هيليوم
هيليوم
| ||
| ||
| لجدوال الدوري | ||
| الرمز | He | |
| النمرة الدرية | 2 | |
| قبل منّو | عنصر كيماوي (هيدروجين) | |
| بعد منّو | عنصر كيماوي (ليثيوم) | |
| ليحداتيات فلجدوال | عناصر الدورة الأولى و غاز نبيل | |
| ليكتيشاف | ||
| اللي كتاشفو | پيير جانسن | |
| إيمتا تكتاشف | 18 غشت 1868 | |
| تسمّى على | هيليوس | |
| لبيانات لمعبورة | ||
| لكتلة | 4.002602 Da | |
| شكل ليليكترونات | 1s² | |
| لكتافة | 0.1785 kg/m³ | |
| لحرارة فاش كايدوب | −272.05 °C | |
| لحرارة فاش كايغلي | −268.9 °C | |
| لخاصيات | ماعندوش لون، ماعندوش مداق و ماعندوش ريحة | |
| لكهروسيلبية | 4.5 | |
لهيليوم (ب نݣليزية Helium من ليونانية ἥλιος[1] هيليوس بمعنى "شمش") هوّا عنصر كيماوي أساسي، رّمز ديالو هوّا He ؤ نّمرة دّرية ديالو 2[2] ف طّابلو دوري، هاد لعنصر مستّف ف سّطر (دّورة) 1 ؤ لعمود (لمجموعة) 18. هاد لعنصر داخل ف لݣروپ ديال لغازات النبيلة. ف ضروف لمعيارية د ضغط ؤ لحرارة، هاد لعنصر كايكون ف لحالة د ݣاز.
ف 1868، پيير جانسن سافر ل لْهند باش يحسب سپيكتر د شّمش ف لوقت ديال لكوسوف لْكامل، ؤ لاحض واحد لخط صفر ف سپيكتر لّي كيدل علا عنصر جديد. جوزيف نورمان لوكاير سجل نفس لْخط ملي راقب شمش من تحت ضبابة د لندن، ؤ فتارض أن لعنصر جّديد هوّا فلز لّي سماه هيليوم.
ف 1882، لعاليم طّالياني لويجي پالمييري شاف نفس لبلان ف سپيكتر ديال لݣازات لّي خارجة من بركان ڤيسوڤيوس، ؤ نفس لحاجة طرات ملي درس لعاليم لميريكاني ويليام هيلبراند لݣاز لّي كيخرج من تاني أوكسيد ليورانيوم فاش كيدوب ف لاسّيد.
مي پير تيودور كليڤ ؤ نيلز أبراهام لانݣليت هوما أول وحدين عاودو هاد تّجربة ؤ أكدو لكتيشاف ديال لهيليوم ف 1895 ف أوپصالا ف سويد، ؤ حسبو لكتلة درية ديالو.[1]
لهيليوم هوّا تاني أكتر عنصر كيماوي متناشر ف لكون ب نسبة ديال 25%، ؤ كينتج من تفاعل د لنديماج نّووي ديال لهيدروجين ف نّْجوم،[3] ؤ كيتلقا ف نّْجوم كاملين.
ف لأرض لهيليوم كيتنتج ب شكل طبيعي من تّهراس د جسيمات ألفا ديال لعناصر رّاديواكتيڤة بحال لأورانيوم ؤ طّوريوم. واحد طّرف من هاد لهيليوم كيدوز ل لجو، لّي نّسبة د لهيليوم فيه 5 علا مليون. هاد لعملية كتم ف إطار ديال توازن ديناميكي، حيت لفايض ديال لهيليوم كيفلت ل لفضا لخرجاني. لستيخراج د لهيليوم من لجو عملية ماشي قتيصادية. لإنتاج ديال لهيليوم كيتم ب لستيخراج ديالو من لݣاز طّبيعي لّي كيحتاوي علا 7% د لهيليوم.
أكبر تلاتة د لمنتيجين ديال لهيليوم هوما لميريكان، دزاير ؤ روسيا، ؤ أكبر حتياط كاين عند لميريكان، قطر ؤ دزاير.[1]
لهيليوم كيكون علا شكل ݣاز ماعندوش لون ؤلا ريحة ف درجة لحرارة لعادية، ؤ ماكيتفاعل معا حتا شي مادة معروفة.[1] ف ضّروف لعادية ديال ضّغط، لهيليوم ماعمرو كيولي قاسح كيفما كانت لحرارة، مي كيولي سايل ف 268.93- سيلسيوس. فاش كيدوز تيار د تريسينتي ف لهيليوم، كيضوّي ب لون خوخي باهت.[4]
لْخاصّيات لْفيزيكية ديال لهيليوم-4 هيّا كتّالي:
- لكتلة دّرية: 4,003 ݣرام/مول.
- لحالات د لأكسدة: -
- لكهروسلبية: 4.5 ف سلوم د پاولينݣ
- لكتافة: 0.179 كلݣ/م³
- شّعاع دّري: 0.37 أنݣستروم.
