Gereformeerde kerk Randburg

Ds. G.N.V. Botha toe hy in 1964 'n vierdejaarstudent aan die Teologiese Skool Potchefstroom was. Hy was aan Randburg verbonde van 1968 tot 2005.

Ds. Ferdinand Postma, leraar van 1979 tot 1990, in sy laaste jaar, 1971, aan die TSP.

Die Gereformeerde kerk Randburg is die grootste gemeente in die GKSA se Klassis Groter-Johannesburg

In dié Klassis is Randburg meer as twee keer groter as die naasgrootste gemeente, Linden; trouens, dit bevat 45 persent van al die lidmate in die Klassis se 15 gemeentes. In die hele Kerk was dit einde 2015 met ’n sieletal van 2 062 die naasgrootste gemeente; net Wapadrant met ’n sieletal van 2 218 was toe groter. Vanweë die gemeente se geskiedenis beslaan dit ’n reusegebied wat stadsgebiede insluit soos Randburg self, Braamfontein, Bryanston, Craighall Park, Fourways, Jukskeipark, Melville, Sandringham, Sandton (wes van die M2), Sunninghill en Witkoppen.

Die Gereformeerde kerk Randburg, in sy oorspronklike gedaante, het in 1960 van Linden afgestig met 320 belydende en 264 dooplidmate. Kort voor lank het die nuwe gemeente ’n ruim kerkgebou met ’n spitstoring laat bou op die hoek van Main- en Rockstraat, Bordeaux, Randburg, nadat hulle eers vir eredienste byeengekom het by Sentraalweg 119, Linden-uitbreiding. In Mei 1976 het die Gereformeerde kerk Randburg-Oos afgestig, maar die twee gemeentes sou deurentyd dieselfde kerkgebou gebruik en is die eredienste ná aan die einde van Randburg-Oos se bestaan byvoorbeeld soggens sowel as saans op dieselfde tye gehou.

Weens die verswakkende omstandighede rondom die kerkgebou (waarmee waarskynlik bedoel word dat 'n sakegebied aan die een kant ontstaan het) moes die kerkrade van die twee gemeentes dit eindelik verkoop. ’n Tyd lank is die eredienste toe in die saal van die Hoërskool Randburg gehou. Intussen het die twee gemeentes ’n nuwe kerkgebou in die noordelike deel van albei se gebied beplan. Die vereiste was dat dit ’n bruikbare gebou sonder luukshede sou wees, ’n ouditorium sou bevat met ’n verskuifbare preekstoel en dat dit net een ingang sou hê. Later is bepaal die mure moes hoër as die dak wees en die kerk en saal moes onder een dak wees.

Die argitek was Jan Pretorius en Francois Meiring het die terrein voorberei. Die argitek het opdrag gegee dat geen boom van die perseel verwyder mag word nie. Die gebou was amper klaar toe besluit is om ’n verskuifbare muur tussen die ouditorium en die portaal aan te bring. Hierdie kompleks in Derdeweg, Northwold, Randburg, is op 16 Augustus 1997 in gebruik geneem.

In 2002 het die Johannesburg-Melville een geword met Randburg-Oos. Op 14 April 2003 jaar het Randburg en Randburg-Oos saamgesmelt as die Gereformeerde kerk Randburg.

Predikante

1. Venter, dr. Mechiêl, 1961 – 1978
2. Botha, Gabriël Nicolaas Venter, 1968 – 1991 (sendeling); 1991 – 2005 (gemeenteleraar; aanvaar sy emeritaat)
3. Postma, Ferdinand, 1979 – 1990
4. Breed, dr. Gert, 2001 – 2010
5. Hattingh, Christiaan, 2003 – 2007 (aanvaar sy emeritaat; oorgekom vanaf Randburg-Oos)
6. Saayman, Willem Jacobus Kruger, 2003 – 2009 (aanvaar sy emeritaat; oorgekom vanaf Johannesburg-Melville)
7. De Kock, Henning Kruger, 2005 – hede (met opdrag bediening in Londen)
8. Semenya, dr. Kwena David, 2007 – hede
9. Dreyer, Thomas Frederick, 2007 – 2026, waarna vanaf 26 November 2023 Cross Culture Church, afgestig van Randburg
10. Van Rooy, Henri Charles, 2008 – hede
11. Van Schaik, Johannes, 2011 – hede
12. De Villiers, Stephanu, 17 April 2023 – hede

Bronne

• (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.
• (af) Schalekamp, ds. M.E. (voorsitter: redaksiekommissie). 2001. Die Almanak van die Gereformeerde Kerke in Suid-Afrika vir die jaar 2002. Potchefstroom: Administratiewe Buro.
• (af) Van der Walt, dr. S.J. (voorsitter: deputate almanak). 1997. Die Almanak van die Gereformeerde Kerke in Suid-Afrika vir die jaar 1998. Potchefstroom: Administratiewe Buro.
• (af) Venter, ds. A.A. (hoofred.) 1960. Almanak van die Gereformeerde Kerk in Suid-Afrika vir die jaar 1961. Potchefstroom: Administratiewe Buro.
• (af) Vogel, Willem (red.). 2014. Die Almanak van die Gereformeerde Kerke in Suid-Afrika vir die jaar 2015. Potchefstroom: Administratiewe Buro.
• (af) Vogel, Willem (red.). 2015. Die Almanak van die Gereformeerde Kerke in Suid-Afrika vir die jaar 2016. Potchefstroom: Administratiewe Buro.

Eksterne skakels

• (en) Die ou Gereformeerde kerk Randburg, soos te sien op Google Maps. URL besoek op 27 Januarie 2016.