John Maynard Keynes
John Maynard Keynes, (5 de xunu de 1883, Cambridge – 21 d'abril de 1946, Firle (en) 
) Barón Keynes de Tilton foi un economista británicu, del que les so idees tuvieren gran impautu nel pensamientu y la política económica a lo llargo del sieglu XX. Ye recordáu especialmente pol so apueste pol intervencionismu gubernamental na economía per aciu d'aiciones fiscales y monetaries p'amenorgar los efeutos de los ciclos económicos. Ta reconocíu como'l padre de la macroeconomía moderna y les sos idees xeneraren la corriente nomada keynesianismu.
Vida y obra
[editar | editar la fonte]John Maynard Keynes foi'l fíu de John Neville Keynes, un profesor d'economia de la Universidá de Cambridge y de Florence Ada Brown, una escritora d'ésitu y reformista social.
Keynes llicencióse en matemátiques nel King's College de Cambridge, y llueu interesóse na economía. Foi conseyeru del gobiernu británicu pente la Primer Guerra Mundial, y la so primer aportación pública como economista ye la publicación, en 1919 (acabante la guerra) de Les consecuencies económiques de la paz. Nesta obra argumentare que les reparaciones de guerra que taba obligao a pagar Alemaña a les naciones vencedores yeren escesives y aportaríen la economía alemana a la ruina. Estes predicciones quedaren fuera de toa dubia cuando la economía alemana fúndese en 1923 pola hiperinflación cuando namás que pagara una pequeña parte de les reparaciones de guerra.
Keynes tamién asoleya Tratáu de Probabilidá en 1920, una notable contribución a los fundamentos filosóficos y matemáticos de la teoria de la probabilidá.
La so obra fundamental, Teoría Xeneral de la Ocupación, l'Interés y el Dineru foi publicada en 1936. Nesta, Keynes espón una teoría basada nel conceutu de Demanda Agregada pa desplicar les variaciones nel nivel d'actividá económica que pudieran observase pente la Gran Depresión. El llibru exhorta una política económica activa por parte de los gobiernos cola fin d'afalar la demanda nos periodos de cris, por exemplu per aciu de la contratación d'obres públiques.
Demientres la Segunda Guerra Mundial, Keynes argumenta en Cómo pagar la guerra que l'esfuerciu d'un conflictu bélicu habría ser sufragáu per aciu d'una medra d'impuestos (frente a la tradicional mena de facelu per aciu de déficit públicu) cola fin d'evitar tendencies inflacionistes.
Keynes tamién escribió ensayos biográficos d'economistes y persones notables, asina como Ensayos de persuasión qu'amuesen dellos intentos de Keynes d'influir nos responsables públicos demientres la Gran Depresión.
Tres de la guerra, Keynes apuesta por un radical sistema monetariu internacional qu'inclúi un bancu central mundial y una unidá monetaria.
El 1942 Keynes algamó'l títulu de Barón Keynes de Tilton.
Keynes, el magu les finances
[editar | editar la fonte]La habilidá de Keynes como inversor ta demostrada polos datos públicos de fondos qu'él alministraba en beneficiu del King's College de Cambridge.
Dende 1928 hasta 1945, pente una caída masiva del Crack de 1929, los fondos alministraos por Keynes medren hasta nun 13,2% añal (l'índiz xeneral del mercáu británicu tenía tases de crecimientu negatives d'un 0,5% añal).
Los principios adoptaos por Keynes a la hora de facer les inversiones puen resumise acordies colo que vien darréu:
- 1. Una esbilla amañosa d'unes poques inversiones que tengan un preciu relativamente baxo respeutu al so valir intrínsecu a llargo plazu y respeutu al restu d'inversiones alternatives.
- 2. El caltenimientu d'estes inversiones tantu nos bonos periodos como nos de pérdides, hasta qu'algamen les espectatives o se faiga evidente que la so compra foi un error.
- 3. Una posición equilibrada de les inversiones. Esto ye, diversificar los riesgos y a ser posible en riesgos opuestos (ex: tener una parte invertida n'oru, yá qu'esti valor compórtase en direiciones opuestes a les fluctuaciones xenerales)
Ver tamién
[editar | editar la fonte]Referencies
[editar | editar la fonte]- ↑ Afirmao en: Gemeinsame Normdatei. Data de consulta: 10 avientu 2014. Llingua de la obra o nome: alemán. Autor: Biblioteca Nacional d'Alemaña.
- ↑ 2,0 2,1 Afirmao en: Gemeinsame Normdatei. Data de consulta: 9 abril 2014. Llingua de la obra o nome: alemán. Autor: Biblioteca Nacional d'Alemaña.
- ↑ «The Stage (revista)» (inglés) páxs. 11 (6 agostu 1921).
- ↑ 4,0 4,1 Afirmao en: Kindred Britain.
- ↑ Biblioteca Nacional de Francia. «autoridaes BNF» (francés). Consultáu'l 10 ochobre 2015.
- ↑ Afirmao en: Oxford Dictionary of National Biography. Oxford Biography Index Number: 34310. Editorial: Oxford University Press. Llingua de la obra o nome: inglés. Data d'espublización: 2004.
- ↑ 7,0 7,1 URL de la referencia: https://www.econometricsociety.org/society/organization-and-governance/fellows/memoriam. Data de consulta: 6 abril 2023.
- ↑ Afirmao en: Le Monde. Títulu: Le général de Gaulle à la séance solennelle de rentrée de l'Université de Paris. Data d'espublización: 17 avientu 1945. Páxina: 4. Editorial: Societe Editrice Du Monde. Llingua de la obra o nome: francés. ISSN: 0395-2037.
- ↑ 9,0 9,1 9,2 Afirmao en: nobelprize.org. Identificador de nominación de persona al Premio Nobel: 4817. Editorial: Fundación Nobel. Llingua de la obra o nome: inglés.
Enllaces esternos
[editar | editar la fonte]
Wikimedia Commons acueye conteníu multimedia sobre John Maynard Keynes.- «John Maynard Keynes». en Find a Grave. (n'inglés)
- Obres de John Maynard Keynes nel Proyeutu Gutenberg
| Control d'autoridaes |
|
|---|
Datos: Q9317- Multimedia: John Maynard Keynes
Cites famoses: John Maynard Keynes