De Berg

Dit artikel is gesjreve (of begós) in 't Bergs (Ubachsberg). Laes hie wie v'r mit de versjillende saorte Limburgs ómgaon.

---

Zich óp Gen Berg vanaaf de Vrouwehei

De Berg of Gen Berg (Nederlands: Ubachsberg) is ee dörp in de gemingde Voelender in Zuud-Limburg. 't Dörp is hoeëggeleage, op 'ne berg. Waeg die noa bove lope, heisje: de Kunderberg, de Pötberg (bekind van 't fietsrenne) en de Bergseweag. Hei en op Vrouwehei bevinge zich orchidee- en natuurreservate. 't Oetzich vanoet Gen Berg is wied, bekans tot Aoke en in de umgeving zint mië es vieftig kirktoeres te óndersjeie. D'r ligke doezend weuninge. In 2014 woeëne d'r 1.830 luuj.

De buurtsjappe

• Koalmet (Colmont)
• Frómmerig (Fromberg)
• Mingesjborg (Mingersborg)
• Windjhage (Windhagen)

D'r naam

De aodste vermelding van dees plaats, mit d'r naam Ubac, sjtamt oet 1234. Óp 't Frans heisj Ubac d'r sjieëmzie van 'ne berg, de op 't noorde gerichde helling, d'r kant van 'ne heuvel woa noeëts de zón kunt. Ubac is ooch 't gemingsjappelig pseudoniem van de Belsje sjrievers van Génération Fourons, 'n Franssjpraokig wirk euver de Voerkwestie. D'r naam weëd ooch in verbank gebrach mit ooi, dat veld of waterland heisj.

Óp Gen Berg bevingk zich ein van de twieë Limburgse Michelin-twieësjterrerestaurante: De Leuf.

Bezeenswaerdig

E aantal häöf en hoezer is geboewd van kundersjtein.

De katholieke kirk haet deile oet de middelieëwe. In 1841 woeëde 't sjeep en de toere geboewd. In 1924 woeëd aan ge einbeukig, brikke zaalkirkske, 'n oeëstelig deil en haufrónne absis van kundersjtein aangeboewd in neo-romaanse sjtiel.

De windmeule óp de Vrouwehei, van 't type beltmeule, dateert van 1857. Ze ligk eigelig mieë i g'n buurt Mingesjborg, óp 'ne tuup van 215 maeter. Ze is de hoeëgsgelaege windmeule van Nederland. In de lètste daag van d'r Twieëde Weltkreeg hant Ingelsje soldaote 't geboew 'per óngeluk' in brank gesjtoke. In 1980 is begós aan 'n tieën jaor lang restauratie.

De wiengaarde van 't wiengood Frómberg zint aangelag in 1991. Wiensoorte: Auxerrois, Müller Thurgau, Reichensteiner, Riesling en Pinot Noir.

't Gehuch Frómmerig (Fromberg) bevingk ziech lieger aaf i g'n buurt van Eëtenake

Evenemente

Kèrmes weëd gehaote óp 'ne zóndig rónk 10 augus.

Dörpsvereiniginge

• Fanfare Sint Cecilea opgeriech in 1909
• Sjötterie Sint Hubertus oet 1843
• Carnavalsvereiniging de Durchströpere

Fotogalerie

• 
  't Dörpssjild
• 
  'n Gedeilte van de kirk óp Gen Berg is geboewd in kundersjtein
• 
  De kalköaves aa g'ne Daelswaeg