George Soros
George Soros | |
|---|---|
 Soros tydens die Münchense konferensie in 2011 | |
| Gebore | György Schwartz 12 Augustus 1930 Boedapest, Hongarye |
| Nasionaliteit | Hongarye, Verenigde State |
| Netto batewaarde | $8 miljard[1] |
| Eggenoot | Annaliese Witschak (1960–1983) Susan Weber Soros (1983–2005) Tamiko Bolton (2013–) |
George Soros (gebore György Schwartz, 12 Augustus 1930) is 'n internasionale finansier, bestuurder van fondse en filantroop. Hy wend sy fortuin aan om onder meer finansiële steun aan burgerregteorganisasies, onderwysinstellings en politieke kampvegters te verleen. In die vroeë 1990's het hy ook die anti-apartheidsbeweging in Suid-Afrika ondersteun.
Binne drie dekades het George Soros tussen elf en twaalf miljard VS$ vir liberale projekte en inisiatiewe op alle vyf vastelande geskenk. Die gesiene Britse dagblad The Independent het hom as die mensheid se grootste finansiële ondersteuner van demokratiese ideale beskryf. Vrye media sowel as vrye en oop kennis lê hom eweneens na aan die hart. So het hy ook ruim bygedra tot die Wikipedia-projek met donasies vir die Wikimedia-stigting.[2]
George Soros is amptelik die 190ste rykste persoon op aarde;[1] sy rang is relatief laag omdat hy in 2017 $18 miljard van sy rykdom aan sy organisasies geskenk het.[3]
Soros is 'n genaturaliseerde Amerikaanse burger wat in Hongarye gebore is. Sy netto waarde staan na raming op ongeveer $8 miljard, welke nie die $18 miljard van sy rykdom insluit wat hy in 2017 aan sy organisasies oorgedra het nie.[3]
Die kombinasie van 'n groot fortuin, steun vir liberale gedagtes en burgerrregte en 'n Joodse afkoms maak van Soros die ideale haatfiguur vir regsgesindes en outokrate. Die haatspraak teen Soros toon baie ooreenkomste met die historiese anti-semitiese vyandbeeld van 'n "wêreldsamesewering van Joodse geld" waarin vroeër die bankier Rothschild sentraal gestaan het.
In 1992 het Soros die titel die man wat die Bank van Engeland gebreek het gekry,[4] omdat hy die Britse pond verkort het. Hy het 'n wins van $1 miljard met die transaksie van $10 miljard gemaak. Soros word ook daarmee gekrediteer dat hy die Maleisiese finansiële mark laat ineenstort het.[5] Hy het in 2017 beweer dat die konserwatiewe Hongaarse regering van Viktor Orbán – 'n groot kritikus van Soros – "meer onderdrukkend is as wat dit tydens die Russiese besetting was", met verwysing na die tydperk toe Hongarye 'n kommunistiese satellietstaat van die USSR was.[6][7]
Vroeë lewe
[wysig | wysig bron]Soros is op 12 Augustus 1930 in Boedapest, Hongarye gebore. Sy ouers was Elizabeth en Tivadar Soros. Tivadar, wat soms Teodoro Ŝvarc genoem is,[8] was 'n aktiewe Esperantis. George Soros het Esperanto by sy vader geleer.[9][10]
George Soros se geboortenaam is György Schwartz; sy familienaam is in 1936 van Schwartz na Soros verander om antisemitiese aanvalle te voorkom. Die naam "Soros" self is afgelei van 'n Esperanto-woord Sori, wat "om te sweef" beteken.[11] George Soros het later gesê dat hy "grootgeword het in 'n Joodse, antisemitiese huis", en dat sy ouers "ongemaklik was met hul godsdienstige wortels".[12]
In 1947 het George Soros van Hongarye na Londen geëmigreer waar 'n gebeurtenis plaasgevind het wat die ontwikkeling van sy persoonlikheid en wêreldbeskouing grootliks beïnvloed het. Nadat hy om en by Kerstyd 'n tydelike pos as spoorwegportier gehad het, is sy been gebreek; die Nasionale Gesondheidsdiens (National Health Service, NHS) het gratis na hom omgesien,[13] terwyl die Joodse hulpagentskappe van daardie era nie die hulp aangebied het wat hy geglo het hulle aan hom verskuldig was nie. Dit is tydens hierdie tydperk dat Soros se gunstige mening oor die Demokratiese Sosialisme gebore is, en sy negatiewe siening van baie Joodse groepe te berde gebring is.
