Northumberland

Northumberland
grevskap
Land	England
Region	Nordaust-England
Areal	5 013 km²
Folketal	311 000  (2008)
Grunnlagd	Historisk
Status	Seremonielt grevskap og sameint styresmakt
Northumberland 55.166666666667°N 2°W / 55.166666666667; -2
Kart som viser Northumberland. Kart som viser Northumberland.
Wikimedia Commons: Northumberland

Northumberland er eit seremonielt grevskap og sameint styresmakt i Nordaust-England. Det grensar til Cumbria i vest, County Durham i sør, Tyne and Wear i søraust, mot Scottish Borders (austskotske regionar attmed grensa mellom England og Skottland) i nord og mot Nordsjøen i aust. Northumberland er det minst folketette grevskapet i England med berre 62 innbyggjarar per kvadratkilometer. Grevskapet er kjend for det urørte landskapet med høge lyngheier, som i dag hovudsakleg er verna som ein del av Northumberland nasjonalpark, og er eit ynda landskap for mange kunstmålarar.

Etter at Tyne and Wear vart skipa i 1974, etter å ha vore lutar av grevskapa Northumberland og County Durham, har grevskapsrådet i Northumberland halde til i byen Morpeth, aust i grevskapet.

Opphavet til Northumberland er det tidlegare kongedømet Northumbria, men dagens Northumberland femner om eit mykje mindre landområde. Som kongedømet Northumbria under kong Edvin, strekte dei historiske grensene for regionen seg frå Humber i sør til elva Forth i nord. Dei historiske grensene til grevskapet dekte eit anna område, inkludert Newcastle upon Tyne, den tradisjonelle grevskapsbyen, og Tynemouth og andre busetnader i North Tyneside, som har vore ein del av Tyne and Wear sidan 1974. Dei historiske grensene til grevskapet utelet stundom Islandshire, Bedlingtonshire og Norhamshire (North Durham), eksklavane til County Durham som vart innlemma i Northumberland i 1844.

Sidan området ligg på grensa mellom England og Skottland, har mange militære slag funne stad her.

Geografi

Grensa mot Skottland vert danna av fjella Cheviot Hills (815 moh.) og elva Tweed. Andre elver er Tyne, Blyth og Coquet. Åsryggane består av granitt og andesitt frå devontida. Whin Sill er ein doleritt-intrusjon frå karbontida.

Landskapet i Northumberland er lågt og flatt nær Nordsjøkysten, og fjellrikt i nordvest. Det er rikt fugleliv langs kysten, som vert rekna som særleg vakker med 102 km lang stiar. Dalføra er fruktbare. Det er eit stort sauehald, og noko fiske.

Utanfor kysten av Northumberland ligg øyane Lindisfarne, og kalla Holy Island og Farne Islands, som består av doleritt.

På søraustkysten, nord for Tyne, ligg det kolfelt. Coquetelva renn gjennom landskapet.

Klima

Northumberland ligg i ei mild, temperert klimasone, og har eit typisk kystklima for Nordaust-England. Vêrlaget er særs omskifteleg, gjennomgåande med høg luftfukt. Gjennomsnittleg årleg temperatur er 7,1-9,3 °C. Det fell 466-1060 mm årleg nedbør.

Bakgrunnsstoff

• Northumberland grevskapsråd
• Offisiell turistside
• Enjoy Northumberland

Kjelder

• Denne artikkelen bygger på «Northumberland» frå Wikipedia på engelsk, den 28. november 2009.
  • Wikipedia på engelsk oppgav desse kjeldene:

• Askheim, Svein. (18. juli 2012). Northumberlands natur. I Store norske leksikon. Henta 10. februar 2014 frå http://snl.no/Northumberlands_natur.