Algoritmo
Algoritmo ha'e tembiapoukapy aty ikatúva jasegi ñambohovaisérõ peteĩ papapykuaa kuaara'ã térã peteĩ porandu asy, jaipuru avei jajapopasérõ ambue tembiapo jaguerojerapaséva. Upéicha ikatu jahero guarani etépe ko algoritmo apopyrãndy térã apoukapy rape, jepémo ndojeipurúi ko'ãva. Algoritmo ha'e mba'e ombohapéva, oñembohysýimava ha oñemohendapámava, jasegi ramo ko hapére ikatu ñambohováita peteĩ porandu térã ikatu jajuhúta mba'éichapa ojeipapa pe jahekáva.[1]
Techapyrã, ikatu jahecha peteĩ "tembi'u ñembosako'irã" algoritmo ramo, upe ñembosako'irãme jahecháta mba'éichapa jajapo va'erã ñane rembi'urã, jasegi ramo hapeitére, jarekóta tembi'u jaipotáva.
Ára ha ára jaipuru ko algoritmo ha oparupi jajuhu oñemyatyrõsévo térã oñembohovaiséro peteĩ mba'e. Techapyrã ambuéva ha'e umi kuatia mbokatupyrýva (manual, Epañañe'ẽme), umíva niko ñanembo'éva mba'éichapa ikatu jajapo térã ñamopu'ã peteĩ mba'e ha jasegipa ramo he'ívare peteĩ-teĩ imbo'epýre ikatúta jajapopa pe jaipotáva. Papapykuaápe hetaite jaipuru jaikuaasévo hetakue, techapyrã oñembohetavévo (X) térã oñembovóvo (÷) jasegi va'erã haperã jajuhu hag̃ua hetakue tee.
Ko ñe'ẽngue algoritmo ou karai herakuã papapykuaáre oñemoarandu va'ekue réragui, Al-Juarismi, Kalifáto Mbohapyha peguáva. Hembiapokuépe oikuaaukaraẽ álgebra mba'e opaichagua ha papapy mbojojaha. Upévare oje'e hese ha'ehague álgebra moheñoiha, ko álgebra katu ha'e papapykuaa vorekue, oipuru umi "oñemoambuéva" ohechauka hag̃ua papapy ne'ĩra ojeikuaa térã papapy ikatu oñemoambue.
Mandu'apy
[jehaijey | emoambue kuatia reñoiha]- ↑ Real Academia Española. Diccionario de la lengua española "Conjunto ordenado y finito de operaciones que permite hallar la solución de un problema."