Soros se onmiddellike familie het in die middel van die vyftigerjare in die Weste by hom aangesluit.
Loopbaan
[wysig | wysig bron]Soros se eerste pos gedurende sy jare in Londen was by by Singer & Friedlander, 'n handelsbank wat in 1907 gestig is.[14] In 1956 het hy na New York getrek en vir die firma F. M. Mayer gewerk.[15] Soros het op 18 Desember 1961 'n Amerikaanse burger geword.[16]
In 1992 het Soros die titel die man wat die Bank van Engeland gebreek het verwerf,[4] omdat hy die Britse pond verkort het. Hy het 'n wins van $1 miljard gemaak met die transaksie van $10 miljard. Soros word ook gereken as die oorsaak van die ineenstorting van die finansiële mark in Maleisië.[5]
Persoonlike ambisie
[wysig | wysig bron]George Soros het tydens 'n onderhoud in Junie 1993 met The Independent gesê dat hy homself beskou as "een of ander soort god, die skepper van alles."[17] Twee jaar later het hy homself uitgebeeld as iemand wat talle eienskappe met "die God van die Ou Testament" deel – "[J]y weet, soos onsigbaar. Ek was redelik onsigbaar. Welwillend. Ek was redelik welwillend. Alsiende. Ek het probeer om alles te sien."[18] Soros het aan sy biograaf Michael Kaufman vertel dat dit sy doel is "om die gewete van die wêreld te word" deur gebruikmaking van sy liefdadigheidsorganisasies.[19]
In sy boek getiteld Underwriting Democracy uit 1991 sê Soros:
|
Om die waarheid te vertel, ek dra reeds sedert my jeug sekere sterk messiaanse fantasieë, fantasieë wat ek wil laat gebeur .... tot die mate dat ek dit kan bekostig.[20] |
|
Soros het in sy boek uit 1987, getiteld The Alchemy of Finance, gesê:
|
|
Ek gee toe dat ek nog altyd 'n oordrewe siening van my eie belang gehad het ― om dit onomwonde te stel, ek het myself as 'n soort god of 'n ekonomiese hervormer soos Keynes of, nog beter, 'n wetenskaplike soos Einstein gesien.[21] |
|
George Soros het in The Age of Fallibility: Consequences of the War on Terror geskryf:
|
|
Die grootste hindernis vir 'n stabiele en regverdige wêreldorde is die Verenigde State.[22] |
|
Soros was krities oor Amerikaanse militêre ingrype. In sy boek Open Society: Reforming Global Capitalism spel hy sy kritiek uit:
|
|
Dit kan skokkend klink dat ek dit sê, maar ek glo dat die huidige eensydige houding van die Verenigde State 'n ernstige bedreiging vir die vrede en welvaart van die wêreld inhou.[22] |
|
Soros glo dat kapitalisme die vyand van 'n oop samelewing is en dat die oplossing is om markte te reguleer wat nie deur kapitalisme beheer word nie. Met verwysing na die stand van die wêreld na die ineenstorting van die Sowjetunie het hy gesê:
|
|
Die grootste vyand van die oop samelewing is volgens my nie meer die kommuniste nie, maar die kapitalistiese bedreiging.[22] |
|
Lande wat Soros toegang geweier het
[wysig | wysig bron]Soros en sy organisasies is amptelik verbied om ses lande te betree. Hierdie lande is die Filippyne, Rusland, Turkye, Pole, Pakistan en sy geboorteland Hongarye.
