Leopold von Vangerow
August Philipp Leopold von Vangerow (* 15. April 1831 in Herwede; † 22. Juni 1881 in Bremerhoben) weer en düütschen Verleger un Bremerhobener Kommunalpolitiker.
Vangerow stamm ut en ole pommersche Adelsfamilie un weer de Söhn von’n königlich prüüßschen Hauptmann August von Vangerow (1797–1862) un de Koopmannsdochter Justine Sophie Schröder (1800–1857) ut Herwede. He hett en Lehr as Bookhändler maakt. 1852 keem he von Herwede na Bremerhoben üm en Filiaal von de Bookhandlung Heyse ut Bremen optoboon. He hett mit’n Bookdrucker Otto Remmler tohooparbeidt. De beiden hebbt dat Wochenblatt an der Unterweser grünnt un 1855 de Heyse-Bookhandlung övernahmen. Siet 1856 hett he dat Correspodenzblatt für Bremerhaven rutgeven. 1857 (na annere Borns 1855) weren he un Remmler Rutgevers von de Provinzial-Zeitung in Leh. 1864 keem dat Bladd as prohannöversch, later natschonalliberal Daagbladd in Geestmünn rut. Sien Verlag hett tosätzlich Böker un Broschüren rutbrocht.
1862 is Vangerow Maat von’n Gemeenraad von Bremerhoben worrn. He weer von 1867 bet 1879 Vörsitter von’n Gemeenraad un hett sik gegenöver den Senat in Bremen för en grote Egenstännigkeit von Bremerhoben insett. 1873 is op siene Initiative de Stadtbibliothek entstahn. De Utenannersetzungen bi dat Inföhren von de Stadtverfaten weren dat Enn von sien polietsche Loopbahn. Sien Anliggen, dat Bremerhoben en sülvstännige Gemeen in dat Land Bremen warrt, is aver dör de Annahm von de Stadtverfaten von’n 1. Oktober 1879 un dat Bestellen von en hauptamtlichen Stadtdirekter 1880 wohr worrn.
Vangerow hett an’n 24. September 1857 in Herwede Anna Engelbrecht (28. Juli 1834–30. September 1904) freet, de Dochter von Heinrich Engelbrecht, Goodsbesitter un Wiengroothändler in Ahmsen bi Herwede, un Henriette Charlotte Sengstake. De beiden harrn twee Döchter un dree Söhns, von de August von Vangerow (1863–1935) den Verlag wiederföhrt hett.