Duku
| Duku
| |
|---|---|
Lansium domesticum  | |
| Taksonomi | |
| Divisi | Tracheophytes |
| Subdivisi | Spermatophytes |
| Klad | Angiosperms |
| Klad | mesangiosperms |
| Klad | eudicots |
| Klad | core eudicots |
| Klad | Superrosids |
| Klad | rosids |
| Klad | malvids |
| Ordo | Sapindales |
| Famili | Meliaceae |
| Genus | Lansium |
| Spesies | Lansium domesticum Corrêa, 1807 |
|
| |
 Media: Duku | |
 | |
Duku adolah jinih buah-buahan dari anggota suku Meliaceae. Tanaman nan asanyo dari Asia Tenggara sabalah barat iko punyo kamiripan jo buah langsek, kokosan, pisitan, celoring dan lain-lain jo baragam variasinya. Namo-namo nan baragam iko sakaligus manunjuakkan adonyo aneka kultivar nan tacamin dari bantuak buah jo batang nan babedo-bedo.
Botani
[suntiang | suntiang sumber]Batang nan baukuran sedang, tingginyo mancapai 30 m jo gemang hinggo 75 cm. Batangnyo biasonyo ba alur-alur dalam indak baraturan, jo banir (akar papan) nan pipih manonjol di ateh tanah. Pepagan (kulik kayu) warnanyo kalabu babintiak-bintika kalam jo jingga, manganduang gatah kental jo warna sarupo susu nan lengket (resin).[2]
Daun majemuk manyirip ganjia, botak atau babulu haluih, jo 6–9 anak daun nan tasusun baseling, anak daun jorong (eliptis) sampai lonjong, 9–21 cm × 5–10 cm, bakilek di sisi ateh, sarupo jangat, jo pangka runciang dan ujuangnyo marunciang (meruncing) pendek, anak daun batangkai 5–12 mm.[2]
Bungo talatak ditandan nan kalua dari batang atau cabang nan gadang, manggantuang, tongga atau dalam berkas 2-5 tandan atau labiah, acok juo bacabang dipangkanyo. Panjangnyo 10–30 cm, barambuik.[3] Bungo-bungonyo baukuran ketek, duduak, atau batangkai pendek, manyandiri, punyo kalamin duo. Kalopaknyo babantuak cawan bacaping 5, badagiang, kuniang kahijauan, mahkotanyo bulek talua, tagak, badagiang 2–3 mm × 4–5 mm, putiah hinggo kuniang pucek. Banang sari ciek halai, tabuangnyo mencapai 2 mm, kepalo-kepalo sari dalam ciek lingkaran. Putiaknyo taba jo pendek.[2]
Buah buni nan babantuak jorong, bulek atau bulek mamanjang, 2-4(-7) cm × 1,5–5 cm, punyo bulu haluih kakuniang-kuniangan jo daun kalopak nan indak gugua. Kulik (dindiang) buah tipih hinggo taba (kiro-kiro 6 mm). Babijo 1–3, pipih, hijau, rasonyo paik; bijo dibungkuih salut bijo (arilus) nan putiah bening dan taba, baraia, manih sampai masam.[2] Kultivar-kultivar nan unggul punyo bijo nan ketek atau indak bakambang (rudimenter), tapi arilusnyo tumbuah rancak dan taba, manih.
Lambeknyo tanaman manghasiakan buah karano duku bakambang menggunokan bijo. Tanaman baru babungo di umua 10 sampai 15 tahu.[4] Perkecambahan tumbuahan iko punyo perilaku poliembrioni (ciek bijo manghasiakan banyak embrio atau semai): ciek embrio hasia pambuahan, dan sisonyo embrio apomiktik,[5]. Embrio apomiktik bakambang dari jariangan batang induak sahinggo katurunannyo punyo karakter nan sarupo jo induaknyo. Bijo bersifat rekalsitran, panyimpanan labiah daripado tujuah hari akan mambuek kamunduran kakuatan kacambah nan capek.[6]
Perbanyakan vegetatif dikarajoan jo pencangkokan dan sambuang pucuak.[4]
Ragam
[suntiang | suntiang sumber]
Duku sanagt baragam dalam sipaik-sipaik batang jo buahnyo; sahinggo ado pulo ahli nan maisah-misahkannyo ka dalam jenis (spesies) nan balain. Namun sacaro keseluruhan, ado duo kalompok gadang buah iko, yakni nan dikenal jo duku dan nan dinamokan lansek. Kamudian ado kalompok campuran antaro kaduonyo nan disabuik duku langsek, sarato kalompok tarakir nan di Indonesia labiah dikenal sabagai kokosan.[2]
Kamlompok nan dikenal jo duku (L. domesticum var. duku) umumnyo punyo batang nan batajuak gadang, padek, dek daunyo nan bawarna hijau cerah, jo tandan nan relatif pendek jo barisi saketek buah. Butiran buahnyo gadang, candaruang bulek, bakulik agak taba, namun labiah indak bagatah jikok masak, umumnyo babijo ketek jo badagiang taba, manih, atau masam jo baunnyo harum.[2][7]
Langsek (L. domesticum var. domesticum) kabanyakan punyo batang nan labiah kuruih, daunnyo kurang labek nan bawarna hijau tuo, jo pacabangan tagak. Tandan buahnyo panjang, padek barisi 15-25 butir buah nan babantuak bulek talua dan gadang-gadang. Buah langsek punyo kilik mipih dan acok bagatah (putiah) walaupun alah masak. Dagiang buahnyo banyak aia, rasonyo masam manih nan mambuek segar.[2][7]
Indak sarupo duku, langsek bukan buah nan batahan lamo kalau alah lapek dari batangnyo. Dalam tigo hari setelah dipatiak, kulik langsek akan maitam namun rasonyo indak barubah tetap manih. Hanyo sajo penampilannyo indak menarik.