لهيليوم كيتستعمل كا وْسْط تبريدي، متلا ف زّدّاح لْكبير د لْهادرونات، ف دوزان بحال لمغناطيسات سوپردوّازة ديال سكانير د تّصوير ب صّونيط لمغناطيسي ؤ سپيكتروميتر د صّونيط نّووي لمغناطيسي. ؤ تستعمل أيضا ف تّبريد ديال دّوزان ديال صاطليتات ؤ ف تّبريد ديال لأوكسيجين ؤ لهيدروجين سّايلين لّي تستعملو كا فيول ف صّاروخ د أپولو.[1]
حيت لهيليوم عندو كتافة ضعيفة، كيتستعمل ف تّعمار ديال لبالونات د دّيكور، ؤلا لبالونات د طقس ؤ لمنطادات. لهيدروجين حتا هوّا كان عندو هاد لستيعمال مي بسباب تّفاعلية لكبيرة ديالو، لي تقدر تخلي لعافية تشعل فيه، حبسات هاد لقضية.
ؤ حيت لهيليوم عندو تفاعلية ضعيفة، كيتستعمل كمناخ حامي ؤ ساقل فين كيتصاوبو لْخيوط لْأوپتيكية ؤ سّوپردوّازات. لهيليوم كيتستعمل أيضا ف تّعمار ديال لإيرباݣ د طّونوبيلات. تخليطة ديال 80% هيليوم ؤ 20% أوكسيجين كتستعمل كا جو صطيناعي ف لغطيس لغارق، ؤ حالات خرين فين بنادم كيخدم ف ضروف عالية ديال ضّغط.
لّيزر د لهيليوم ؤ نّيون كيتستعمل ف سّكانير د لباركود ف سوپرمارشيات. ؤ كاين دابا ستيعمال جديد ديال لهيليوم ف لميكروسكوپ د لهيليوم لإيوني لّي كيعطي صورة حسن من لميكروسكوپ ليليكتروني.[1]
لهيليوم عندو جوج إيزوطوپات مستاقرين هوما هيليوم-3 ؤ هيليوم-4. هاد ليزوطوپات بجوج ضهرو من لبدية ديال لكون، تقريبا 100 تانية مورا لبيݣ بانݣ، علا طريق هاد تّفاعلات:
D + D ➔ 3He + n
D + D ➔ 4He + γ
T + D ➔ 4He + n
3He + n ➔ 4He + γ
3He + D ➔ 4He + p
D = دوتيريوم، n = نيوطرون، γ = شعا د ݣاما، T = تريسيوم، p = پروطون.[5]
راصيو ديال لهيليوم-3 ب نّسبة ل لهيليوم-4 هوّا تقريبا 8x10−5 حيت لهيليوم-4 مستاقر كتر بزاف من لهيليوم-3. هاد رّاصيو تطور معا تّفاعلات لّي كتوقع ف لعمق ديال نّجوم بحال شمش، حيت بجوج كينتجو ف تّفاعل لْمسلسل پروطون-پروطون ب شّكل تّالي:
p + p ➔ D + β+ + ν
D + p ➔ 3He + γ
3He + 3He ➔ 4He + 2 p
+β = پوزيطرون، ν = نوترينو.[5]
| سمية د لإيزوطوپ | لكتلة دّرية (ݣرام/مول) | نّسبة ف طّبيعة (%) | نص د لحياة |
|---|---|---|---|
| هيليوم-2 | 2.015894 | 0 | قل من 10 نانوتانية |
| هيليوم-3 | 3.01602 | 0.000134 | ∞ |
| هيليوم-4 | 4.0026 | 99.999866 | ∞ |
| هيليوم-5 | 5.012 | 0 | 700 يوكطوتانية |
| هيليوم-6 | 6.01888 | 0 | 806.92 ميليتانية |
| هيليوم-7 | 7.02799 | 0 | 2.51 زيپطوتانية |
| هيليوم-8 | 8.03393 | 0 | 119.1 ميليتانية |
| هيليوم-9 | 9.04395 | 0 | 2.5 زيپطوتانية |
| هيليوم-10 | 10.05282 | 0 | 3.1 زيپطوتانية |
- ^ a b c d e f "لجمعية لملكية د شّيمي Royal Society of Chemistry" (ب نݣليزية). مأرشيڤي من لأصل ف 2023-07-22. تطّالع عليه ب تاريخ 2020-12-04.CS1 maint: unrecognized language (link)
- ^ "لمعلومات لكاملة ديال لعناصر د لجدول الدوري". مأرشيڤي من لأصل ف 2023-04-19. تطّالع عليه ب تاريخ 2020-10-07.
- ^ "لهيدروجين ؤ لهيليوم" (ب نݣليزية). مأرشيڤي من لأصل ف 2023-08-19. تطّالع عليه ب تاريخ 2020-12-04.CS1 maint: unrecognized language (link)
- ^ "طّابلو دّوري، لهيليوم" (ب نݣليزية). مأرشيڤي من لأصل ف 2023-06-30. تطّالع عليه ب تاريخ 2020-12-04.CS1 maint: unrecognized language (link)
- ^ a b "ليزوطوپات ديال لهيليوم، موسوعة د جيوشيمي، سپرينݣر" (ب نݣليزية). مأرشيڤي من لأصل ف 2022-01-21. تطّالع عليه ب تاريخ 2020-12-13.CS1 maint: unrecognized language (link)
|
تقدر تزيد شوف بزاف د تّصاور و لمعلومات ديال Helium ف ويكيميديا كومنز. |