Antoni Pichot

Dr Antoni Pichot, au Antoni Pitxot (ənˈtɔni piˈtʃɔt) (* 5. Januar 1934 z Figueres, Katalonie) isch e katalanische Mooler. Er isch e Fründ und Mitarbäiter vom Salvador Dalí gsi.

Lääbe und Wärk

Im Pichot siner Familie het s e Hufe Künstler, drunder si Unggle, dr Mooler Ramon Pichot. In de 1960er isch er e Fründ vom franzöösische Mooler Maurice Boitel worde. 1966 het sich dr Pichot z Cadaqués, wo si Familie sit em 19. Joorhundert e Summerhuus ghaa het, niidergloo. Er het aagfange mit em Surrealismus experimentiere. Sini Wärk si allegorisch und müthologisch gsi, so het er d Mueter vo de nüün Muuse, d Mnemosyne gmoolt, wo d Personifizierig vo dr Erinnerig isch.

Dr Salvador Dalí het scho früe dr Pichot afo understütze und het en denn iiglaade am Teatre-Museu Dalí z Figueres mitzschaffe. Er het dört au Blatz überchoo für e permanänti Ustellig vo sine Wärk. Noch em Dood vom Dalí isch dr Pichot Diräkter vom Theatermuseum Dalí worde.

2004 het dr Antoni Pichot e Goldigi Medallie vom schbanische Köönig überchoo as Anerkennig für sis Wärk.

Dr Bruno Oro Pichot, e katalanische Schauspiiler, Sänger und Komödiant, isch im Antoni Pichot si Groosschind.

Weblingg

• Pitxot uf em Dali Museum siner änglische Website