Urang Lahat
Urang Lahat disabuik juo sabagai Jeme Lahat marupokan salah satu suku banso di Indonesia nan mauni babarapo kecamatan di Kabupaten Lahat jo babarapo kawasan lainnyo di Provinsi Sumatra Selatan. Komunitas masyarakaik urang Lahat sabagian gadang tingga di daerah-daerah pagunuangan atau area pabukikan nan subua. Di bagian baraik jo salatan tadapek guguihan Pagunuangan Bukik Barisan dengan puncaknyo nan tatinggi Gunuang Dempo (3.159 meter di ateh pamukoan lauik).[1]
Karano tingga di kawasan nan subua, sistem mato pancaharian hiduik Masyarakaik urang Lahat adolah batani. Banyak di antaro inyo mangusahokan tanaman pakabunan jenis tanaman kareh, saperti tanaman karet, kopi ataupun cengkeh. Inyo juo mananam padi, sayua-sayuaan jo palo. Ado juo nan bataranak lauak sabagai mato pancaharian hiduiknyo. Bagi komunitas urang Lahat nan tingga di kawasan pakotaan biasonyo inyo badagang sabagai mato pancaharian hiduiknyo.
Kapicayoan
[suntiang | suntiang sumber]Urang-urang Lahat alah lamo baragamo Islam. Maskipun damikian inyo masih mampicayoi jo manjalankan kapicayoan nenek moyangnyo. Dalam babagai upacaro adaik, inyo masih mancampua ritual-ritual dalam ajaran Islam dengan kapicayoan tahadok makhluk-makhluk gaib. Misalnyo manyajikan sasajen atau mangucokkan mantra-mantra. Salah satu nan dimaksuik adolah upacara adaik Sadakah Rame, atau tradisi adaik tantang pangalolaan sawah. Dengan malaksanokan tradisi tasabuik Urang Lahat baharok hasil nan inyo tanam akan mamuehkan sarato dilinduangi oleh Nan Maho Kuaso.[1]
Bahasa
[suntiang | suntiang sumber]Bahaso Lahat tamasuak rumpun bahaso Malayu dengan dialek inyo surang. Di antaro kalompok-kalompok khusus nan disabuik Lekipali tasabuik bakambang dialek-dialek nyo surang pulo nan babedo satu samo lain. Dari pabedoan dialek tasabuik inyo saliang mangatahui asal lawan ngeceknyo.
Sistem Kakarabaikan
[suntiang | suntiang sumber]Urang Lahat manganuik sistem kakarabaikan patrilineal, atau garih katurunan dari laki-laki. Mako dari itu pawarihan gala diturunkan malalui garih laki-laki (ayah). Gala nan diwarihkan iko salah satunyo balaku juo untuak jabaikan Jurai Tue.[2] Jurai Tue mampunyoi posisi nan sangaik pantiang dalam adaik Urang Lahat. Inyo iko adolah pambina moral bagi para anggota suku. Inyo haruih salalu maagiah contoah, mampu manjadi panutan dimano pun inyo barado.[3] Syaraik mutlak nan manjabaik posisi tasabuik adolah indak buliah saurang padusi. Alasannyo, laki-laki dianggok mampunyoi sipek kapamimpinan, mampunyoi kasigapan untuak manjalankan tugaih sabagai Jurai Tue, jo indak mampunyoi batehan-bataehan talalu banyak jikok dibandiangkan jo padusi. Syaraik utamo nan haruih juo tapanuahan adolah inyo haruih anak laki-laki patamo dari katurunan Jurai Tue sabalumnyo. Jabatan iko marupokan jabatan turun-tamurun, indak malalui pamiliahan. Sadangkan alasan mangapo haruih anak laki-laki tatuo adolah karano bagi urang Suku Lahat laki-laki tatuo dianggok alah mampu manjadi pambina moral tadi.
Sistem Pamarintahan Adaik
[suntiang | suntiang sumber]
Saperti halnyo masyarakaik modern, Masyarakaik Adaik urang Lahat mampunyoi juo sistem pamarintahan nan manjalankan tradisi suku tasabuik. Dusun-dusun urang Lahat dipimpin oleh Rie sabagai kapala pamarintahan satampek. Rie juo sakaliguih manjadi kapalo adaik. Dalam manjalankan tugaihnyo sabagai kapalo adaik, Rie dibantu oleh tuo-tuo, atau nan dianggok sasapuah (urang nan dituokan) di dusun tasabuik. Lalu ado Panghulu atau disabuik juo dengan Khatib. kaduonyo mampunyoi tugaih mamimpin hal-hal nan takaik dengan ritual-ritual kaagamoan atau adaik. Ado juo nan batugaih khusus mangatur soal pasawahan, mulai dari mananam, panggunoan aia hinggo katiko maso panen tibo. Jabatan iko disabuik sabagai Katua Ataran.[1]
Rujuakan
[suntiang | suntiang sumber]
- ↑ a b c Melalatoa, DR. M. Junus (1995). Ensiklopedi Suku Bangsa di Indonesia Jilid L – Z. Jakarta: Departemen Pendidikan dan Kebudayaan.
- ↑ Puspita, Melly (19 Maret 2016). "Kenali Lebih Dekat 4 Suku yang Ada di Lahat". Okezone.com. Diakses tanggal 18 Maret 2019.
- ↑ Murniatmo, Gatut; H. Nugroho, Hermawan; Dradjad, Sjamsu (2000). Khazanah Budaya Lokal: Sebuah Pengantar Untuk Memahami Kebudayaan Daerah di Nusantara. Yogyakarta: Adicita. ISBN 979-9246-29-6.