Hedi Lang

Hedi Lang

D Hedi Lang (* 30. Oktober 1931 als Hedi Gehri z Uschter; † 31. März 2004 z Zollikerbärg, reformiert) isch e Schwiizer Politikerin (SP) gsii. Si het als zwoti Frau na dr Elisabeth Blunschy (1977) dr Nationalrat präsidiert.

Läbe

D Hedi Gehri isch d Tochter vom Chäser und Gwärkschafter Johann Gehri vo Seedorf BE gsii. Im Jahr 1957 het si dr Journalischt Erwin A. Lang ghirate. Nach ere Banklehr z Uschter het si als Sekretärin gschaffet, ab 1959 isch si Mitarbäiterin in dr Redaktion vo "Die Arbeit" (ab 1960 "Oberländer Arbeiter-Zeitung") gsii, wo vo ihrem Maa gfüert worden isch.

Politik

Anne 1961 isch si in d SP iiträtte, 1971 in dr VHTL. Vo 1966 bis 1970 isch si Primarschuelpflägerin gsii, vo 1970 bis 1978 Mitglid im Wetziker Gmäindsrat. Churz na dr bundeswiite Iifüerig vom Frauestimmrächt, isch d Hedi Lang anne 1971 in dr Nationalrat gwehlt worde. 1981 isch si Nationalratspräsidentin worde.

Im Jahr 1983 isch si in dr Regierigsrat vom Kanton Züri gwehlt worde, au das isch e Premiere gsii für e Frau in dr Schwiiz. Bis 1991 het si d Direktion vo dr Justiz un vom Innere gläitet, derna isch si bis 1995 dr Volkswirtschaftsdirektion vorgstande. Zweimal (1989/90 und 1994/95) isch si au Präsidentin vom Regierigsrat gsii.

1973 bis 1983 isch si Präsidentin vom Verband Pro Familia Schwiiz gsii, vo 1975 bis 1990 Verwaltigsrätin vo dr Suva, 1995-2001 vo dr Winterthur.

In ihri Ziit als Regierigsrätin falle d Iifüerig vom Stimmrächtsalter 18 Jahr, dr Nöibau vo dr Strafaastalt Rägeschdorf und d föift Uusbauetappe vom Flughafe Chlote. Wichtigi Politikfälder sind für si vor allem d Familie-, d Sozial- und d Gliichstelligspolitik gsii.

Weblink

• Markus Bürgi: Lang, Hedi. In: Historisches Lexikon vo dr Schwiiz.
• Roger de Weck: Hedwig Lang: Die Frau von nebenan, Die Zeit, 25.06.1982