Werke
[wysig | wysig bron]- The Alchemy of Finance, (1988)
- Opening the Soviet System, (1990)
- Underwriting Democracy: Encouraging Free Enterprise and Democratic Reform Among the Soviets and in Eastern Europe, (1991)
- Soros on Soros: Staying Ahead of the Curve, (1995)
- The Crisis of Global Capitalism: Open Society Endangered, (1998)
- Science and the Open Society: The Future of Karl Popper's Philosophy, (2000)
- Open Society: Reforming Global Capitalism, (2001)
- George Soros on Globalization, (2002)
- The Bubble of American Supremacy: Correcting the Misuse of American Power, (2003)
- The Age of Fallibility: Consequences of the War on Terror, (2006)
- The New Paradigm for Financial Markets: The Credit Crisis of 2008 and What it Means, (2008)
- The Soros Lectures at the Central European University, (2010)
- Financial Turmoil in Europe and the United States: Essays, (2012)
- The Tragedy of the European Union: Disintegration or Revival?, (2014)
Aanhalings
[wysig | wysig bron]- "Ek het in 1947 na Engeland gegaan en in 1956 na die Verenigde State. Maar ek het nooit heeltemal 'n Amerikaner geword nie."[16]
Verwysings
[wysig | wysig bron]- ↑ 1,0 1,1 The World's Billionaires Geargiveer 28 September 2017 op Wayback Machine. Forbes. Opgespoor op 21 Augustus 2018.
- ↑ Wikimedia Stigting, 15 Oktober 2018: George Soros, founder of Open Society Foundations, invests in the future of free and open knowledge. Besoek op 23 Mei 2020
- ↑ 3,0 3,1 https://www.nytimes.com/2017/10/17/business/george-soros-open-society-foundations.html
- ↑ 4,0 4,1 Stocks Soros And Druckenmiller Have In Common, Gurufocus.com, 14 Desember 2009
- ↑ 5,0 5,1 Killing Capitalism Soros-Style, American Spectator, 4 November 2009
- ↑ Dunai, Marton (1 Desember 2017). Hungary PM Orban, U.S. financier Soros clash as elections loom Geargiveer 25 Augustus 2018 op Wayback Machine. Reuters. Opgespoor op 3 Desember 2017.
- ↑ Hungarian PM Orban says George Soros will interfere in election, vows to stop him. RT. 2 Desember 2017. Opgespoor op 3 Desember 2017.
- ↑ Teo Ŝvarc/Teodoro Schwartz/Tivadar Soros
- ↑ Billionaire George Soros is a native speaker of the constructed language Esperanto
- ↑ The Religious Quest of George Soros
- ↑ George Soros Facts: 7 Things You Might Not Know About Billionaire, NewsMax
- ↑ Slater, R., "Soros: The Unauthorized Biography", page 30, McGraw-Hill, 09-30-2007.
- ↑ The Philanthropy of George Soros: Building Open Societies
- ↑ Boomerang: Travels in the New Third World
- ↑ Tea Party Factor
- ↑ 16,0 16,1 The Man Who Moves Markets
- ↑ The Billionaire Who Built on Chaos – George Soros (The Independent: 3 Junie 1993)
- ↑ Glenn Beck: Making of the Puppet Master
- ↑ George Soros Discusses Efforts to Spread Democracy,NPR
- ↑ George Soros, Underwriting Democracy, bl. 3
- ↑ George Soros, The Alchemy of Finance (1994 edition), p. 362
- ↑ 22,0 22,1 22,2 In His Own Words: An Examination of Some of Soros’ Socioeconomic Philosophies Geargiveer 3 September 2012 op Wayback Machine, The Blaze
Eksterne skakels
[wysig | wysig bron]- Amptelike webtuistes
- Haatspraak van regses teen George Soros
Normdata  |
|
|---|