Cleopatra VII
| Cleopatra VII | |
|---|---|
 | |
| Genys |
c. 13 Genver 69 BC  Alexandria |
| Mernans |
12 Est 30 BC a gwenon Alexandria |
| Kenedhlogeth |
Ptolemaic Kingdom |
| Galwesigeth |
sovran, myghtern |
| Soodh |
Faro |
| Tas |
Ptolemy XII Auletes |
| Mamm |
Unknown, Cleopatra V po VI a Ejyp |
| Pries |
Ptolemy XIII Theos Philopator, Ptolemy XIV a Ejyp, Mark Antony |
| Kespar |
Gnaeus Pompeius Magnus, Julius Caesar |
| Fleghes |
Caesarion, Cleopatra Selene II, Alexander Helios, Ptolemy Philadelphus |
| Linyeth |
Ternieth Ptolemek |
Cleopatra, Myghternes Ejyp, o onan a'n moyha aswonnys benenes yn istori. Hy hanow leun o Cleopatra VII Thea Philopator (69 KOK – 12ves Est 30 KOK). Hi o an diwettha rewlyer a'n Dernieth Ptolemaek a Faros a veu gorrys yn le yn Ejyp wosa mernans Alexander Meur. Wosa hy mernans, Ejyp a dheuth ha bos ranndir romanek Aegyptus.
Yma lies hwedhel a-dro dhe rychedh Cleopatra. Y leverir y hwrug hi badhya yn leth rag medhelhe hy kneus. Y leverir ynwedh y hwrug hi happwari gans Antony y halsa hi gul boos an moyha kostus yn bys. Rag gwaynya, hi a gemeras skinen berl, hy theudhi yn aysel ha hy eva.
Genys veu hi yn Sita Alsander, pennsita Ejyp. Pan o hi 18 bloodh, hy thas hag yw myghtern a verwis. Hi ha hy broder, Ptolemy XIII, a dheuth ha bos rewlysi Ejyp; hi o myghternes hag ev o myghtern. Hy broder o saw deg bloodh, ytho hi o an rewlyer gwir.
Cleopatra a wrug eskerens yn mysk an lysoryon, ledys gans an spadhesik Pothinus, hag i a removas Cleopatra a'y rewl ha gul dhe Ptolemy bos an rewlyer unnik, yn a-dro dhe 50 KOK.
Caesar ha Pompey
[golegi | pennfenten]Y'n eur na, yth esa dew hembrenkyas romanek ow kesstrivya dhe dhos ha bos ledyer an Repoblek Romanek: Julius Caesar ha Pompey. Julius Caesar a fethas Pompey orth Batel Pharsalus yn Pow Grek, yn 48 KOK. Pompey a dhienkis dhe Ejyp hag a veu moldrys war worhemynadow Ptolemy. Ptolemy a dybis y fydh Caesar pes da, mes yn gwiryonedh Caesar a wrug gava lies senedhor a vatalyas er y bynn rag kennertha kres yn Rom. Moldrans Pompey a dhistruis towlow Caesar. Pompey a veu dibennys a-dherag y deylu, ytho ny wrussa teylu ha skodhyoron Pompey ankevi hemma nevra.
Y teuth Caesar dhe Sita Alsander. Ejyp o kowell bara a alsa bosa Rom. Servysi Cleopatra a rolyas leurlen gans Cleopatra ynni ha kemeres an leurlen dhe'n palys le mayth esa Caesar godriga ynno. An servysi a dhug an leurlen dhe Caesar ha'y dirolya. Caesar a veu gweskys gans kerensa Cleopatra. Hi o 21 bloodh hag ev 52.
Caesar a erviris dhe wul Cleopatra myghternes arta, mes nyns o Ptolemy pes da gans henna. Yth esa meur a omladh, mes Caesar a waynyas. Hag ev ow tiberth, Ptolemy a godhas yn Dowr Nil ha beudhi. Broder yowynk aral a dheuth ha bos myghtern, mes arta Cleopatra o an rewlyer gwir Ejyp. Cleopatra a dhinythis mab gans Julius Caesar, henwys Caesarion. Mes, hware wosa henna, Caesar a veu moldrys yn Senedh yn Rom, an 15ves mis Meurth 44KOK. Cleopatra a dhienkis tre dhe Ejyp.
Mark Antony hag Octavian
[golegi | pennfenten]Mark Antony, hembrenkyas lu Caesar, hag Octavian, er laghel Caesar, a fethas an bagas (ledys gans Brutus ha Cassius) a wrug kesplottya erbynn Caesar. Le Caesar a veu kemerys wosa henna gans tri hes-Konsul, an Drigourieth Nessa: Octavian, Mark Antony ha Lepidus. Ny veu Lepidus mar bosek; tenkys an Emperoureth o ervirys dre gesstrif ynter Antony hag Octavian. Mark Antony a dheuth dhe weles Cleopatra ha a veu gweskys gans kerensa anedhi (kynth esa gwreg dhe Antony seulabrys). Cleopatra a dhinythis tri flogh ganso, dew anedha gevellyon.
An kesstrif ynter Octavian hag Antony a dheuth ha bos moy sad hag yth esa kas yn skon. Cleopatra a usyas hy arghans dhe weres Antony, mes y hwrug Octavian gwaynya an vresel. Ev a dheuth ha bos rewlyer Emperoureth Romanek yn-dann hanow Caesar Augustus. Ev a gemeras Ejyp a Cleopatra hag, an 12ves mis Est 30KOK, hi a wrug omladha der asa asp gwenonek hy bratha.
Yma'n erthygel ma owth usya an Furv Skrifys Savonek a-barth Kernowek kres.