Sewsunker "Papwa" Sewgolum
| Sewsunker "Papwa" Sewgolum | |
|---|---|
| Persoonlike inligting | |
| Gebore | 1930 |
| Sterf | 6 Julie 1978 |
| Hoogte | 1,63 m |
| Nasionaliteit |  Suid-Afrika |
| Woning | Natalprovinsie, Suid-Afrika |
| Eggennoot | Suminthra |
| Kinders | 5 |
| Loopbaan | |
| Status | Professionel |
| Professionele oorwinnings | 6 |
| Beste uitslae in groot kampioenskappe | |
| Meesterstoernooi | DNP |
| PGA-kampioenskap | DNP |
| V.S. Ope | DNP |
| Britse Ope | 13de: 1963 |
Sewsunker "Papwa" Sewgolum OIS (1930–1978) was 'n legendariese Suid-Afrikaanse gholfspeler wat bekendheid verwerf het toe hy die eerste swart gholfspeler is wat 'n provinsiale ope toernooi in Suid-Afrika gewen het. Hy het 'n simbool van sportboikotbewegings geword toe foto's waar hy die trofee buite in die reën moes ontvang, as gevolg van Apartheidwetgewing, van hom regoor die wêreld gepubliseer is. Sewgolum is as gevolg van sy ras nie toegelaat om die klubhuis binne te gaan nie.
Vroeë lewe
[wysig | wysig bron]Sewgolum was die seun van arm plaaswerkers. Hy is met Suminthra getroud en hulle het 'n seun, Rajen, gehad.
Loopbaan
[wysig | wysig bron]Sewgolum, is deur die Duitssprekende Graham Wulff van Howick "ontdek". Die welgestelde Wulff se rykdom was toe te skryf aan die uitvinding van 'n velsorgroom wat hy Oil of Olay gedoop het.[1] Toe Wulf 'n swak hou speel, nadat Sewgolum hom as gholfjoggie geadviseer het oor watter gholfstok om te gebruik, daag Wulf hom uit om die hou beter te speel. Sewgolum se naderhou land binne 'n halwe meter van die putjie en Wulfe is so beïndruk dat hy hom in 1959 oorsee stuur om aan die Britse Ope te gaan deelneem.
Sewgolum, die voormalige gholfjoggie met 'n verkeerdomgreep (linkerhand onder sy regterhand) veroorsaak in 1963 'n opskudding toe hy wen teen 103 wit gholfspelers, wat Harold Henning ingesluit het, in die provinsiale Natal-Opetoernooi by die Durban Buiteklub. In 1965 verslaan hy Gary Player om die titel vir 'n tweede keer te wen. Hy het ook die Nederlandse Ope in 1959, 1960 en 1964 gewen. Hy was ook die wenner van 'n aantal nie-blanke gholfkampioenskappe in Suid-Afrika. In terme van hul beleid om nie verslag te doen oor veelrassige sport nie, het die SAUK geweier om kommentaar uit te saai oor toernooie waaraan Sewgolum deelgeneem het.
In 1966 verban die Suid-Afrikaanse regering Sewgolum uit deelname aan alle plaaslike toernooie. In 1966 weier die Ministerie van Beplanning om 'n permit aan Sewgolum uit te reik om aan die Westelike Provinsie Ope deel te neem, gegrond daarop dat permitte in die toekoms net aan "nie-Blankes" uitgereik sal word vir toernooie waaraan hulle reeds voorheen deelgeneem het.[2] Sy paspoort word ook teruggetrek wat hom verhoed om oorsee gholf te speel. Dit bring mee dat hy slegs in amateurtoernooie vir swart spelers kan deelneem wat 'n jammerlike einde aan sy professionele loopbaan bring.[3][4]
Eerbewyse en toekennings
[wysig | wysig bron]- Sewgolum het in 2003 postuum die Orde van Ikhamanga-prestasietoekenning van President Thabo Mbeki ontvang.
- Durban het 'n gholfbaan na hom vernoem. Die Papwa Sewgolum Municipal Golf Course is 'n 18-putjiebaan in die Reservoir Hills woonbuurt.
Verwysings
[wysig | wysig bron]- ↑ Sunday Tribune, Life of a golfer denied the fairways of life, besoek op 25 November 2006
- ↑ UNESCO, Apartheid – its effects on education, science, culture and information, besoek op 26 November 2006
- ↑ SouthAfrica.info, Golf: 'Papwa' Sewgolum, besoek op 25 November 2006
- ↑ Tripod, Papwa Sewsunker...a very sad tale... Geargiveer 6 Maart 2016 op Wayback Machine, besoek op 25 November 2006
Normdata  |
|
|---|