Kokosan (L. domesticum var. aquaeum) dibedakan dek daunyo nan babulu, tandannyo nan panuah butia buah nan basusun sangaik rapek jo kulik buahnyo nan bawarna kuniang tuo. Butia-butia buahnyo umumnyo ketek, bakulik tipih jo saketek bagatah tapi payah dibukak. Sahinggo buah dimakan jo caro digigik jo disedot cairan jo bijonyo (disabuik kokosan),[2] atau dipiciak supayo kuliknyo pacah dan kalua bijonyo (makonyo diagiah namo pisitan, pijetan, bijitan).[7] Bijonyo labiah gadang jo badagiang tipih, kokosan umumnyo taraso masam sampai masam bana.
Kultivar duku nan paliang terkenal di Indonesia adolah duku Palembang, tarutamo karano manih rasonyo jo saketek bijonyo. Sabananyo daerah panghasia duku utamo bukanlah Kota Palembang, malainkan daerah Komering (Kabupaten OKU dan OKI) sarato babarapo wilayah lain badakek an jo Sumatra Selatan. Tampek lain nan juo manghasiakan duku adolah kawasan Kumpeh, Muaro Jambi, Jambi. Duku dari wilayah-wilayah iko dipasarkan ka bamacam daerah di Sumatra dan Jawa, dan bahkan diekspor.[8][9]
Di sampiang duku palembang, bamacam daerah nan juo manghasiakan dukunyo masiang-masiang. Di Jawa, ado babarapo kawasan nan terkenal sacaro lokal adolah duku condet (dahulu juo duku menteng jo duku depok) dari saputaran Jakarta; duku papongan dari Tegal; duku kalikajar dari Purbalingga; duku karangkajen dan duku klaten dari Yogyakarta; duku matesih dari Karanganyar; duku woro dari Rembang; duku sumber dari Kudus, dan lain-lain.[7][10][11][12] Di Kalimantan Selatan, dikenal duku Padang Batung dari Kabupaten Hulu Sungai Selatan.[13]
Maingek daya tahan buahnyo nan indak sarupo duku, langsek, umumnyo dikenal sacaro labiah tabateh dan lokal. Babarapo kultivar nan populer diantaronyo adolah langsep singosari dari Malang,[9] langsek tanjuang dari Kalsel,[13] langsek punggur dari Kalbar, dan sebagainyo. Dari Thailand dikenal langsek uttaradit, dan dari Luzon, Filipina, dikenal langsat paete.[2]
Manfaik jo kagunoan
[suntiang | suntiang sumber]
Duku tarutamo ditanam untuak buahnyo, nan biaso dimakan dalam kaadaan segar. Ado juo nan mengawetkannyo dalam sirup dan dibotolkan.[2] Kayunyo kareh, padak, baret dan awet, sahinggo acok digunokan untuak bahan pakakeh dan konstruksi rumah di pakampuangan, tarutamo kayu pisitan.[7]
Babarapo bagian tanaman digunokan untuak ubek tradisional. Bijo duku nan pahik rasonyo, ditumbuak dan dicampua jo aia untuk ubek caciang jo ubek damam. Kilik kayunyo digunokan untuak ubek disentri jo malaria, samantaro tapuang kulik kayunyo dijadikan tapal untuak maubek gigitan kalajengking. Kulik buahnyo digunokan untuak ubek diare, dan kulik buah nan dikariangkan digunokan untuak mausia rangik dek urang Filipina jo caro dibaka.[2][7] Kulik buah langsat tarutamo, dikariangkan dan diolah untuak dicampuakan dalam setanggi atau dupa.[7]
Ekologi
[suntiang | suntiang sumber]Sebagai tanaman batajuak manangah, duku tumbuah rancak dalam kabun-kabun campuran (wanatani). Tanaman iko, tarutamo varietas duku, manyukoi tampek-tampek nan ternaung jo lambok. Di daerah-daerah produksinyo, duku biaonyo ditanam bacampua jo durian, patai, jariang, sarato aneka tanaman buah jo kayu-kayuan lainnyo, walaupun tetap duku nan mandominasi.[2][10]
