Atomteken

Dat Atomteken is de korte Schrievwies för de Naams vun de cheemsch Elementen, as de in Formeln un Tabellen (t. B. dat Periodensystem) bruukt warrt. Disse Teken sünd von de IUPAC fastleggt worrn, gellt internatschoonal un warrt ok in Länner bruukt, de an sik ganz annere Bookstaven verwennt.

De Tekens sünd afleidt von de latienschen oder greekschen Naams, bi de niegen Elementen warrt aver ok von de engelschen Beteken utgahn. Normalerwies besteiht dat Atomteken ut een oder twee Bookstaven, wobi de eerste jümmers groot schreven is. Enige künstliche Elementen mit’n hooge Atomtall hebbt noch keen afsluten Naam, man warrt mit vörlöpig latiensche Tallen nöömt. De hebbt afkört denn dree Bookstaven.

Bispelen för Atomteken sünd:

• O = Suerstoff (vun Oxygenium)
• C = Kohlenstoff (vun Carboneum)
• Ne = Neon
• Fe = Iesen (vun Ferrum)
• Au = Gold (vun Aurum)

Dorbi mutt’n aver op grote oder lütte Bookstaven acht geven, as t. B. mit dat C un dat O:

• Co steiht för dat Element Kobalt
• CO steiht aver för Kohlenstoff un Suerstoff, wat tohopen een Kohlenstoffmonoxid-Molekül dorstellt.