Alfadeeltjie
’n Alfadeeltjie bestaan uit twee protone en twee neutrone wat ’n deeltjie soortgelyk aan ’n heliumkern vorm. Hulle word gewoonlik geproduseer tydens alfaverval, maar ook op ander maniere. Alfadeeltjies is genoem na die eerste letter van die Griekse alfabet. Die simbool daarvan is α of α2+. Omdat hulle ooreenstem met heliumkerns, word dit ook soms geskryf as He2+ of 42He2+, wat dui op ’n heliumioon met ’n lading van +2 (dus sonder twee elektrone). As die ioon elektrone uit die omgewing bykry, kan die alfadeeltjie geskryf word as ’n gewone (elektries neutrale) heliumatoom: 42He.
Alfadeeltjies is swaar en beweeg selfs in lug nie baie ver nie. Hulle is baie ioniserend, alhoewel hulle nie die menslike vel kan binnedring nie. Alfadeeltjies kan gevolglik net binne-in die liggaam skadelik wees. Hulle kan die liggaam binnedring deur die inaseming van radioaktiewe stof of die inname van radioaktiewe materiaal wat alfastraling afgee.
Indien radioaktiewe elemente wat alfadeeltjies uitstraal wel in ’n mens se liggaam beland, kan dit gevoelige organe soos die longe en skelet beskadig. Deur stofbeheermaatreëls te installeer of die regte gebruik van asemhalingsbeskermingsapparate soos stofmaskers, kan die inaseming of inname van materiale wat alfadeeltjies afgee tot die minimum beperk word.