Duku biasonyo ditanam di daratan randah dengan ketinggian mancapai 600 m dpl, di wilayan jo curah hujan antaro 1.500-2.500 mm per tahun. Tanaman iko dapek tumbuah dan babuah dengan baik di baragam jenis tanah, tarutamo tipe tanah latosol, podsolik kuniang, dan aluvial.[10] Duku manyukoi tanah batekstur sadang dan berdrainase rancak, kayo bahan organik dan saketek asam, tapi jo ketersediaan aia tanah nan cukuik. Samantaro itu varietas langsek labiah tahan manghadapi parubahan musim dan dapek manenggang musim kemarau asalkan cukuik ternaungi dan mandapekkan aia.[2] Duku indak tahan pangganangan.[14] Duku umumnyo babuah sakali satahun, sahinggo dikenal jo adonyo musim buah duku. Musim duku bisa balainan antaro daerah lain, namun baitu musim duku tajadi di awal musim paujan.
Pangambangbiakan
[suntiang | suntiang sumber]
Duku biasonyo dipabanyak jo bijonyo, nan sanganjo disamaikan atau jo caro manggumpuakan cabutan semai nan tumbuah surang di bawah batang induaknyo. Akan tatapi manunggu sampai batang baru mahasiakan, mamakan wakatu nan lamo (20-25 tahun) dan alun pasti pulo kualitasnyo samo jo induaknyo.[15]
Caro lain nan juo populer adolah mancangkoknyo. Walaupun proses mancangkok mamakan wakatu nan cukuik lamo (8-9 bulan), aka kalua setelah 134 hari[4]) namun batang baru hasia cangkokan alah dapek babuah diumua sekitar duo tahun.[11] Kelemahannyo, persen kematian anakan hasil cangkokan cukuik gadang.[2] Lagi pulo pertumbuhannyo indak sabara kuatnyo.[10]
Kambang biak sacaro modern nan kini banyak dikarajoan adolah jo caro sambuang pucuak (grafting). Teknik iko mamungkinkan sipai-sipaik genetik batang ateh anakan nan dihasiakan samo jo induaknyo, samantaro wakatu tunggunyo dipasingek manjadi 5–6 tahun. Anakan hasia sambuang pucuak iko juo labiah kuek peranakannyo daripado anakan hasia cangkokan.[15]
Panyebaran jo namo-namo lokal
[suntiang | suntiang sumber]Wilayah asal usul duku membantang dari sekitar Siam, Semenanjung Tanah Melayu sampai Borneo di timur, tamasuak juo Filipina. Di daerah-daerah itu, duku ditanam sebagai salah ciek buah-buahan nan pantiang. Bahkan varietas-varietas lia atau nan maliaa dapek ditamui di alam. Kini duku juo dibudidayakan, walau indak banyak, di Vietnam, Burma, Srilanka, India, Australia, Hawaii, Suriname, dan Puerto Rico.[2][14]
Duku dikenal juo jo banyak namo, sarupo langsak, langseh, langsep, lansa (Mal.); lansones, lanzone, lanzon, dan buahan, (Fil.); langsad, longkong (Thailand); lòn bon dan bòn bon (Vietnam); langsak, duku (Burma); sarato gadu guda (Srilanka). Dalam bahasa Inggris juo disabuik sebagai langsat dan duku.[14][16]
Di Indonesia sendiri duku disabuik jo berbagai namo, nan mirip maupun nan indak. Misalnyo langsat (umum); lansat, lancat (Aceh dan Sumut); lasé (Nias); langsék (Min.); langsak (Komering) langsak, lasak, rarsak, rasak (Lampung); lansét, lasat, losot, léhat, lihat, rihat, richat (Kal.); lansa, lasat, lasot, lansot, dansot, ranso, lantat (Sulut); lansa, lasa, lasé, lésé (Sulsel); lasat, lasaté, lasété, nasaté, lasato, lalasat, lasa (Maluku) dan sejenisnya. Serta langsat, langsep dan duku, dukuh (Jw.); kokosan, pisitan, bijitan (Sd.); pijetan, celuring (Jw.); celoréng (Md.; celoring, ceroring (Bali); dan lain-lain.[7]
Padagangan
[suntiang | suntiang sumber]Negara-negara panghasia utamo duku adolah Malaysia, Thailand, Filipina dan Indonesia. Namun umumnyo duku habis dimakan di dalam negeri masiang-masiang, kecuali saketek nan diekspor ka Singapura dan Hongkong. Duku juo alun manembus pasa buah-buahan di Eropa jo Amerika.[2]
Rujuakan
[suntiang | suntiang sumber]- ↑ "The Plant List: A Working List of All Plant Species". Diarsipkan dari versi asli tanggal December 7, 2022. Diakses tanggal May 16, 2014.
