Hamer en sekel
Die hamer en sekel (☭) is deel van die kommunistiese simboliek en die gebruik daarvan dui op 'n verbintenis met kommunisme, 'n Kommunistiese Party of 'n Kommunistiese staat. Dit bevat 'n hamer en sekel bo-oor mekaar. Die gereedskap is simbole van die industriële werkers (proletariaat) en die landelike bevolking; deur dit saam te voeg word eenheid tussen industriële en landbouwerkers gesimboliseer. Die embleem is gedurende die Bolsjewistiese Rewolusie ontwerp.
Dit het bekend geword na die insluiting daarvan in die rooi vlag van die Sowjetunie, saam met die Rooi Ster. Dit is ook gebruik in ander vlae en embleme.
Sowjet- en Russiese gebruik
[wysig | wysig bron]Die hamer en sekel was oorspronklik 'n hamer wat met 'n ploeg gekruis is, met dieselfde betekenis (eenheid van landelike burgers en industriële werkers) as die beter bekende hamer en sekel. Alhoewel die hamer en sekel sedert 1917/'18 in gebruik is, was dit nie die amptelike simbool tot in 1922 nie. Voor die hamer en sekel is die hamer en ploeg gebruik op die uniforms, medaljes, pette, ens. van die Rooi Leër en die Rooi Garde.
Die simbool het later gepryk op die vlag van die Sowjetunie wat in 1923 aanvaar is en in die Sowjetgrondwet van 1924 gefinaliseer is. Dit was ook op die vlae van die republieke van die Sowjetunie na 1924. Die vlae van die Sowjetrepublieke het gewoonlik 'n eenvoudige rooi baan bevat met die naam van die republiek in goue letters daarop, soos vervat in Artikel 90 van die Sowjetgrondwet van 1918.
- Die wapenskild van die Sowjetunie en die Sowjetrepublieke het ook die hamer en sekel bevat, en dit was ook op die Rooi Ster-ordeteken wat op petpe en verskeie ander plekke van die uniform van die Rooi Leër verskyn het.
- Serp i Mólot (transliterasie van Russies: Серп и молот, "sekel en hamer") is die naam van die Moskouse Metallurgiese Aanleg.
- Serp i Molot is ook die naam van 'n halte op die elektriese spoorweglyn van die Koersk-treinstasie in Moskou na Gorki wat in Wenedikt Erofejef se roman Van Moskou na Petoesjki verskyn.
Sommige antropoloë reken dat die simbool, soos ander wat in die Sowjetunie gebruik is, eintlik 'n Russies-Ortodokse simbool is wat deur die Kommunistiese Party gebruik is om aan die religieuse behoeftes te voldoen nadat Kommunisme as die nuwe "staatsgeloof" ingestel is. Die simbool kan gesien word as 'n omvorming van die Patriargale Kruis (Russies-Ortodokse tweestawige kruis).[1]
Huidige gebruik
[wysig | wysig bron]- Twee deelgebiede van Rusland na die Sowjetunie-tydperk gebruik die hamer en sekel in hul simbole: die Wladimir-oblast het dit op sy vlag en die Brjansk-oblast het dit op sy wapenskild, wat ook die sentrale element van sy vlag is.
- Die voormalige Sowjet- (nou Russiese) nasionale lugdiens, Aeroflot, gebruik steeds die hamer en sekel in sy simbool.
- Die separatistiese regering van Transnistrië gebruik, met klein veranderinge, die vlag en embleem van die voormalige Moldawiese SSR, wat die hamer en sekel insluit. Die vlag kan ook gebruik word sonder die hamer en sekel, byvoorbeeld op nommerplate wat deur Transnistrië uitgereik is.
- Die Kommunistiese Party van China gebruik dit as simbool. Dit word ook deur die Kommunistiese Partye van die meeste lande gebruik.
- Die Maoïstiese terreurgroep Shining Path in Peru gebruik dit as deel van sy simbool.
- Die hamer en sekel word ook prominent gebruik in die wapenskild van Oostenryk, maar hulle lê nie oor mekaar nie en is ook nie bedoel om kommunisme te verteenwoordig nie.
Variasies van die simbool
[wysig | wysig bron]
Baie simbole met 'n struktuur en boodskap soortgelyk aan dié van die hamer en sekel is al ontwerp. Die vlag van Angola wys byvoorbeeld 'n segment van 'n tandrat wat gekruis word deur 'n kapmes, met 'n sosialistiese ster bo-op. In die logo van die Kommunistiese Party van die Verenigde State word 'n sirkel gevorm deur 'n halwe tandrat en 'n sekel. 'n Hamer is direk oor die handvatsel van die sekel geplaas sodat die kop van die hamer in die middel van die sirkel is. Die logo van die Kommunistiese Party van Turkye bestaan uit 'n halwe tandrat gekruis deur 'n hamer met 'n ster bo-aan.
Gereedskap wat in ander ontwerpe ingesluit is, is die inkkwas, sekel en hamer van die Koreaanse Werkersparty (Voorbeeld); die graaf, brandende fakkel en skoffel van die Britse Arbeidersparty wat voor 1984 gebruik is (Voorbeeld) (dit was 'n sosialistiese party, nie kommunisties nie); die skroefhamer (bobbejaansleutel) en Indiaanse strydbyl (tomahawk) van die Earth First!-beweging; die bylpik en geweer wat gebruik is in kommunistiese Albanië; die hamer en passers in die embleem van die Oos-Duitse vlag. Die Verre Oostelike Republiek het 'n anker gekruis deur 'n graaf of bylpik gebruik wat die eenheid van vissermanne en mynwerkers simboliseer. Die Vierde Internasionale, gestig deur Leon Trotsky, gebruik 'n hamer en sekel waarop die nommer '4' gesuperponeer is (Voorbeeld). Die Trotskyïstiese Liga vir die Vyfde Internasionale laat 'n hamer met die nommer '5' saamsmelt en gebruik die boog in die nommer om die sekel te vorm (Voorbeeld).
