Makemake (astrunumìa)
|
C'l artìcul chè 'l è scrit in
Miranduléś |
Makemake (sìmbul: 
)[1] 'l è 'n pianēd nâṅ dal Sistéma sulàr dla clas di plutòid, catâ in dal 2005 in dla Fasa 'd Kuiper, ch'al ciàpa 'l nóm da la figùra 'd Makemake, Dio dla mitulugìa dl'Ìśula 'd Pasqua, mént'r a 'l inìsi 'l éra stâ batśâ cuma 2005 FY9. Al sò diamétar 'l è a 'l incìrca 'd 3/4 ad qvél ad Plutòṅ e 'l gh'à 'n satélit ciamâ “S/2015 (136472) 1”.
La sò temperadùra dimóndi basa (−243,2 °C) la 'l rénd un còrp dal tut giasâ, pîṅ 'd metàṅ, etàṅ e probabilmènt anc aśôt. I siensiâ i crédan ch'al gh pòsa avēr n'atmusféra quànd al pianēd al s davśìna a 'l sò perièli e dònca 'l Sōl 'l è bòṅ ad scaldàr-al qvél tant ch'l è abàsta par far evapuràr un pôc i sò giàs.