jaor zoonder veujsel en water, boebij ze oetdruge tot ze oet minder es 3% water bestoon, um, es ze weer in kontak koume mèt water, weer te rehydratere en weer gewoen goon ete en zelfs veurtplante.