Die Kommunistiese Party van Brittanje gebruik die hamer-en-duif-simbool. Dit is in 1988 deur Mikhal Boncza ontwerp en is veronderstel om die party se verbintenis met die vredesbeweging uit te beeld. Dit word normaalweg saam met die hamer en sekel gebruik en verskyn ook op al die publikasies van die KPB. Sommige lede van die KPB verkies die een simbool bo die ander, maar die party se 1994-kongres het herbevestig dat die hamer en duif die amptelike embleem van die party is. Die Kommuniste Party van Israel gebruik ook 'n duif oor die hamer en sekel as sy simbool. Die vlag van die Guadeloupse Kommunistiese Party met die sekel só gedraai dat dit soos 'n hoofletter 'G' lyk om Guadeloupe voor te stel.[2]
Die arend op die wapenskild van Oostenryk hou 'n goue hamer in sy linkerklou en 'n goue sekel in sy regterklou. Die gereedskap verwys nie na kommunisme nie (die arend dra ook 'n goue kroon), maar verteenwoordig die industriële en landbouwerkers, verenig met die voormalige aristokrasie in een republikeinse demokrasie.
Die Nasionale Bolsjewiste-party, 'n verregse groepering wat in Rusland en ander voormalige republieke van die USSR bedrywig is, gebruik 'n vlag wat baie ooreenstem met die rooi, wit en swart vlag van die Duitse Nazi-party, behalwe dat 'n hamer en sekel die swastika vervang (Voorbeeld).
Die vlag van Mianmar gebruik 'n skepel rys wat op 'n tandrat gesuperponeer is (Voorbeeld).
Unicode
[wysig | wysig bron]In Unicode is die "hamer en sekel"-simbool U+262D. (☭)
Wetlike status
[wysig | wysig bron]In lande wat voorheen in die invloedsfeer van die Sowjetunie was, word die hamer en sekel en die Rooi Ster deur sommige inwoners beskou as besettingsimbole. In ooreenstemming het Hongarye,[3] Letland en Litaue[4] die simbole in openbare gebruik verbied. 'n Soortgelyke wet is oorweeg in Estland, maar is deur 'n parlementêre komitee afgekeur.
Galery
[wysig | wysig bron]-
-
Vlag van die USSR van 19 Augustue 1955 tot 15 Augustus 1980. -
-
Die hamer en sekel soos dit verskyn op die vlag van die Kommunistiese Party van China. -
Vlag van die Kommunistiese Party van Viëtnam. -
Vlag van die Libanese Kommunistiese Party. -
Vlag van die Kommunistiese Party van Kampuchea. -
Vlag van die Laotiaanse Revolusionêre Volksparty. -
Sjinese Rooi Weermag. -
Vlag van die Roemeense Kommuniste Party. -
Logo van die Kommunistiese Party (Swede). -
Logo van die Kommunistiese Party (VSA). -
Logo van die Meksikaanse Kommunistiese Party. -
Simbool van die Kommunistiese Party van Chili. -
Vlag van die Brjansk-oblast. -
Vlag van Angola sedert 1975. -
Die embleem van Oos-Duitsland. -
Vlag van die Ligtende Pad. -
Vlag van die Nasionaal-Bolsjewistiese Party (Rusland). -
Vlag van die Werkersparty van Korea in Noord-Korea. -
Die vlag van die Kommunistiese Party van Indië (Marxisties) en die Kommunistiese Party van Indië. -
Vlag van die Koerdistanse Werkersparty (1978–1995). -
Vlag van die Revolusionêre Volksbevrydingsparty-Front. -
Vlag van die Kommunistiese Party van Ierland. -
1976 Albanese banknoot met 'n bylpik en 'n Mosin-Nagant geweer. -
Embleem van die Vierde Internasionale. -
Vlag van die Kommuniste Party van Brittanje. -
Logo van Aeroflot. -
Die wapenskild van Panama het in een van die kwarte 'n bylpik en 'n graaf wat herinner aan die hamer en sekel. -
Die wapenskild van Oostenryk waar die hamer die nywerheid en die sekel die landbou voorstel. -
Die vlag van die Kommuniste Party van die Filippyne. -
Die kapmes en tandrat soos in die vlag van Angola. -
Embleem van die Italiaanse Kommunistiese Party. -
Embleem van die Kommunistiese Party van Brasilië, PCdoB. -
Embleem van die Ethiopiese Revolusionêre Volksparty, EPRP. -
Amptelike simbool van die Kommunistiese Party van Griekeland. -
Die vlag van Animal Farm waarin die hoef en horing ooreenstem met die hamer en sekel.
Verwysings
[wysig | wysig bron]- ↑ David Lempert, Daily Life in a Crumbling Empire: The Absorption of Russia into the World Economy, Columbia University Press/ Eastern European Monographs, 1996.
- ↑ Flags of the World
- ↑ Hungarian Criminal Code 269/B.§ (1993.)
- ↑ BBC NEWS | Europe | Lithuanian ban on Soviet symbols
Eksterne skakels
[wysig | wysig bron] |
Wikimedia Commons bevat media in verband met Hamer en sekel. |
- Vlag van Noord-Korea se Koreaanse Werkersparty (wat die hamer, pen en skoffel gebruik)
- Ou simbool van die Britse Arbeidersparty (graaf, fakkel en skoffel).
| Hierdie artikel is in sy geheel of gedeeltelik vanuit die Engelse Wikipedia vertaal. |
