Artes decorativas
As artes decorativas son todas aquelas actividades relacionadas coa arte ou a artesanía dirixidas a producir obxectos cunha finalidade tanto utilitaria como ornamental. Polo xeral son obras realizadas con elaboración industrial ou artesanal pero que perseguen unha determinada finalidade estética. O concepto é sinónimo das chamadas artes aplicadas ou artes industriais, tamén chamadas ás veces artes menores en oposición ás "artes principais" ou belas artes. En certo sentido, as artes decorativas son un termo aplicado preferentemente ás artes industriais, así como á pintura e á escultura, cando o seu obxectivo non é xerar unha obra única e diferenciada, senón que buscan unha finalidade decorativa e ornamental, xeralmente de produción en serie.[1]
As artes decorativas inclúen procedementos e técnicas como cerámica, mosaico, ebanistaría, ourivaría, glíptica, esmalte, incrustación, metalurxia, téxtil, tapicería, coiro ou vidro. Tamén a miúdo engloba as artes gráficas como o gravado e a miniatura (iluminación).[2]
As artes decorativas estiveron presentes en maior ou menor medida en todos os períodos da historia da arte en xeral, ben en solitario ou en conxunto con outras artes, especialmente a arquitectura. En moitos casos marcaron de xeito decisivo algún período histórico, como a arte bizantina, islámica ou gótica, de tal xeito que non sería posible valoralo adecuadamente sen a presenza deste tipo de realizacións. Noutros casos, especialmente o das culturas nómades, é o único tipo de realización artística que realizan estes pobos, como é o caso dos escitas ou dos pobos xermánicos que invadiron o Imperio Romano. En moitas culturas, as artes decorativas tiveron un status similar ao resto das artes, como é o caso da cerámica grega ou da laca chinesa. Tamén cabe valorar a estreita relación entre as artes decorativas e a cultura popular, que moitas veces tivo neste medio o seu principal medio de expresión.[3]
Galería
[editar | editar a fonte]-
Vidrieiras da catedral de Colonia -
Cerámica andalusí -
Máscara funeraria tamén coñecida como "Máscara de Agamenón" -
Notas
[editar | editar a fonte]- ↑ Fatás, Guillermo; Borrás, Gonzalo M. (1990). Diccionario de términos de arte y elementos de arqueología, heráldica y numismática. Alianza. ISBN 84-206-0292-2.
- ↑ Diccionario de Arte I. Spes. 2003. ISBN 84-8332-390-7.
- ↑ Borrás Gualis, Gonzalo M. (2010). Introducción general al arte. Akal. ISBN 978-84-7090-107-2.