Arrows

Boutsen in 1984.

Arrows is 'n voormalige Britse Formule 1-span wat tussen 1978 en 2002 aan die F1-kampioenskap deelgeneem het. Van 1991 tot 1996 het die span onder die naam Footwork meegeding.

Aktiewe jare

Die span is in November 1977 gestig deur die Italiaanse sakeman Franco Ambrosio, die voormalige renjaers Alan Rees en Jackie Oliver, Dave Wass en Tony Southgate. Die spannaam is gebaseer op die eerste letters van hul vanne. Die span was in Milton Keynes gevestig. Die eerste motor was 'n kopie van mede-Formule 1-span Shadow. Aanvanklik sou medestigter Ambrosio se maatskappy die motors se borg wees, maar nadat hy vir bedrog gearresteer is, het die span Warsteiner as hoofborg gelok.

Arrows het sy eerste seisoen drie maande ná hul stigting met die jaers Riccardo Patrese en Rolf Stommelen begin. Gunnar Nilsson was oorspronklik veronderstel om vir die span te ry, maar omdat hy met testikulêre kanker gediagnoseer is, het Stommelen oorgeneem. Nilsson is 'n paar maande later oorlede. Patrese, wat die eerste vier jaar saam met die span gery het, het die eerste suksesse behaal. Hy het tweede gekom by die Sweedse Grand Prix gedurende die eerste seisoen en behaal nog twee tweede plekke en 'n derde plek in die daaropvolgende jare..

Die Belgiese jaer Thierry Boutsen het sy Formule 1-loopbaan in 1983 by die span begin en vier jaar lank vir die span gery. Hy het ook die tweede plek vir die span behaal. Danksy die BMW-turbo-enjins wat die span vanaf 1984 gebruik het, het die span in 1984 negende in die kampioenskap en in 1985 agtste geëindig. By die San Marino Grand Prix in 1985 was hy in die derde plek en het uit brandstof geraak net kort van die eindpunt. Hy kon sy motor oor die wenstreep druk om sy derde plek te behou, maar ná die renwenner Alain Prost gediskwalifiseer is omdat sy motor twee kilogram onder die wettige massa geweeg het, was Boutsen tweede. Die 1986-seisoen het stadig begin nadat Dave Wass na die mededinger Benetton vertrek het en die motor laat afgelewer is deur die buitemaatskappy wat hul eerste koolstofmonokok sou maak. Om hierdie probleme in die toekoms te vermy, het die span Ross Brawn gehuur om tegniese sake te hanteer en die volgende motor te ontwikkel.

Die Amerikaner Eddie Cheever, wat tussen 1987 en 1989 vir die span gery het, het twee keer 'n derde plek behaal en Gianni Morbidelli was derde in Australië in 1995.

Footwork as borg

In die tydperk van 1991 tot 1996 is die span Footwork genoem. Die Japannese sakeman Wataru Ohashi het in Arrows belê en die span Footwork herdoop totdat Tom Walkinshaw die span in Maart 1996 gekoop het. Jos Verstappen het die laaste punt vir Footwork in Argentinië met 'n sesde plek geneem.

Die naaste wat 'n bestuurder aan 'n oorwinning vir die span kon kom, was Damon Hill. Nadat hy van die derde plek op die rooster by die 1997 Hongaarse Grand Prix weggespring het, was hy gemaklik voor tot naby die einde van die wedren. Tydens die laaste rondte het hy tegniese probleme ondervind, wat veroorsaak het dat die motor aansienlik stadiger gejaag het. Hy kon nie verhoed dat Jacques Villeneuve hom op die laaste rondte verbysteek nie en het dus in die tweede plek geëindig. Dit was ook die laaste podiumplek vir die span.

Die Nederlander Jos Verstappen het in 2000 en 2001 vir die span gejaag en drie keer in die punte geëindig.

Einde van Arrows

Ná die Franse Grand Prix in 2002 kon hul nie meer vir die Cosworth-enjins betaal nie en Arrows het vir die res van die seisoen verdwyn. Weens 'n gebrek aan hulpbronne het die span gesukkel om te oorleef en ten spyte van eksterne beleggings en die aankoop van Prost Grand Prix-onderdele, het die FIA Arrows se lisensie vir die jaar 2003 gekanselleer, wat veroorsaak het dat die span uit Formule Een verdwyn het. Die motor, intellektuele eiendomsregte en fabriek is oorgeneem deur Minardi, wat die motor as konsep vir hul motor vir die volgende seisoen gebruik het.

Die span het in 25 jaar aan 382 Grands Prix deelgeneem en hou die onbenydenswaardige rekord van die meeste Grands Prix sonder 'n oorwinning. Arrows-jaers het vyf keer tweede en vier keer derde geëindig tydens 'n wedren.