- ↑ a b c d e f g h i j k l m n o p Verheij, E.W.M. dan R.E. Coronel (eds.). 1997. Sumber Daya Nabati Asia Tenggara 2: Buah-buahan yang dapat dimakan. PROSEA – Gramedia. Jakarta. ISBN 979-511-672-2. Hal. 232-237.
- ↑ Steenis, CGGJ van. 1981. Flora, untuk sekolah di Indonesia. PT Pradnya Paramita, Jakarta. Hal. 255.
- ↑ a b c Polo D.C. 1926. Propagation of the lanzon by marcotage and by cuttings. The Phillippine Agriculturists 14(9): 613-623.
- ↑ R. Kiew, L.L. Teo and Y.Y. Gan. 2003. Assessment of the hybrid status of some Malesian plants using Amplified Fragment Length Polymorphism]. Telopea 10:225–233
- ↑ Suharyono UHY. 1981. Penelitian daya tumbuh biji duku (Lansium domesticum var. duku).
- ↑ a b c d e f g h Heyne, K. 1987. Tumbuhan Berguna Indonesia, jil. 2. Yay. Sarana Wana Jaya, Jakarta. Hal. 1126-1128.
- ↑ Suparwoto dan Yanter Hutapea. 2005. Keragaan buah duku dan pemasarannya di Sumatra Selatan[pranala nonaktif permanen][pautan nonaktif salamonyo], Jurnal Pengkajian dan Pengembangan Teknologi Pertanian Vol. 8(3) :436-444, Nopember 2005.
- ↑ a b Daud, I. 2000. Pohon duku berakar papan. Artikel pada Majalah Intisari, bulan Januari 2000.
- ↑ a b c d Duku Condet Archived 2009-10-30 di Wayback Machine., dan artikel-artikel sejenis pada laman IptekNet. Diakses 27/10/08.
- ↑ a b Anonim. Duku Sleman Dipelintir Pedagang Jadi Duku Palembang[pranala nonaktif permanen][pautan nonaktif salamonyo], artikel pada Harian Umum Pelita. Diakses 27/10/08.
- ↑ Garhan, D.A. Duku Woro Diakui Sebagai Duku Palembang Archived 2016-03-05 di Wayback Machine.[pautan nonaktif salamonyo], artikel pada Harian Umum Suara Merdeka, 14 April 2003. Diakses 27/10/08.
- ↑ a b Langsat Padang Batung Saingi Palembang Archived 2009-04-29 di Wayback Machine.[pautan nonaktif salamonyo], diakses 27/10/08.
- ↑ a b c Morton, Julia F. (1987). Fruits of warm climates. Miami, FL.: Florida Flair Books. pp. p. 201–203. ISBN 0961018410. http://www.hort.purdue.edu/newcrop/morton/langsat.html.
- ↑ a b Suparwoto. tt. Teknik perbanyakan duku dengan sambung pucuk.[pranala nonaktif permanen][pautan nonaktif salamonyo]
- ↑ Lansium domesticum Archived 2011-11-06 di Wayback Machine. pada ICRAF AgroforestryTree Database Archived 2014-03-05 di Wayback Machine.[pautan nonaktif salamonyo]. diakses 27/10/08.
Pranala lua
[suntiang | suntiang sumber] |
Wikimedia Commons mampunyoi media nan bahubuangan jo Lansium domesticum |
- (Indonesia) Deskripi di Kehati[pranala nonaktif permanen][pautan nonaktif salamonyo]
- (Inggirih) Fruits of Warm Climates: Langsat
- (Inggirih) ICRAF: Lansium domesticumArchived 2011-11-06 di Wayback Machine.
- (Inggirih) Famous Tropical Fruit: Duku